ការព្រមានចាត់វិធានការក្តៅនេះធ្វើឡើងក្នុងគោលបំណង ដើម្បីការពារផលប្រយោជន៍របស់អ្នកប្រើប្រាស់ និងសេដ្ឋកិច្ចជាតិ ក៏ដូចជាធានាភាពត្រឹមត្រូវក្នុងការប្រកួតប្រជែងក្នុងវិស័យប្រេងឥន្ធនៈ។
ឯកឧត្តម ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានគូសបញ្ជាក់ប្រាប់ខេមបូណូមីសថា ដើម្បីរួមចំណែកជួយការពារផលប្រយោជន៍របស់អ្នកប្រើប្រាស់ និងសេដ្ឋកិច្ចជាតិ ក៏ដូចជាធានាសុចរិតភាពក្នុងការប្រកបអាជីវកម្មក្នុងវិស័យប្រេងឥន្ធនៈ អគ្គនាយកដ្ឋាន ក.ប.ប នឹងបង្កើនការចុះត្រួតពិនិត្យ និងចាត់វិធានការកាន់តែធ្ងន់ធ្ងរជាងចំពោះម្ចាស់ស្ថានីយ និងដេប៉ូប្រេងឥន្ធនៈ ដែលប្រកបអាជីវកម្មមិនសុចរិតនៅឆ្នាំនេះ។ បើតាមការអះអាងរបស់ថ្នាក់ដឹកនាំរូបនេះ ម្ចាស់ស្ថានីយ និងដេប៉ូប្រេងឥន្ធនៈអាចប្រឈមនឹងការកសាងសំណុំរឿងទៅតុលាការ ដើម្បីអនុវត្តនីតិវិធីច្បាប់ ប្រសិនបើមន្ត្រីជំនាញនៃអគ្គនាយកដ្ឋាន ក.ប.ប រកឃើញនៅតែបន្តប្រព្រឹត្តល្មើសនឹងច្បាប់ និងបទប្បញ្ញត្តិក្នុងវិស័យប្រេងឥន្ធនៈ។
បើតាមការលើកឡើងរបស់ឯកឧត្តម ផាន អូន នៅក្នុងរយៈពេល២ខែ ដើមឆ្នាំ២០២៤ នេះ មន្រ្តីជំនាញនៃអគ្គនាយកដ្ឋាន ក.ប.ប. បានចុះត្រួតពិនិត្យនៅតាមបណ្តាស្ថានីយ និងដេប៉ូប្រេងឥន្ធនៈបានចំនួន១៥កន្លែង ដោយរកឃើញដេប៉ូចំនួន៤ បានប្រកបអាជីវកម្មមិនសុចរិត ក្រោមរូបភាពលក់បន្លំគុណភាព និងបរិមាណ។ ចំនួននេះហាក់មានការថយចុះបន្តិចបើធៀបនឹងរយៈពេលដូចគ្នាកាលពីឆ្នាំ ក៏ដោយសារនៅក្នុងខែមករា ដើមឆ្នាំនេះ មន្ត្រីជំនាញនៃអគ្គនាយកដ្ឋាន ក.ប.ប បានផ្អាកសកម្មភាពចុះត្រួតពិនិត្យនៅតាមស្ថានីយ និងប្រេងឥន្ធនៈសិន ដើម្បីរៀបចំផែនការថ្មីនៃការអនុវត្តពិន័យលើម្ចាស់ស្ថានីយ និងដេប៉ូប្រេងឥន្ធនៈ ដែលបន្តប្រព្រឹត្តបទល្មើស។
អត្ថបទគួរអាន
គួរបញ្ជាក់ថា កន្លងមកមន្ត្រីជំនាញនៃអគ្គនាយកដ្ឋាន ក.ប.ប បានចុះត្រួតពិនិត្យ និងអនុវត្តវិធានការវិន័យក្រោមរូបភាពធ្វើកិច្ចសន្យាណែនាំ និងពិន័យអន្តរការណ៍លើម្ចាស់ស្ថានីយ និងដេប៉ូប្រេងឥន្ធនៈ ដែលប្រកបអាជីវកម្មមិនសុចរិតក្នុងវិស័យប្រេងឥន្ធនៈយ៉ាងសស្រាក់សស្រាំក្នុងក្របខណ្ឌទូទាំងប្រទេស។ ប៉ុន្តែយើងនៅតែសង្កេតឃើញថា សកម្មភាពលក់ប្រេងឥន្ធនៈបន្លំគុណភាព និងបរិមាណរបស់ស្ថានីយ និងដេប៉ូប្រេងឥន្ធនៈនៅតែបន្តកើតមានជាហូរហែ។
បើតាមការគូសបញ្ជាក់របស់ឯកឧត្តម ផាន អូន នៅពេញមួយឆ្នាំ២០២៣ មន្ត្រីជំនាញនៃអគ្គនាយកដ្ឋាន ក.ប.ប បានចុះត្រួតពិនិត្យរង្វាស់រង្វាល់ និងគុណភាពនៅតាមស្ថានីយ និងដេប៉ូប្រេងឥន្ធនៈទូទាំងប្រទេសបានចំនួនជិត១ពាន់៧រយកន្លែង ក្នុងនោះមានស្ថានីយ និងដេប៉ូប្រេងឥន្ធនៈជិត២៥០កន្លែងត្រូវបានមន្ត្រីជំនាញនៃអគ្គនាយកដ្ឋាន ក.ប.ប. រកឃើញបានប្រកបអាជីវកម្មមិនសុចរិតតាមរយៈការលក់បន្លំគុណភាព និងបរិមាណ មានការថយចុះ២០% បើធៀបនឹងឆ្នាំ២០២២។
ការថយចុះបទល្មើសក្នុងវិស័យប្រេងឥន្ធនៈនេះ ត្រូវបានថ្នាក់ដឹកនាំរូបនេះ អះអាងថា គឺបន្ទាប់ពីមានការចុះអនុវត្តសកម្មភាពត្រួតពិនិត្យ និងចាត់វិធានការច្បាប់ដូចភ្លៀងរលឹមពីសំណាក់មន្ត្រីជំនាញនៃអគ្គនាយកដ្ឋាន ក.ប.ប គួបផ្សំការចុះអប់រំ និងផ្សព្វផ្សាយការយល់ដឹងអំពីច្បាប់ដល់ធុរជន និងការចូលរួមអនុវត្តច្បាប់យ៉ាងផុលផុសពីអ្នករកស៊ីក្នុងវិស័យប្រេងឥន្ធនៈនេះ។ សម្រាប់ឯកឧត្តម ផាន អូន ការធ្វើអាជីវកម្មមិនសុចរិតក្នុងវិស័យប្រេងឥន្ធនៈមិនត្រឹមតែប៉ះពាល់ដោយផ្ទាល់ដល់ជីវភាពរស់នៅប្រចាំថ្ងៃរបស់ប្រជាពលរដ្ឋប៉ុណ្ណោះទេ ថែមទាំងធ្វើឱ្យប៉ះពាល់ដល់គោលនយោបាយក្នុងការកាត់បន្ថយភាពក្រីក្ររបស់ប្រជាពលរដ្ឋ ដែលបានដាក់ចេញដោយរាជរដ្ឋាភិបាល និងការប្រកួតប្រជែងដោយស្មោះត្រង់ក្នុងការធ្វើពាណិជ្ជកម្មផងដែរ៕
None
