ក្រុមហ៊ុនផលិតថាមពលស្អាតនៅវៀតណាមព្រួយបារម្ភការដួលក្ស័យធន ដោយសារការធានាតម្លៃទីផ្សារពីរដ្ឋមានទាបពេក

ក្រុមហ៊ុនអភិវឌ្ឍថាមពលកកើតឡើងវិញចំនួន៣៦ក្រុមហ៊ុន មកទល់ពេលនេះ មិនបានបញ្ចប់គម្រោងរបស់ពួកគេបានទាន់ពេលវេលា សម្រាប់ទទួលបានការលើកទឹកចិត្តផ្នែកពន្ធរយៈពេល ២០ឆ្នាំ ដោយមានការធានាតម្លៃទីផ្សារថាមពលពីរដ្ឋាភិបាល ដែលបានស្នើឡើងដោយនាយករដ្ឋមន្ត្រី លោក ផាម មិញជីង ដើម្បីដោះស្រាយបញ្ហានៅក្នុងអត្រាពន្ធថ្មីនោះទេ។

អត្រាពន្ធថ្មីរបស់រដ្ឋាភិបាលវៀតណាមផ្ដល់ជូននេះ គឺត្រូវបានកំណត់ ក្នុងគោលដៅបន្ទាបតម្លៃថាមពលស្អាតឲ្យនៅទាបជាមុន។ ប៉ុន្ដែ ក្រុមហ៊ុនអ្នកអភិវឌ្ឍថាមពលស្អាតភាគច្រើន ហាក់មិនសប្បាយចិត្តនឹងវិធានការថ្មីរបស់រដ្ឋាភិបាលនោះទេ។

តួយ៉ាង មានគម្រោងថាមពលកកើតឡើងវិញសរុបចំនួន ៨៤គម្រោង ដែលមានកម្លាំងថាមពលសរុប ជាង៤ពាន់៦រយមេហ្គាវ៉ាត់ នឹងធ្លាក់ចុះនៅក្រោមអត្រាពន្ធថ្មី ដែលកំណត់ដោយរដ្ឋ ហើយក្នុងនោះ មានគម្រោងចំនួន៣៤ បានបញ្ចប់គម្រោងរួចរាល់ហើយ។

ទោះយ៉ាងណា សម្រាប់អត្រាពន្ធលើកទឹកចិត្តថ្មី គឺមានការផ្ដល់ជូនទាបជាងអ្វីដែលធ្លាប់មានកាលពីមុនទៅទៀត ដូច្នេះហើយ ទើបធ្វើឲ្យក្រុមហ៊ុនទាំងនោះ បារម្ភពីការខាតបង់ និងធ្វើឲ្យពួកគេភាគច្រើនស្ទាក់ស្ទើរក្នុងការបញ្ចប់គម្រោងរបស់ខ្លួន។

យ៉ាងណាមិញ សម្រាប់គម្រោងចំនួន៣៤ ដែលបានបញ្ចប់រួចរាល់ គឺទទួលបានការវិនិយោគសរុបប្រមាណជិត ៣ពាន់៦រយលានដុល្លារ ដែលក្នុងនោះ មាន ៦៨% គឺជាប្រាក់កម្ចីពីធនាគារ។ ដូច្នេះហើយ នៅពេលដែលការលក់អគ្គិសនីទៅឲ្យរដ្ឋក្នុងតម្លៃទាបពេក នោះវានឹងធ្វើក្រុមហ៊ុនអភិវឌ្ឍថាមពលស្អាតទាំងនោះ មិនអាចទូទាត់សងការប្រាក់ទៅកាន់ធនាគារវិញបានទេ ហើយកត្តានេះ វានឹងអាចរុញឲ្យក្រុមហ៊ុនដួលរលំ។ សូមបញ្ជាក់ថា កន្លងមកក្រុមហ៊ុនអភិវឌ្ឍន៍ថាមពលកកើតឡើងវិញចំនួន ៣៦ក្រុមហ៊ុន បានស្នើឱ្យក្រសួងឧស្សាហកម្ម និងពាណិជ្ជកម្មវៀតណាម ជួលអ្នកប្រឹក្សាឯករាជ្យ ដើម្បីវាយតម្លៃពន្ធគយ និងបានស្នើសុំឲ្យមានការផ្ដល់ជូនថ្មី និងសមស្របជាងនេះ៕