ចំណុចពិសេសដែលធ្វើឲ្យអាជីវកម្ម franchise អាចរក្សាបាននូវស្ថិរភាពរបស់ខ្លួននៅលើទីផ្សារ គឺពឹងផ្អែកសំខាន់បំផុតទៅលើប្រព័ន្ធនៃការគ្រប់គ្រងនិងឥទ្ធិពលនៃម៉ាកយីហោរបស់ខ្លួន។ ក្នុងនោះ មានចំណុចមូលដ្ឋានសំខាន់ៗមួយចំនួន ដែលអ្នកត្រូវអនុវត្តដើម្បីអភិវឌ្ឍអាជីវកម្មទៅជា Franchise ដូចជា៖
បង្កើតគម្ពីរអាជីវកម្ម (Operation Manual)
ដើម្បីអាចធានាបាននូវប្រព័ន្ធគ្រប់គ្រងច្បាស់លាស់ មិនប្រាសចាកពីរូបមន្ដដើម អាជីវកម្ម Franchise តែងតែមានចងក្រងនូវគម្ពីរអាជីវកម្មរបស់ខ្លួន ឬហៅថា Operation Manual សម្រាប់កត់ត្រាយ៉ាងលម្អិតរាល់ប្រតិបត្តិការទាំងអស់នៃដំណើរការអាជីវកម្មទាំងមូល ពោលគឺរាប់តាំងពីការចាប់ផ្ដើមដំបូង រហូតដល់ប្រតិបត្តិការចុងក្រោយ។
គម្ពីរអាជីវកម្មនេះទៀតសោត គឺទុកសម្រាប់ផ្ដល់ជូនអ្នកដែលទិញសិទ្ធិបន្ដ ដើម្បីអាចយកទៅអនុវត្តប្រកបដោយប្រសិទ្ធភាព។ នៅក្នុងគម្ពីរអាជីវកម្មភាគច្រើន មានរៀបរាប់ពីក្បួនប្រតិបត្តិទាក់ទងនឹងផ្នែកសំខាន់ៗមួយចំនួនក្នុងប្រតិបត្តិការអាជីវកម្មដូចជា៖
តើអ្នកបានអានអត្ថបទនេះឬនៅ?
- ការគ្រប់គ្រងបុគ្គលិក (Staffing)
- ការត្រួតពិនិត្យផ្នែកគុណភាព (Quality Control)
- ការគ្រប់គ្រងបញ្ជីសារពើភណ្ឌ (Inventory)
- គោលការណ៍បម្រើសេវាកម្មសម្រាប់អតិថិជន (Customer Service Policies)
- ពេលវេលាប្រតិបត្តិការ (Hours of Operation)
- គោលការណ៍សម្រាប់អនុវត្តលើម៉ាកយីហោ (Brand Policies)
ក្រៅពីចំណុចទាំងអស់នេះ ក៏អាចមានការចងក្រងនូវចំណុចសំខាន់ៗផ្សេងទៀតនៃសង្វាក់ប្រតិបត្តិការក្នុងអាជីវកម្ម ដែលវាអាចមានខុសប្លែកគ្នាទៅតាមប្រភេទអាជីវកម្មនីមួយៗ។
មានសមត្ថភាពគ្រប់គ្រាន់ដើម្បីផ្ដល់ការប្រឹក្សានិងដើរតួជាអ្នកផ្គត់ផ្គង់
ក្រៅពីគម្ពីរអាជីវកម្មខាងលើ មុននឹងលោកអ្នកអាចចេញធ្វើអាជីវកម្មជា Franchise បាន ម្ចាស់ដើមអាជីវកម្មក៏ត្រូវត្រៀមខ្លួនឲ្យបានរួចរាល់ក្នុងការដើរតួនាទីជាអ្នកប្រឹក្សារាល់បញ្ហានានាក្នុងការប្រតិបត្តិអាជីវកម្ម និងជាអ្នកផ្គត់ផ្គង់ (Supplier) សម្រាប់អ្នកទិញសិទ្ធិបន្តផងដែរ។
តើអ្នកបានអានអត្ថបទនេះ ឬនៅ?
ឧទាហរណ៍៖ អ្នកចង់បង្កើតហាងលក់នំបញ្ចុកមួយទៅជា Franchise ដូច្នេះ អ្នកត្រូវមានស្នាក់ការកណ្ដាលមួយដើម្បីផលិតនិងបែងចែកវត្ថុធាតុដើម ឬមុខទំនិញប្រើប្រាស់សំខាន់ៗទាំងនោះ ទៅឲ្យអ្នកដែលទិញសិទ្ធិបន្ត ក្នុងគោលបំណងធ្វើយ៉ាងណាឲ្យសង្វាក់ផលិតកម្ម កាន់តែមានភាពរលូននិងងាយក្នុងការប្រតិបត្តិ។
ផ្ដល់ការបំពាក់បំប៉នបុគ្គលិកសំខាន់ៗ
ការផ្ដល់នូវការបំពាក់បំប៉នទៅកាន់បុគ្គលិកសំខាន់ៗរបស់អ្នកទិញសិទ្ធិបន្ត (Franchisee) គឺជាភារកិច្ចមួយដែលម្ចាស់ដើមអាជីវកម្ម (Franchisor) ត្រូវតែអនុវត្ត ព្រោះប្រសិនបើមិនមានការបង្វឹកដោយផ្ទាល់ពីម្ចាស់ដើមទេ នោះការនាំយកអាជីវកម្មមកប្រតិបត្តិបន្ត ក៏មិនមានប្រសិទ្ធភាពដែរ។
ជាទូទៅ បុគ្គលិកសម្រាប់ហាងថ្មីទាំងនោះ ត្រូវបានយកទៅហ្វឹកហាត់នៅទីតាំងរបស់ម្ចាស់ដើមអាជីវកម្ម មុននឹងហាងថ្មីត្រូវបានបើកលក់ជាផ្លូវការ ដោយរយៈពេលនៃការហ្វឹកហាត់ អាចមានពេលវែង ឬខ្លី អាស្រ័យលើប្រភេទអាជីវកម្មនីមួយៗ។
មិនតែប៉ុណ្ណោះ ក្រោយពីហាងថ្មីបានបើកលក់ ម្ចាស់ដើមអាជីវកម្មក៏ត្រូវមានបញ្ជូនអ្នកជំនាញចុះត្រួតពិនិត្យនិងណែនាំបន្ថែមទៀតផងដែរ ពោលគឺ ធ្វើយ៉ាងណាដើម្បីពង្រឹងសមត្ថភាពបុគ្គលិកឲ្យកាន់តែប្រសើរឡើង និងធានាបានថាការអនុវត្តបានត្រឹមត្រូវតាមក្បួនខ្នាត។
តើអ្នកបានអានអត្ថបទនេះឬនៅ?
កំណត់យកតម្លៃផ្សេងសម្រាប់ការលក់ Franchise
ជាទូទៅ នៅក្នុងការលក់អាជីវកម្ម Franchise មានកម្រៃមួយចំនួនដែលម្ចាស់ដើមអាជីវកម្ម តែងតែតម្រូវឲ្យអ្នកទិញសិទ្ធិបន្តត្រូវបង់មកឲ្យខ្លួន ដែលក្នុងនោះរួមមាន៖
តម្លៃលើម៉ាកយីហោ (Franchise Fee)៖ ជាទូទៅ តម្លៃនេះគឺគ្រាន់តែជាការបង់លើការទទួលបានសិទ្ធិធ្វើអាជីវកម្មលើម៉ាកយីហោប៉ុណ្ណោះ តែមិនទាន់មានបូកបញ្ចូលសេវាផ្សេងៗទៀតនៅក្នុដំណាក់កាលប្រតិបត្តិការនៅឡើយទេ។ សម្រាប់ការនាំចូលម៉ាកយីហោពីបរទេសមកកម្ពុជានាពេលបច្ចុប្បន្ននេះវិញ តម្លៃលើម៉ាកយីហោនេះ មានមិនក្រោម១ម៉ឺនដុល្លារនោះទេ ដែលពេលខ្លះមានបូកបញ្ចូលទាំងថ្លៃសម្រាប់ការបំពាក់បំប៉នបុគ្គលិក តែពេលខ្លះក៏មិនមានរាប់បញ្ចូលដែរ។
តម្លៃសម្រាប់ការបំពាក់បំប៉នបុគ្គលិក (Training Fee)៖ ពេលខ្លះតម្លៃនេះ អាចមានបូកចូលជាកញ្ចប់រួចជាស្រេចជាមួយនឹងតម្លៃលើម៉ាកយីហោ ប៉ុន្ដែពេលខ្លះ ម្ចាស់ដើមអាជីវកម្មក៏មានការគិតដាច់ដោយឡែកផងដែរ។
តម្លៃប្រចាំខែ (Royalty Fee)៖ តម្លៃនេះ គេតែងតែកំណត់យកជារៀងរាល់ខែពីអ្នកទិញសិទ្ធិបន្ត ដែលវាមានចាប់ពី៥%ឡើងទៅ នៃចំណូលដែលបានមកពីការលក់។
តម្លៃសម្រាប់សេវាទីផ្សារ (Marketing Fee)៖ ជាទូទៅ តម្លៃនេះអាចមានចាប់ពី២%ឡើងទៅ នៃចំណូលដែលលក់បានប្រចាំខែ តែវាមានតិចជាង Royalty Fee។
កំណត់កាលផុតកំណត់នៃអាជីវកម្ម (Franchise Termination)៖ អាជីវកម្ម Franchise មិនមែនទិញមកហើយអាចបើករកស៊ីបានរហូតនោះទេ វាតែងមានកាលកំណត់របស់វា ចាប់ពី៥ឆ្នាំឡើងទៅ ទៅតាមប្រភេទអាជីវកម្មតូចធំ។
ក្រោយពីលោកអ្នកបានរៀបចំប្រព័ន្ធទាំងអស់នេះសម្រាប់អាជីវកម្មរបស់ខ្លួនរួចរាល់ហើយ នោះលោកអ្នកអាចជ្រើសរើសយកវិធីសាស្ត្រមួយចំនួនដូចខាងក្រោមដើម្បីពង្រីកសាខា៖
- បើកសាខាដោយខ្លួនឯងក៏បាន
- រកដៃគូវិនិយោគរួមគ្នា (Business Joint Venture)
- លក់បន្តទៅឲ្យអ្នកទិញសិទ្ធិបន្តនិងអាចចែកចាយបន្ដ (Master Franchisee)
- លក់ទៅឲ្យអ្នកទិញសិទ្ធិបន្ត (Franchisee)
- ស្វែងរកដៃគូដើម្បីធ្វើជាតំណាងលក់និងចែកចាយ (Sale Representative Company)
ខូមបូណូមីស សូមថ្លែងអំណរគុណចំពោះមិត្តអ្នកអាន ដែលខំតាមដានតាំងពីភាគទី១រៀងមក ហើយយើងខ្ញុំក៏សង្ឃឹមថា បន្ទាប់ពីការផ្សាយអត្ថបទនេះ នឹងមានសហគ្រិនកម្ពុជាជាច្រើននឹងចាប់ផ្ដើមគិតគូរ និងបន្តពង្រីក និងអភិវឌ្ឍអាជីវកម្មរបស់ខ្លួនឲ្យក្លាយទៅជា Franchise ប្រកបដោយជោគជ័យ៕
None
