កសិករនៅតែប្រឈមការលំបាកច្រើនក្នុងការដាំដុះស្វាយឲ្យត្រូវតាមស្ដង់ដារនាំចេញ ហេតុអ្វី?

បើតាមមន្ត្រីជាន់ខ្ពស់ក្រសួងកសិកម្ម បានស្នើឲ្យប្រជាកសិករចងក្រងជាសហគមន៍ ជាបណ្ដុំ និងសហការជាមួយក្រុមហ៊ុននាំចេញឲ្យបានល្អ ទើបអាចធ្វើការដាំដុះស្វាយអាចនាំចេញបាន ខណៈបច្ចុប្បន្ន កម្ពុជាមានទីផ្សារនាំចេញស្វាយស្រស់ដោយត្រង់ទៅកាន់ប្រទេសកូរ៉េខាងត្បូង និងប្រទេសចិន ជាមួយនឹងតម្លៃទីផ្សារខ្ពស់ផងដែរ។

ឯកឧត្តម ងិន ឆាយ អគ្គនាយកនៃ អគ្គនាយកដ្ឋានកសិកម្ម នៃក្រសួងកសិកម្មបានគូសបញ្ជាក់ថា បច្ចុប្បន្ន ប្រជាកសិករប្រកបរបរដាំដុះស្វាយមួយចំនួនហាក់មិនទាន់មានការចងក្រងជាបណ្ដុំនៅឡើយ ពិសេសមិនទាន់មានទំនាក់ទំនងល្អជាមួយក្រុមហ៊ុននាំចេញ ដែលធ្វើឱ្យកសិករតែងជួបបញ្ហាទីផ្សារនាពេលកន្លងមក។ បើតាមឯកឧត្តម ងិន ឆាយ ការផ្សាភ្ជាប់ទំនាក់ទំនងរវាងអ្នកដាំស្វាយ និងក្រុមហ៊ុននាំចេញ នឹងបង្កើនឱកាសដល់កសិករទទួលបាននូវការបណ្ដុះបណ្ដាលបច្ចេកទេសសម្រាប់ផលិតកម្មស្វាយនាំចេញ និងធានាបាននូវស្ថិរភាពទីផ្សារ ផងដែរ។

ជុំវិញបញ្ហានេះ ក្រុមកសិករប្រកបរបរដាំស្វាយមួយចំនួន បានគូសបញ្ជាក់ថា បញ្ហាទីផ្សារនៅតែជាឧបសគ្គសម្រាប់ពួកគាត់ ពិសេសអំឡុងវិបត្តិកូវីដ១៩ តែម្ដង ហើយរហូតមកដល់ពេលនេះ បញ្ហាទីផ្សារនៅតែបន្តកើតមានសម្រាប់អ្នកដាំស្វាយ។ ក្រុមកសិករដាំស្វាយកែវរមៀត នៅខេត្តកំពង់ធំ បានគូសបញ្ជាក់ថា ដ្បិតបច្ចុបន្ន ក្រុមកសិករបានចងក្រងជាបណ្ដុំសហគមន៍ និងកែសម្រួលបច្ចេកទេសដាំដុះ ក៏ពិតមែន តែមិនទាន់អាចដោះស្រាយបញ្ហាទីផ្សារបាននៅឡើយ ព្រោះក្រុមកសិករនៅតែពឹងផ្អែកលើឈ្មួញកណ្ដាល ពិសេសមិនមានទំនាក់ទំនងជាមួយក្រុមហ៊ុននាំចេញស្វាយទៅទីផ្សារអន្តរជាតិ នោះទេដែលធ្វើឱ្យក្រុមកសិករ មិនទាន់យល់ច្បាស់ពីលក្ខខណ្ឌតម្រូវសម្រាប់នាំចេញ។

ជាមួយគ្នានេះ ឯកឧត្តម ងិន ឆាយ អគ្គនាយកនៃនាយកដ្ឋានកសិកម្ម ក៏បានបន្តជំរុញឱ្យកសិករដាំស្វាយចងក្រងជាបណ្ដុំ ហើយការដាំដុះស្វាយ គឺត្រូវតែគោរពតាមលក្ខខណ្ឌតម្រូវមួយចំនួនទើបអាចនាំចេញទៅកាន់ទីផ្សារអន្តរជាតិ។ បើតាមឯកឧត្តម ងិន ឆាយ ផ្វែស្វាយដែលអាចនាំចេញទៅទីផ្សារអន្តរជាតិបាន មិនត្រូវមានសំណល់ថ្នាំកសិកម្ម និងសមាសភាពចង្រៃ ដែលនៅក្នុងផ្លែស្វាយនោះ ពិសេសចាប់ពីការដាំដុះរហូតដល់ការធ្វើប្រព្រឹត្តកម្មស្វាយ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ នៅឆ្នាំ២០២១ កម្ពុជា បាននាំចេញផ្លែស្វាយស្រស់ ជាង២៤ម៉ឺនតោន ទៅកាន់ទីផ្សារសំខាន់ៗ ដូចជា វៀតណាម,ថៃ,ចិន,កូរ៉េខាងត្បូង ជាដើម។ ខណៈបច្ចុប្បន្ន កម្ពុជា មានផ្ទៃដីដាំដុះស្វាយសរុបជាង ១០ម៉ឺនហិកតា និងទទួលបានទិន្នផលប្រមាណជិត២លានតោន ក្នុងមួយឆ្នាំ។ នេះបើតាមការបញ្ជាក់របស់ឯកឧត្តម ងិន ឆាយ អគ្គនាយកនៃនាយកដ្ឋានកសិកម្ម៕