បើតាមសេចក្ដីថ្លែងការណ៍ពីកិច្ចប្រជុំមេដឹកនាំហិរញ្ញវត្ថុ នៃប្រទេសសេដ្ឋកិច្ចរីកចម្រើន G20 បានបញ្ជាក់ថា រដ្ឋមន្ត្រីក្រសួងហិរញ្ញវត្ថុ និង ធនាគារកណ្ដាលនៃរដ្ឋាភិបាលប្រទេសដែលមានសេដ្ឋកិច្ចធំៗគ្រាក់ៗ ទាំង២០ ឬ គេហៅថា G20 កំពុងកែប្រែនូវគោលនយោបាយរបស់ខ្លួនងាកចេញពីការធ្វើពាណិជ្ជកម្មបែបគាំពារនិយម មករកការជួយប្រទេសនានា ដែលកំពុងជួបទុកលំបាកនៅអំឡុងពេលកូវីដ-១៩នេះ។ ជាក់ស្ដែងថ្មីៗនេះ ក្រុមប្រទេសសេដ្ឋកិច្ចរីកចម្រើន G20 បានជំរុញឲ្យស្ថាប័នរូបិយវត្ថុអន្តរជាតិ IMF បង្កើនទុនបម្រុង ៦៥០ពាន់លានដុល្លារ សម្រាប់ផ្ដល់លទ្ធភាពក្នុងការបង្កកការសងបំណុលពីប្រទេសកំពុងអភិវឌ្ឍ ដែលបច្ចុប្បន្នកំពុងរងទុក្ខនឹងការដោះស្រាយបញ្ហាកូវីដ-១៩។ ទុនបម្រុងបន្ថែមនេះ នឹងអាចជួយឲ្យប្រទេសខ្លះអាចពន្យារការសងបំណុល និង អាចទទួលបានកម្ចីបន្ថែម ដើម្បីយកទៅប្រើប្រាស់សម្រាប់ទប់ទល់នឹងបញ្ហាកូវីដ-១៩។
អត្ថបទទាក់ទង!
នៅក្នុងសេចក្ដីព្រាងនៃសេចក្ដីថ្លែងការណ៍បានបញ្ជាក់ថា ប្រទេសសេដ្ឋកិច្ចរីកចម្រើន G20 នឹងបន្ដជំហរក្នុងការគាំទ្រដល់បណ្ដាប្រទេស ដែលងាយរងគ្រោះ ខណៈដែលប្រទេសទាំងនោះ បច្ចុប្បន្នកំពុងដោះស្រាយនូវបញ្ហាប្រឈមជាច្រើនទាក់ទងនឹងការរាលដាលនៃកូវីដ-១៩។
តាមរយៈការបង្កើនទុនបម្រុងរបស់អង្គការមូលនិធិរូបិយវត្ថុអន្តរជាតិនេះ នឹងជួយផ្ដល់សាច់ប្រាក់ដល់ប្រទេសជាសមាជិក ហើយវាក៏មិនមានការបន្ថែមបន្ទុកបំណុលដល់ប្រទេសចំនួន៣០ នៅគ្រាដែលប្រទេសទាំងនោះ កំពុងមាន និងប្រឈមបញ្ហាបំណុលនេះកាន់តែខ្លាំងឡើងៗ។
ជាមួយគ្នានេះ ប្រទេសសេដ្ឋកិច្ចរីកចម្រើន G20 ក៏បានយល់ព្រម នឹងគម្រោងគំនិតផ្ដួចផ្ដើមពន្យារការសងបំណុលរហូតដល់ចុងឆ្នាំ២០២១នេះ មានន័យថា ប្រទេសកំពុងអភិវឌ្ឍនឹងមានសាច់ប្រាក់ក្នុងដៃដើម្បីបន្ដប្រយុទ្ធប្រឆាំងជាមួយនឹងបញ្ហាកូវីដ-១៩បន្ថែមទៀត។ ក្នុងនោះដែរ ការពន្យារពេលសងបំណុលសម្រាប់ប្រទេសក្រីក្រ អាចនឹងផ្ដល់ជូនក្នុងទំហំរាប់ពាន់លានដុល្លារ ដើម្បីឲ្យប្រទេសទាំងនោះ អាចមានសាច់ប្រាក់ចំណាយលើការទិញវ៉ាក់សាំង និង ជំរុញសេដ្ឋកិច្ច។
ថ្មីៗនេះដែរ ក៏មានអង្គការ និង ស្ថាប័នមិនរកប្រាក់ចំណេញជាង២៥០ ស្ថាប័ន បានទទូចស្នើឲ្យមេដឹកនាំប្រទេសសេដ្ឋកិច្ចរីកចម្រើនG20, សេតវិមានអាមេរិក និង អង្គការមូលនិធិរូបិយវត្ថុអន្តរជាតិ គួរតែលុបបំណុល និង បង្កើនវិធានការបន្ធូរបន្ថយបំណុល សម្រាប់ប្រទេសកំពុងអភិវឌ្ឍថែមទៀត ទើបជារឿងល្អ ហើយការធ្វើបែបនេះទៅបាន គួរតែវាយតម្លៃទៅលើករណីផ្សេងៗគ្នា តាមភាពជាក់ស្ដែង។
សូមបញ្ជាក់ថា នៅដើមសប្ដាហ៍នេះដែរ អង្គការមូលនិធិរូបិយវត្ថុអន្តរជាតិ IMF ទើបតែបានព្យាករកំណើនសេដ្ឋកិច្ចពិភពលោកឆ្នាំ២០២១នេះ ថានឹងកើន៦% ដោយក្នុងនោះ មានការចូលរួមរុញពីក្រោយយ៉ាងសំខាន់ពីកំណើនសេដ្ឋកិច្ចរបស់មហាយក្សអាមេរិក និង ចិន៕None
