បើតាមការចុះផ្សាយដោយសារព័ត៌មានជប៉ុន Nikkei បានឲ្យដឹងថា មានព័ត៌មានក្លែងក្លាយកាន់តែច្រើនឡើងៗ ត្រូវបានជនអនាមិកប្រឌិតឡើង ហើយត្រូវបានគេចែកចាយបន្តគ្នាពីមួយទៅមួយ ស្តីអំពីប្រភពដើមនៃជំងឺកូវីដ១៩។ តាមការចុះផ្សាយព័ត៌មានក្លែងក្លាយទាំងនោះ មានការលើកឡើងមួយថា វីរុសកូរ៉ូណាដែលបង្កជាជំងឺកូវីដ១៩បច្ចុប្បន្នដំបូងឡើយ មិនមែនមានប្រភពចេញពីប្រទេសចិននោះទេ ប៉ុន្តែវាបានកើតចេញពីតំបន់អឺរ៉ុប ក្នុងប្រទេសអីតាលីឯណោះវិញទេ។
ក្នុងព័ត៌មានក្លែងក្លាយដដែលនោះ បានសរសេររៀបរាប់ថា នាយករដ្ឋមន្ត្រីអ៊ីតាលី លោក Mario Draghi បានចេញមុខមកទទួលស្គាល់ថា កូវីដ១៩បានរាលដាលដំបូងនៅក្នុងប្រទេសរបស់លោកនៅប៉ុន្មានខែ មុនពេលដែលវាបានឈានទៅរាលដាលដល់ក្រុងវូហានប្រទេសចិន ហើយបន្តឆ្លងទៅពាសពេញពិភពលោកនៅពេលបច្ចុប្បន្ន។
ក្រៅពីនេះ នៅមានព័ត៌មានក្លែងក្លាយមួយទៀត ត្រូវបានអ្នកលែងបណ្តាញសង្គមជាច្រើនក្នុងប្រទេសចិនមានការចាប់អារម្មណ៍ផងដែរ នោះគឺជាការលើកឡើងដែលថា «ទាហ៊ានអាមេរិកជាអ្នកយកកូវីដ១៩ មកដាក់នៅក្នុងប្រទេសចិន កាលពីក្នុងព្រឹត្តិការណ៍កីឡាយោធាពិភពលោកឆ្នាំ២០១៩»
អត្ថបទទាក់ទង
ប្រការនេះបានបង្កឲ្យអ្នកលេងបណ្តាញសង្គមនៅប្រទេសចិនជាច្រើនមានការខឹងសម្បារនឹងសហរដ្ឋអាមេរិក ហើយថែមទាំងបានបញ្ចេញមតិដោយប្រើប្រាស់ពាក្យមិនសមរម្យទៀតផង។
កន្លងមកចិន មានការរិតត្បិតខ្លាំងណាស់ចំពោះមាតិកាព័ត៌មាននៅលើបណ្តាញសង្គម ពិសេស ព័ត៌មានណាដែលមានទំនោរប្រឆាំង ឬ មានភាពអវិជ្ជមានចំពោះក្រុងប៉េកាំង មាតិកាព័ត៌មានទាំងនោះតែងតែត្រូវបានក្រុងប៉េកាំងដកនិងលុបចេញភ្លាមៗ។ ប៉ុន្តែបើយើងក្រឡេកមកមើលព័ត៌មានក្លែងក្លាយទាំងប៉ុន្មាន ដែលបានរៀបរាប់ខាងលើអម្បាញ់មិញនេះ វាហាក់បីដូចជា មិនត្រូវបានរដ្ឋាភិបាលចិនមានចំនាត់ការដកចេញពីបណ្តាញអ៊ីនធឺណែតសោះឡើយ។
បើទោះបីជាមិនមានការបកស្រាយលម្អិតពីការបណ្ដោយឲ្យព័ត៌មានមិនពិតទាក់ទងនឹងប្រភពដើមកូវីដ-១៩ ពីសំណាក់អាជ្ញាធរចិនក្ដី ប៉ុន្ដែ បញ្ហានេះ ត្រូវបានគេមើលឃើញថា អាចជាកិច្ចខិតខំប្រឹងប្រែងមួយផ្នែក ក៏ដូចជាចេតនាមួយផងដែរ របស់ក្រុងប៉េកាំងក្នុងការបង្វែរការចាប់អារម្មណ៍របស់សាធារណៈមតិក៏ដូចជា សហគមន៍អន្តរជាតិពីសំណុំរឿងប្រភពដើមកូវីដ១៩ ដែលកំពុងស្ថិតក្នុងប្រធានបទដ៏ក្តៅគគុកមួយរបស់ចិន ដែលត្រូវបានក្រុមប្រទេសលោកខាងលិច ជាពិសេស គឺសហរដ្ឋអាមេរិកតែម្ដង ដែលតែងតែលើកយកមកនិយាយដើម្បីដាក់សម្ពាធទៅលើទីតក្រុងប៉េកាំង។
សូមជម្រាបថា កាលពីសប្តាហ៍មុន ចិនទើបតែបានបដិសេធជាថ្មីម្តងទៀត ចំពោះការបន្តអំពាវនាវរបស់អង្គការសុខភាពពិភពលោក WHO ស្តីអំពីការចូលទៅប្រទេសចិនដើម្បីសិក្សា និងស្វែងរកជាលើកទីពីរ នៃប្រភពដើមជំងឺកូវីដ១៩។ ភាគីចិនបានបដិសេធសំណើនេះ ដោយលើកឡើងថា ការបន្តស្វែងរកជាលើកទីពីរទាក់ទងនឹងប្រភពដើមកូរ៉ូណា ឬ កូវីដ១៩បច្ចុប្បន្ននេះ មិនមានលក្ខណៈវិទ្យាសាស្ត្រ ប៉ុន្តែវាស្ថិតនៅក្រោមហេតុផលនយោបាយតែប៉ុណ្ណោះ៕
None
