អាល្លឺម៉ង់ និងជប៉ុនចាប់ដៃគ្នាកាន់តែជិតស្និទ្ធិផ្ដោតទៅលើសន្តិសុខ និងសេដ្ឋកិច្ច

អធិការបតីអាល្លឺម៉ង់លោក អូឡាហ្វ សូល (Olaf Scholz) អមដំណើរដោយរដ្ឋមន្ត្រីចំនួន ៦ រូបទៀត បានធ្វើដំណើរទស្សនកិច្ចនៅប្រទេសជប៉ុនថ្មីៗនេះ កំពុងតែសម្លឹងរកមើលមធ្យោបាយមួយចំនួនក្នុងការកាត់បន្ថយការពឹងផ្អែករបស់អាល្លឺម៉ង់លើវត្ថុធាតុដើមរបស់ប្រទេសចិន។

លោក Scholz បាននិយាយនៅក្នុងសន្និសីទសារព័ត៌មានបន្ទាប់ពីកិច្ចពិភាក្សាជាមួយសមភាគីជប៉ុនថា ការលុកលុយរបស់ប្រទេសរុស្ស៊ីលើប្រទេសអ៊ុយក្រែនក៏ដូចជាជំងឺរាតត្បាតកូវីដ១៩បានធ្វើឱ្យពួកគេដឹងយ៉ាងឈឺចាប់ ពីការលំបាកដែលអាចកើតឡើងនៅពេលមានការពឹងផ្អែកផ្នែកសេដ្ឋកិច្ចច្រើនពេកនៅក្នុងតំបន់សំខាន់ៗមួយចំនួន។

លោក Scholz បានបន្ថែមថា អាល្លឺម៉ង់ត្រូវតែប្រតិកម្មចំពោះបញ្ហានេះ ហើយដោយរួមគ្នាជាមួយប្រទេសជប៉ុន និងដៃគូផ្សេងទៀតនោះ អាល្លឺម៉ង់កំពុងធ្វើការលើការទាញសេចក្តី សន្និដ្ឋានឱ្យបានត្រឹមត្រូវចេញពីបទពិសោធន៍ទាំងអស់នេះ។

នៅក្នុងសេចក្តីថ្លែងការណ៍រួម ប្រទេសទាំង២នេះបានបញ្ជាក់ពីចេតនារបស់ពួកគេក្នុងការពង្រឹងកិច្ចសហប្រតិបត្តិការលើសន្តិសុខសេដ្ឋកិច្ច និងធ្វើការឆ្ពោះទៅរកការបង្កើត«ក្របខ័ណ្ឌច្បាប់សម្រាប់សកម្មភាពកិច្ចសហប្រតិបត្តិការការពារជាតិ និងសន្តិសុខទ្វេភាគីដូចជាការផ្តល់ជំនួយ និងការគាំទ្រផ្នែកភស្តុភារជាដើម។

នាយករដ្ឋមន្ត្រីជប៉ុនលោក Fumio Kishida បាននិយាយថា ប្រទេសអាល្លឺម៉ង់ និងជប៉ុនមានបំណងជំរុញកិច្ចសហប្រតិបត្តិការ«នៅក្នុងវិស័យយុទ្ធសាស្ត្រមួយចំនួនរួមមាន ធនធានរ៉ែ បន្ទះឈីប និងអាគុយ ហើយចែករំលែកការអនុវត្តល្អបំផុតរបស់ពួកគេ ដើម្បីទប់ទល់នឹងហានិភ័យដើម្បីកសាងខ្សែចង្វាក់ផ្គត់ផ្គង់រឹងមាំប្រកបដោយសុវត្ថិភាព និងនិរន្តរភាព»។

ចិនចង់ងាកចេញពីខ្សែចង្វាក់ផ្គត់ផ្គង់ពីចិន ក៏ដោយសារតែពាណិជ្ជកម្មរវាងប្រទេសយក្សសេដ្ឋកិច្ចទាំងពីនេះមានការដោះដូរពាណិជ្ជកម្មរវាងគ្នាកាន់តែច្រើន ដោយក្នុងនោះមហាយក្សចិនបានក្លាយជាដៃគូពាណិជ្ជកម្មដ៏សំខាន់បំផុតរបស់អាល្លឺម៉ង់រយៈពេល៧ឆ្នាំជាប់ៗគ្នាមកនេះ ទោះជាមានការព្រមានខាងនយោបាយពីទីក្រុងប៊ែរឡាំងអំពីការពឹងផ្អែកខ្លាំងពេកទៅលើចិនក៏ដោយ។

យោងតាមទិន្នន័យពីការិយាល័យស្ថិតិអាល្លឺម៉ង់បានឱ្យដឹងថា ទំហំពាណិជ្ជកម្មលើទំនិញរវាងអាល្លឺម៉ង់និងចិនមានតម្លៃប្រហែល ៣២១ ពាន់លានដុល្លារអាមេរិកនៅក្នុងឆ្នាំ២០២២ គឺបានកើនឡើងប្រហែល ២១% បើធៀបនឹងឆ្នាំ២០២១។

ដោយឡែក ប្រទេសជប៉ុនវិញ គឺជាដៃគូពាណិជ្ជកម្មដ៏ធំជាងគេបំផុតទី២របស់អាល្លឺម៉ង់នៅក្នុងតំបន់អាស៊ី បន្ទាប់ពីចិន ៕