ក្រុមហ៊ុន អេវើក្រេន ដែលជំពាក់បំណុលគេជាង៣០០ពាន់លានដុល្លាររួមទាំង១៩ពាន់លានដុល្លារនៅក្នុងមូលបត្របំណុលទីផ្សារអន្តរជាតិដែរនោះ បានខកខានសងបំណុលបរទេសនៅចុងឆ្នាំ២០២១ និងបានរងគ្រោះដោយវិបត្តិអចលនទ្រព្យរបស់ប្រទេសចិន ចាប់តាំងពីពេលនោះមក។
ចៅក្រមនៃតុលាការក្រុងហុងកុង គឺលោកស្រី លីនដា ចាន់ (Linda Chan) បាននិយាយកាលពីថ្ងៃចន្ទថា តុលាការក្រុងហុងកុងនឹងទុកពេលលើកចុងក្រោយសម្រាប់ក្រុមហ៊ុន អេវើក្រេន ក្នុងការរៀបចំផែនការសងបំណុលបរទេសឡើងវិញ នៅត្រឹមថ្ងៃទី៤ ខែធ្នូ ឆ្នាំ២០២៣ នៅមុនពេលតុលាការនេះនឹងសម្រេចចិត្តចុងក្រោយចំពោះកាពន្យារពេលនេះ។
លោកស្រី ចាន់ បាននិយាយថា ករណីនេះគួរតែជាឱកាសចុងក្រោយសម្រាប់ក្រុមហ៊ុននេះ ដើម្បីពិនិត្យមើលថាតើវាអាចរៀបចំសំណើរៀបចំរចនាសម្ព័ន្ធឡើងវិញដោយប្រើប្រាស់ភាគហ៊ុនតាមរយៈក្រុមហ៊ុនប្រតិបត្តិការទ្រព្យសកម្មសំខាន់ៗផ្សេងទៀត និងដាក់បញ្ចូលមូលធនទៅក្នុងយានជំនិះ ដែលរៀបចំរចនាសម្ព័ន្ធឡើងវិញបានដែរ ឬក៏យ៉ាងណា។
លោកស្រី ចាន់ បានបន្ថែមថា ក្រុមហ៊ុនអភិវឌ្ឍន៍អចលនទ្រព្យមួយនេះត្រូវតែបង្កើតផែនការឱ្យរឹងមាំមុនពេលសវនាការលើកក្រោយ បើមិនដូច្នេះទេវានឹងត្រូវបានរំលាយជាក់ជាមិនខាន។ ការពន្យារពេលនេះ នឹងអនុញ្ញាតឱ្យក្រុមហ៊ុននេះអាចដោះស្រាយកិច្ចព្រមព្រៀង ដែលនឹងផ្តល់ផលចំណេញកាន់តែច្រើនដល់ម្ចាស់បំណុលក្នុងករណីមានការរំលាយចោលមែននោះ។
អត្ថបទគួរអាន
ក្រុមហ៊ុននេះបានធ្វើការលើសំណើរៀបចំរចនាសម្ព័ន្ធបំណុលឡើងវិញរយៈពេលជិត២ឆ្នាំមកហើយ ប៉ុន្តែការចាប់ឃុំខ្លួនភ្លាមៗនូវស្ថាបនិកក្រុមហ៊ុននេះ គឺលោក ហួយ កា យ៉ាន(Hui Ka Yan) សង្ស័យពាក់ព័ន្ធនឹងសកម្មភាពឧក្រិដ្ឋកម្មបានធ្វើឱ្យមានភាពស្មុគស្មាញដល់ផែនការនេះ។
សវនាការកាលពីថ្ងៃចន្ទនោះ គឺជាការពន្យារពេលលើកទី៥ហើយចាប់តាំងពីក្រុមហ៊ុន Top Shine Global ដែលជាម្ចាស់បំណុលនៅក្រៅប្រទេសបានដាក់ពាក្យបណ្ដឹងក្រុមហ៊ុន អេវើក្រេន កាលពីខែមិថុនា ឆ្នាំ២០២២ ហើយក្រុមហ៊ុន អេវើក្រេន បានដាក់ពាក្យសុំការការពារក្ស័យធននៅសហរដ្ឋអាមេរិកក្នុងខែសីហា ប៉ុន្តែដំណើរការទាំងនោះត្រូវបានពន្យារពេល។
ដោយធ្លាប់ជាក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ប្រទេសចិននោះ ក្រុមហ៊ុន អេវើក្រេន កំពុងមានតានតឹងផ្នែកហិរញ្ញវត្ថុដោយសារមានបំណុលកើនឡើងក្នុងពេលប៉ុន្មានឆ្នាំមកនេះ ខណៈដែលការលក់អចលនទ្រព្យធ្លាក់ចុះបានធ្វើឱ្យប៉ះពាល់ដល់សាច់ប្រាក់របស់ខ្លួន បន្ទាប់ពីការបង្ក្រាបរបស់រដ្ឋាភិបាលចិនទៅលើវិស័យមួយនេះ៕
អត្ថបទ៖ សុខ ជា
None
