កិច្ចព្រមព្រៀងដើម្បីទិញវ៉ាក់សាំងកូវីដ១៩ BioNTech ចំនួន១០លានដូស ដែលអាជ្ញាធរកោះតៃវ៉ាន់ បានអនុញ្ញាតឱ្យស្ថាបនិកក្រុមហ៊ុន Foxconn និងក្រុមហ៊ុន TSMC ជាអ្នកចរចាទិញវ៉ាក់សាំងដោយផ្ទាល់នោះ រហូតមកដល់ពេលនេះមិនទាន់បាន១ខែផង លោក លោក Terry Gou តំណាងឲ្យអាជ្ញាធរកោះតៃវ៉ាន់បានស្នើរសុំឱ្យ BioNTech បម្រុងទុកវ៉ាក់សាំងការពារកូវីដ១៩ ចំនួន៣០លានដូសបន្ថែមទៀតសម្រាប់តៃវ៉ាន់។
លោក Gou បានបង្ហោះនៅលើគណនីហ្វេសប៊ុករបស់គាត់កាលពីល្ងាចថ្ងៃអាទិត្យថា តាមកិច្ចសន្យា វ៉ាក់សាំងចំនួន ៨ លានទៅ ៩ លានដូសនឹងមកដល់នៅឆ្នាំនេះ ហើយការដល់លើកដំបូងរបស់វ៉ាក់សាំងនេះនឹងមកដល់នៅខែកញ្ញាខាងមុខនេះ។ ទន្ទឹមនេះលោកបានសួរបន្ថែមទៅកាន់ BioNTech ដើម្បីកក់ទុក វ៉ាក់សាំង៣០ លានដូសបន្ថែមទៀត សម្រាប់តៃវ៉ាន់នៅឆ្នាំក្រោយផងដែរ ខណៈដែលបច្ចុប្បន្ននេះបានទទួលការឆ្លើយតបក្នុងការផ្គត់ផ្គង់យ៉ាងល្អប្រសើរ។
អត្ថបទទាក់ទង
អាជ្ញាធរកោះតៃវ៉ាន់បានឱ្យដឹងថាកាលពីខែមុន រដ្ឋាភិបាលក៏បានបញ្ជាទិញវ៉ាក់សាំងModerna ចំនួន ៣៦ លានដូសបន្ថែមផងដែរ។ ខណៈរហូតមកដល់ពេលនេះ កោះតៃវ៉ាន់បានទទួលវ៉ាក់សាំងពីរបស់ក្រុមហ៊ុន Moderna និង AstraZeneca ប្រហែល ៩ លានដូស រួមទាំងជិត ៦ លានដូសដែលបានបរិច្ចាគដោយប្រទេសជប៉ុន និងសហរដ្ឋអាមេរិក ដែលវាបានជួយពន្លឿនដល់កម្មវិធីចាក់វ៉ាក់សាំងដល់ពលរដ្ឋតៃវ៉ាន់។
សូមជម្រាបថា ស្ថានភាពនៃការរីករាលដាលកូវីដ១៩នៅកោះតៃវ៉ាន់ បានវិលមករកសភាពល្អប្រសើរឡើងវិញហើយ ពោលនៅថ្ងៃទី២៩ ខែសីហានេះ អ្នកឆ្លងសរុបមានតែ ២៣ករណីប៉ុណ្ណោះ។ ចំណែកអ្នកចាក់វ៉ាក់សាំងវិញគិតត្រឹមថ្ងៃទិ២៩ ខែសីហាដដែលនេះ អ្នកចាក់វ៉ាក់សាំងដូសទី១មានចំនួនប្រមាណជាង ១០លាននាក់ និងអ្នកទទួលបានគ្រប់ចំនួន២ដូសមានប្រមាណ ៨៨ម៉ឺននាក់ ខណៈដែលកោះតៃវ៉ាន់មានប្រជាជនរស់នៅសរុបជិត២៤លាននាក់៕
អត្ថបទ៖ ស៊ើង និមល់
None
