មែនទែនទៅ ដំណើរទស្សនកិច្ចក្នុងរយៈពេលមួយថ្ងៃរបស់លោក អូឡាហ្វ ស្កូល អធិការបតីអាល្លឺម៉ង់នេះ ត្រូវបានគេចាត់ថាជាដំណើរទស្សនកិច្ចដំបូងគេបំផុតរបស់មេដឹកនាំអឺរ៉ុបទៅកាន់ប្រទេសចិនចាប់តាំងពីការរាតត្បាតជំងឺកូវីត១៩ក្នុងប្រទេសចិន និងចាប់តាំងពីលោក ស៊ី ជីនពីង បានជាប់ជាអគ្គលេខាធិការបក្សកុម្មុយនិស្តចិនក្នុងអាណត្តិទី៣ដឹកនាំប្រទេសចិន។
ទោះជាយ៉ាងណា ការធ្វើដំណើររបស់លោក Scholz ធ្វើឡើងនៅចំពេលដែលមានការព្រួយបារម្ភកាន់តែខ្លាំងឡើងពីសំណាក់ប្រទេសលោកខាងលិចផ្សេងទៀត ជាពិសេសនៅពីសម្ព័ន្ធមិត្តសន្តិសុខកំពូលរបស់អាល្លឺម៉ង់ គឺសហរដ្ឋអាមេរិក ជុំវិញការអនុវត្តពាណិជ្ជកម្មរបស់ប្រទេសចិន និងការរំលោភសិទ្ធិមនុស្ស ព្រមទាំងមហិច្ឆតាកាន់តែគឃ្លើនឡើងរបស់ទីក្រុងប៉េកាំង។
គួររំលឹកថា ទំនាក់ទំនងពាណិជ្ជកម្មដ៏ស៊ីជម្រៅរវាងចិន និងអាល្លឺម៉ង់បានចងភ្ជាប់ប្រទេសទាំងពីរកាន់តែតឹងណែនផ្នែកសេដ្ឋកិច្ចដូចជាតម្រូវការរថយន្ត និងគ្រឿងម៉ាស៊ីនរបស់ប្រទេសអាល្លឺម៉ង់ ដែលជំរុញកំណើនសេដ្ឋកិច្ចយក្សអាល្លឺម៉ង់ក្នុងរយៈពេលពីរទសវត្សរ៍កន្លងមកនេះ ហើយប្រទេសចិនក៏បានក្លាយជាដៃគូពាណិជ្ជកម្មធំបំផុតតែមួយគត់របស់អាល្លឺម៉ង់ក្នុងឆ្នាំ២០១៦។
យោងតាមការស្ទង់មតិនាពេលថ្មីៗនេះដោយក្រុមអ្នករៀបចំគោលនយោបាយ បានរកឃើញថា ជិតពាក់កណ្តាលនៃក្រុមហ៊ុនឧស្សាហកម្មអាល្លឺម៉ង់ឥឡូវនេះពឹងផ្អែកលើធាតុចូលសំខាន់ៗពីប្រទេសចិន។
អត្ថបទគួរអាន
គេមិនអាចប្រកែកបានឡើយថា អាល្លឺម៉ង់បានរៀនសូត្រមិនតិចទេពីបទពិសោធន៍លើពឹងផ្អែកថាមពលលើប្រទេសរុស្ស៊ីដែលបាននាំនូវបញ្ហចាក់ស្រេះជាច្រើនចូលមកក្នុងប្រទេស ដែលធ្វើឱ្យរដ្ឋាភិបាលអាល្លឺម៉ង់មានការព្រួយាបារម្ភដូចគ្នាដែរទៅនឹងការពឹងផ្អែកលើប្រទេសចិន ដែលជាសម្ព័ន្ធមិត្តចាក់ទឹកមិនលិចរបស់រុស្ស៊ីនោះ។
រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានប្រាប់ទូរទស្សន៍ ARD ទាក់ទិននឹងប្រទេសចិនយ៉ាងដូច្នេះថា «វាមានសារៈសំខាន់ខ្លាំងណាស់ដែលអាល្លឺម៉ង់មិនត្រូវពឹងផ្អែកខ្លាំងលើប្រទេស ដែលមិនមានគុណតម្លៃរួម សូម្បីតែបន្តិចជាមួយប្រទេសយើងនោះទេ»។
ទោះជាបែបនេះក្តី បើតាមអ្នកនាំពាក្យរដ្ឋាភិបាលអាល្លឺម៉ង់បាននិយាយកាលពីសប្តាហ៍មុនថា នៅក្នុងដំណើរទស្សនកិច្ចទៅប្រទេសចិន លោក Scholz នឹងជួបជាមួយនាយករដ្ឋមន្ត្រីចិន លោក Li Keqiang និងប្រធានាធិបតីចិន លោក ស៊ី ជីនពីង ដើម្បីជំរុញឱ្យប្រទេសចិនបើកទីផ្សាររបស់ខ្លួន និងលើកឡើងពីការព្រួយបារម្ភអំពីបញ្ហាសិទ្ធិមនុស្ស ក៏ដូចជាទំនោរ «ផ្តាច់ការ» របស់ចិនជាដើម។
ហើយទន្ទឹមនឹងគ្នានោះ លោក Scholz នឹងត្រូវអមដំណើរដោយគណៈប្រតិភូនៃថ្នាក់ដឹកនាំអាជីវកម្មគ្រាក់ៗមួយចំនួនរបស់អាល្លឺម៉ង់ តែមន្ត្រីរដ្ឋាភិបាលអាល្លឺម៉ង់ម្នាក់បាននិយាយថា គ្មានកិច្ចព្រមព្រៀងអាជីវកម្មរបស់ក្រុមហ៊ុនណាមួយត្រូវបានគ្រោងទុកជាមុននោះទេ។
លើសពីនេះទៅទៀត ប្រភពរដ្ឋាភិបាលបារាំង និងអាល្លឺម៉ង់បានប្រាប់សាព័ត៌មាន រ៉យទ័រ ថាប្រធានាធិបតីបារាំងលោក Emmanuel Macron បានស្នើទៅលោក Scholz ថាលោកចង់ធ្វើដំណើររួមគ្នាទៅកាន់ទីក្រុងប៉េកាំង ដើម្បីបញ្ជូនសញ្ញានៃការរួបរួមរបស់សហភាពអឺរ៉ុបជាមួយចិន និងប្រឆាំងនឹងអ្វីដែលលោកមើលឃើញថា ជាការប៉ុនប៉ងរបស់ចិនក្នុងការលេងល្បែងជាមួយប្រទេសមួយប្រឆាំងនឹងប្រទេសមួយផ្សេងទៀត ប៉ុន្តែអធិការបតីអាល្លឺម៉ង់បានបដិសេធសំណើរបស់លោក ម៉ាក្រុង ទាំងស្រុង៕
