ចិនព្រមានជប៉ុន និងហ្វីលីពីន ដែលគ្រោងជួបចរចាគ្នាជុំវិញបញ្ហាដែនសមុទ្រមានជម្លោះ

សារព័ត៌មាន the Strait Times បានរាយការណ៍ថា ចិនបានព្រមានផ្នែកច្បាប់ប្រឆាំងនឹងប្រទេសជប៉ុន និងហ្វីលីពីនជុំវិញការចរចាពាក់ព័ន្ធជម្លោះព្រំដែនសមុទ្រនាពេលខាងមុខ ក្រោយប្រទេសទាំងពីរ ព្យាយាមប្រឆាំងនឹងការអះអាងពីភាពជាម្ចាស់របស់កងទ័ពជើងទឹកទីក្រុងប៉េកាំងនៅក្នុងតំបន់ជម្លោះ។ ក្រសួងធនធានធម្មជាតិចិនបានលើកឡើងថា ការពិភាក្សាដែលបានគ្រោងទុករវាងហ្វីលីពីន និងជប៉ុន កំពុងបង្កើតជាទង្វើខុសច្បាប់អន្តរជាតិ ហើយចិនបានជំរុញឱ្យប្រទេសទាំងពីរចាប់ផ្តើមចរចាជាមួយទីក្រុងប៉េកាំង។

ចិនបានចាត់ទុក ការចរចានេះគឺខុសច្បាប់ ព្រោះវាត្រូវបានផ្តួចផ្តើមដោយគ្មានការពិគ្រោះយោបល់ជាមួយចិន។ ទន្ទឹមនឹងនេះ ចិនក៏បានព្រមានមហាអំណាចខាងក្រៅឲ្យបញ្ជៀសហានិភ័យនយោបាយ តាមរយៈការជួយ ឬទទួលស្គាល់លទ្ធផល នៃកិច្ចចរចានោះផងដែរ។

អ្នកវិភាគបានលើកឡើងថា ការអះអាងបែបនេះ គឺជាជំហរបញ្ជាក់ពីការមិនពេញចិត្តកាន់តែខ្លាំងឡើងរបស់ទីក្រុងប៉េកាំង ចំពោះការសម្រេចចិត្តរបស់ទីក្រុងម៉ានីល និងទីក្រុងតូក្យូ ក្នុងការចាប់ផ្តើមកិច្ចចរចាព្រំដែនសមុទ្រ ដែលពាក់ព័ន្ធនឹងដែនទឹកនៅភាគខាងកើត នៃកោះតៃវ៉ាន់។ ក្រោយមកចិនបានបញ្ជូននាវាឆ្មាំសមុទ្រឱ្យល្បាតតំបន់នោះ ក៏ដូចជានាវាស្ទង់មតិ ដើម្បីគូសផែនទីបាតសមុទ្រ។

ជុំវិញបញ្ហានេះសារព័ត៌មានចិន CGTN បានរាយការណ៍ថា ការពិភាក្សាអំពីបញ្ហាព្រំដែនរវាងជប៉ុន និងហ្វីលីពីនលើព្រំដែនសមុទ្រ គឺជាការរំលោភលើច្បាប់អន្តរជាតិ។ ទន្ទឹមនឹងនេះ ចិនទាមទារឱ្យជប៉ុន និងហ្វីលីពីនឱ្យបញ្ឈប់កិច្ចចរចា និងចូលរួមក្នុងការពិគ្រោះយោបល់ជាមួយប្រទេសចិន។ យ៉ាងណាមិញ ចិនក៏បានព្រមានប្រទេសទាំងពីរកុំឱ្យរំលោភនឹងគោលការណ៍ចិនតែមួយក្រោមលេស នៃការកំណត់ព្រំដែន៕