នៅក្នុងជំនួបកំពូលនៅចុងសប្ដាហ៍មុននេះ
ក្រុមប្រទេសអ្នកមាន ដែលមានឧស្សាហកម្មជឿនលឿនទាំង៧ ហៅកាត់ថា G7 បានបញ្ចេញគម្រោងថ្មីសន្លាងមួយហៅខ្លីជាភាសាអង់គ្លេសថា B3W ដែលមានគោលដៅជួយគាំទ្រ និង ផ្តល់ឲ្យប្រទេសក្រីក្រ
នូវគម្រោងអភិវឌ្ឍហេដ្ឋរចនាសម្ព័ន្ធនៅក្នុងប្រទេស ដែលវាត្រូវបានគេមើលឃើញថា
គឺជាគម្រោងធំមួយដែលនឹងប្រជែងគម្រោងផ្លូវមួយខ្សែក្រវាត់មួយរបស់ចិន។
នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គម្រោងខាងលើ ត្រូវបានក្រុមប្រទេសរីកចម្រើន G7 ប្រសិទ្ធនាមជាភាសាអង់គ្លេសថា «Build Back Better World Initiative» ឬប្រើជាខេមរភាសាថា «គំនិតផ្តួចផ្តើមកសាងពិភពលោកឲ្យប្រសើរឡើងវិញ» ។
ក្រោយបិទបញ្ចប់កិច្ចប្រជុំ នៅភាគនិរតីនៃចក្រភពអង់គ្លេស មេដឹកនាំកំពូលនៃប្រទេសទាំង៧បានបង្ហាញពី សុទិដ្ឋិនិយមនិងក្តីរំពឹងខ្ពស់ ក្នុងការផ្តល់ភាពជាដៃគូ កសាងហេដ្ឋារចនាសម្ព័ន្ធដល់ប្រទេសកំពុងអភិវឌ្ឍន៍ ប្រកបដោយតម្លាភាព និងនិរន្តរភាព ត្រឹមឆ្នាំ២០៣៥ ខាងមុខ។
អត្ថបទទាក់ទង!
យ៉ាងណាមិញគម្រោងខាងលើត្រូវបានមន្ត្រីជាន់ខ្ពស់នៃសេតវិមានអាមេរិក លើកឡើងចំៗថា គម្រោងនេះបង្កើតឡើងក្នុងគោលដៅដើម្បីទប់ទល់ នឹងប្រណាំងប្រជែងជាមួតយនឹងមហាយក្សចិន ដែលបាននិងកំពុងតែបង្កើនឥទ្ធិពលរបស់ខ្លួននៅស្ទើរទូទាំងពិភពលោកទៅហើយ តាមរយៈគម្រោង ផ្លូវមួយខ្សែក្រវាត់មួយ ដែលមាតម្លៃរាប់សិបពាន់ពាន់លានដុល្លាររបស់ខ្លួន។
សេតវិមានអាមេរិកឲ្យដឹងបន្តថា គម្រោង B3W មិនត្រឹមតែប្រើប្រាស់ដើម្បីទប់ទល់នឹងចិននោះទេ ប៉ុន្តែក៏ដើម្បីកៀងគេមូលនិធិពីវិស័យឯកជនសម្រាប់ប្រើប្រាស់ដោះស្រាយបញ្ហា អាកាសធាតុ សន្តិសុខ សុខាភិបាល បច្ចេកវិទ្យាឌីជីថល និងសមភាពយេឌ័រជាដើម។
យ៉ាងណាមិញ G7 នៅមិនទាន់ប្រកាសលម្អិតនៅឡើយទេ ថាតើគម្រោងនេះនឹងត្រូវចាយថវិកាប៉ុន្មាន ចាប់ផ្តើមនៅពេលណា និងដោយរបៀបណានោះ។
អត្ថបទគួរអាន!
ប៉ុន្តែបើគេក្រឡេកមើលទៅគម្រោងផ្លូវមួយខ្សែក្រវ៉ាត់មួយរបស់ចិនវិញ ឃើញថាគម្រោងមួយនេះបាននឹងកំពុងដំណើរការទៅយ៉ាងរលូន រាប់បញ្ចូលទាំងការកសាងហេដ្ឋារចនាសម្ព័ន្ធនានា ដូចជាផ្លូវថ្នល់ ផ្លូវដែក ផ្លូវល្បឿនលឿន កំពុងផែ និងដែលបានចាប់ផ្តើមឡើងតាំងពីឆ្នាំ២០១៣ នៅតាមប្រទេសពាសពេញពិភពលោករាប់ចាប់តាំងពីទ្វីបអាស៊ី ដល់អឺរ៉ុប ហើយកម្ពុជាយើងក៏ទទួលបានការវិនិយោគតាមរយៈគម្រោងនេះផងដែរ។
សូមបញ្ជាក់ថាគិតមកដល់បច្ចុប្បន្ន មានជាង១០០ប្រទេសក្នុងពិភពលោកហើយ ដែលបានចុះកិច្ចព្រមព្រៀងក្នុងគម្រោងផ្លូវមួយខ្សែក្រវ៉ាត់មួយរបស់ប្រទេសចិននេះ។ ថ្មីៗនេះដែរ ប្រទេសអូស្ត្រាលី ដែលជាមិត្តចាក់ទឹកមិនលិចរបស់អាមេរិក ក៏ទើបតែបានប្រកាសពីការផ្ដាច់ទំនាក់ទំនងជាមួយនឹងគម្រោងខ្សែក្រវាត់មួយ ផ្លូវមួយជាមួយនឹងប្រទេសចិនផងដែរ ដោយទង្វើនេះ បានធ្វើឲ្យក្រុងប៉េកាំងក្ដៅស្លឹកត្រចៀកយ៉ាងខ្លាំង។ មកទល់ពេលនេះ ជម្លោះរវាងអូស្ត្រាលីនិងចិន នៅតែបន្ដក្ដៅងុំដដែល មិនទាន់មានពន្លឺណាមួយថាអាចនឹងថយកម្ដៅមកវិញនៅឡើយទេ៕
None
