មហាយក្សចិន កំពុងធ្លាក់ចូលទៅក្នុងវិបត្តិការងារហើយ ក្រោយផ្ទុះសង្គ្រាមពាណិជ្ជកម្មជាមួយសហរដ្ឋអាម៉េរិក

លោក ដូណាល់ ត្រាំ បានបញ្ឆេះសង្គ្រាមពាណិជ្ជកម្មតាមរយៈការដំឡើងពន្ធគយបដិការខ្ពស់កប់ពពកលើប្រទេស និង ដែនដីជាង១៨០ទូទាំងពិភពលោករួមទាំងមហាយក្សចិន ផងដែរ ដោយមានគោលដៅចម្បង ​ដើម្បីគៀបសង្កត់កចិន ដែលធ្វើឱ្យចិន តបតវិញដោយមិនបង្អង់យូរ។ ​ជាលទ្ធផលនៃសង្គ្រាមពាណិជ្ជកម្មជាមួយសហរដ្ឋអាម៉េរិក រយៈពេលជិត១ខែមកនេះ បានធ្វើឱ្យចិន កំពុងតែផុងខ្លួនធ្លាក់ចូលទៅក្នុងវិបត្តិការងារជាបណ្ដើរៗហើយនៅពេលនេះ។

នៅទូទាំងប្រទេសចិន រោងចក្រជាច្រើនដែលផលិតទំនិញសព្វសារពើរាប់ចាប់តាំងពីគ្រឿងសង្ហារិមរហូតដល់ស្បែកជើង កាបូបស្ពាយ និងទំនិញជាច្រើនទៀត កំពុងផ្អាកការផលិតជាបណ្ដោះអាសន្ន ខណៈពន្ធគយបដិការ ១៤៥% ដែលសហរដ្ឋអាម៉េរិក ដាក់លើទំនិញចិន បានធ្វើឱ្យបណ្ដាក្រុមហ៊ុនអាម៉េរិក ផ្អាកទិញទំនិញចិន ផងដែរ។

រិតតែយ៉ាប់ជាងនេះទៅទៀតនោះ រោងចក្រផលិតជាច្រើននៅចិន បានបញ្ឈប់កម្មករ ឬបានចាប់ផ្ដើមរៀបចំផែនការបញ្ឈប់បុគ្គលិក កម្មករ ពីការងារជាលក្ខណៈទ្រង់ទ្រាយធំ ហើយស្ថានភាពនេះ​បានធ្វើឱ្យក្រុមអ្នកជំនាញសេដ្ឋកិច្ចព្រួយបារម្ភកាន់តែខ្លាំងឡើងថា អត្រាកំណើនសេដ្ឋកិច្ចរបស់ប្រទេសចិន នឹងធ្លាក់ចុះយ៉ាងគំហុកនៅពេលដែលប្រជាជនចិន កាត់បន្ថយការចាយវាយដោយសារការងារកាន់តែពិបាករក។

ក្រុមអ្នកជំនាញសេដ្ឋកិច្ចនៅធនាគារយក្ស Goldman Sachs បានព្យាករថា ពន្ធគយខ្ពស់របស់សហរដ្ឋអាម៉េរិក រួមជាមួយនឹងការបញ្ចប់ការបន្ធូរបន្ថយពន្ធសម្រាប់ទំនិញកញ្ចប់តូចៗពីប្រទេសចិន អាចនឹងធ្វើឱ្យពលរដ្ឋរហូតដល់ទៅ១៦លាននាក់ ក្នុងប្រទេសចិន បាត់បង់ការងារ​។ អ្នកជំនាញសេដ្ឋកិច្ចទាំងនេះ បានព្រមានថា បណ្ដាក្រុមហ៊ុនផលិតទូរសព្ទ ផលិតសម្លៀកបំពាក់ និងសារធាតុគីមីនៅក្នុងប្រទេសចិន អាចនឹងកាត់បន្ថយការងារ ឬកាត់បន្ថយចំនួនបុគ្គលិកកម្មករច្រើនជាងគេបំផុត៕

ដោយ: តែម សុខុម