ក្រោយពេល រដ្ឋាភិបាលថៃបានពិភាក្សាជាមួយបណ្តាប្រទេសនៅអឺរ៉ុបក្នុងការទិញវ៉ាក់សាំងការពារជំងឺកូវីដ ១៩ រាប់លានដូស ដើម្បីព្យាយាមពន្លឿនការចាក់ថ្នាំបង្ការមេរោគកូវីដ-១៩ ដើម្បីទប់ស្កាត់រលកនៃការឆ្លងនោះ ថ្មីៗនេះ នាយកដ្ឋានគ្រប់គ្រងជំងឺឆ្លងបានឱ្យដឹងថា យុទ្ធនាការចាក់វ៉ាក់សាំងដូសទី៣ នឹងត្រូវផ្ដល់ជូនប្រជាជនប្រមាណ ៣លាននាក់ ចាប់ពីចុងខែកញ្ញា ដល់ខែតុលា។ ក្នុងចំណោមប្រជាជន ៣ លាននាក់ដែលនឹងទទួលការចាក់ដូសទី៣ភាគច្រើន ទំនងជាអ្នកដែលបានទទួលវ៉ាក់សាំង Sinovac ពីរដូសរួច ហើយយ៉ាងហោចណាស់ត្រូវមានគម្លាតរយៈពេលបីខែក្រោយពេលចាក់ដូសទី២ ទើបអាចចាក់ដូសទី៣បាន។ ការចាក់ដូសទី៣នេះទៀតសោត ប្រទេសថៃ នឹងផ្ដោតសំខាន់ដល់មនុស្សចាស់ចាប់ពីអាយុ ៦០ឡើង និងមនុស្សដែលប្រឈមហានិភ័យខ្ពស់។
ទន្ទឹមនេះ ក្រសួងបានឱ្យដឹងថា វ៉ាក់សាំង AstraZeneca និង Pfizer នឹងដើរតួជាវ៉ាក់សាំងដូសទី៣ ពីព្រោះទំរាំដល់ នៅពេលនោះនឹងមានការផ្គត់ផ្គង់វ៉ាក់សាំងគ្រប់គ្រាន់ពីក្រុមហ៊ុនផលិតទាំងពីរប្រភេទនេះ។
សូមបញ្ជាក់ថា អ្នកនាំពាក្យរដ្ឋាភិបាលថៃបាននិយាយថា វ៉ាក់សាំងការពារជំងឺកូវីដ ១៩ ចំនួន ១៤០ លានដូសត្រូវបានរំពឹងថា នឹងត្រូវបានផ្គត់ផ្គង់នៅចុងឆ្នាំនេះ។ ខណៈក្នុងរយៈពេលកន្លងមកនេះ រដ្ឋាភិបាលបាននិងកំពុងចរចាដើម្បីទិញវ៉ាក់សាំង AstraZeneca ចំនួន ២ លានដូសបន្ថែម និងវ៉ាក់សាំង Pfizer ចំនួន ២លាន ៥សែន ទៅ ៣លានដូសដើម្បីផ្គត់ផ្គង់ចាប់ពីខែកញ្ញាដល់ខែធ្នូ។
អត្ថបទគួរអាន
យ៉ាងណាមិញ នាយករដ្ឋមន្ត្រីថៃ លោកប្រាយុទ្ធ ចាន់អូចា បានណែនាំដល់ក្រសួងសុខាភិបាលឱ្យគិតគូរទទួលទិញវ៉ាក់សាំងសម្រាប់កុមារអាយុពី ១២-១៨ ឆ្នាំ ដើម្បីរៀបចំឱ្យពួកគេមានសុវត្ថិភាពក្នុងការបើកសាលារៀនឡើងវិញ។
រដ្ឋលេខាធិការអចិន្ត្រៃយ៍ទទួលបន្ទុកសុខភាពសាធារណៈ បាននិយាយកាលពីថ្ងៃអាទិត្យថារលកឆ្លងចុងក្រោយបានបង្ហាញសញ្ញាថមថយខ្លះហើយ ពោលចំនួនឆ្លងប្រចាំថ្ងៃបានធ្លាក់ចុះពី ២ម៉ឺននាក់ មកនៅត្រឹមជាង១ម៉ឺននាក់ក្នុងមួយថ្ងៃ។
ដោយឡែក គិតត្រឹមថ្ងៃទី២៩ ខែសីហា អ្នកចាក់វ៉ាក់សាំង១ដូសមានប្រមាណ ២២លាននាក់ ក្នុងនោះអ្នកចាក់គ្រប់២ដូសមានចំនួនប្រហែល ៧លាននាក់ និងអ្នកបានចាក់ដូសទី៣មានប្រមាណជិត៦សែននាក់ហើយ ដោយអ្នកដែលចាក់ដូសទី៣ទាំងនេះគឺជាក្រុមមនុស្សជួរមុខ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
