អ្នកឆ្លងថ្មី ៧៥នាក់បន្ថែមទៀតហើយ ត្រូវបានរកឃើញគិតត្រឹមព្រឹកថ្ងៃទី ១៧ ខែមីនា

ក្រសួងសុខាភិបាលបានប្រកាសរកឃើញករណីឆ្លងថ្មីកូវីដ-១៩ ចំនួន៧៥នាក់បន្ថែមទៀត គិតត្រឹមព្រឹកថ្ងៃទី ១៧ ខែមីនា ឆ្នាំ២០២១នេះ ដោយក្នុងនោះ សុទ្ធសឹងជាករណីឆ្លងក្នុងព្រឹត្តិការណ៍សហគមន៍២០កុម្ភៈទាំងអស់ ហើយក្នុងនោះ ចំណោមករណីឆ្លងថ្មីទាំងនោះ គឺភាគច្រើនត្រូវបានរកឃើញនៅរាជាធានីភ្នំពេញ និងខេត្តកណ្ដាល។

រថយន្ដសង្គ្រោះបន្ទាន់ចេញដឹកអ្នកជំងឺនៅរាជធានីភ្នំពេញ

យោងតាមរបាយការណ៍ពីក្រសួងសុខាភិបាលដដែល គិតត្រឹមព្រឹកថ្ងៃទី ១៧ ខែមីនា ឆ្នាំ២០២១ ចំនួនអ្នកឆ្លងកូវីដ-១៩ សរុបទាំងអស់មាន១៥០៥នាក់ ក្នុងនោះ មានដល់ទៅ៩៩០នាក់ គឺជាករណីឆ្លងចូលក្នុងព្រឹត្តិការណ៍សហគមន៍២០កុម្ភៈ។ ទោះយ៉ាងណាចំនួនអ្នកដែលបានជាសះស្បើយក៏មានការកើនឡើងសរុបដល់ទៅ ៨៤០នាក់ ខណៈដែលនៅព្រឹកថ្ងៃទី ១៧ ខែមីនានេះអ្នកជាសះស្បើយថ្មីមានចំនួន២២នាក់។

ក្នុងចំណោមអ្នកឆ្លងថ្មីដែលត្រូវបានរកឃើញទាំង ៧៥នាក់នេះ មាន ៥០នាក់រកឃើញនៅរាជធានីភ្នំពេញ ២២នាក់នៅខេត្តកណ្ដាល, ២នាក់នៅព្រៃវែង និងតាកែវ១នាក។

ប្រមុខរាជរដ្ឋាភិបាល ក៏ដូចជាក្រសួងសុខាភិបាល បន្ដអំពាវនាវឲ្យប្រជាពលរដ្ឋទាំងអស់ចូលរួមអនុវត្តវិធានការការពារមួយចំនួនដូចជា វិធានការ ៣ ការពារ (ពាក់ម៉ាស់ ឡាងដៃញឹកញាប់ និងរក្សាគម្លាតសុវត្ថិភាព) និងវិធានការ៣កុំ (កុំទៅកន្លែងមានមនុស្សច្រើនកកកុញ, កុំទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក និងកុំប៉ពាល់គ្នា ចាប់ដៃ កៀកស្មា ឱបគ្នា នៅពេលជួបគ្នា)៕