បើតាមអាជីវករលក់មាសពេជ្រ និងអ្នកជំនាញទីផ្សារជួញដូរមាស ការកើនឡើងតម្លៃមាសនៅកម្ពុជានេះ កើតឡើងបន្ទាប់ពីតម្រូវការមាសនៅលើទីផ្សារអន្តរជាតិ មានការកើនឡើង និងជាពិសេសដោយសារការធ្លាក់ថ្លៃលុយដុល្លារអាម៉េរិក ក្រោយធនាគារកណ្តាលអាម៉េរិក គ្រោងប្រកាសពីការកាត់បន្ថយអត្រាការប្រាក់របស់ខ្លួន។ ជាមួយគ្នានេះ ក្រុមអ្នកជំនាញជឿជាក់ថា តម្លៃមាសនៅកម្ពុជា និងលើពិភាពលោក នឹងបន្តកើនឡើងបន្តទៀតរហូតដល់២៧០០ដុល្លារក្នុង១តម្លឹង។
ម្ចាស់ហាងមាសពេជ្រទីមង្គល កត់សម្គាល់ឃើញថា តម្លៃមាសនៅកម្ពុជា បានហក់ឡើងថ្លៃខ្ពស់ជាបន្តបន្ទាប់នៅពីរសប្តាហ៍ចុងក្រោយនេះ ជាក់ស្តែងបច្ចុប្បន្នហាងឆេងមាសនៅហាងរបស់លោក លក់ចេញក្នុងតម្លៃប្រមាណជាង២៦០០ដុល្លារ ក្នុង១តម្លឹង កើនឡើងជាង១០០ដុល្លារក្នុង១តម្លឹង បើធៀបនឹងតម្លៃលក់ចេញកាលពីខែមុន ដែលមានតម្លៃត្រឹមតែប្រមាណជាង២៤០០ដុល្លារក្នុង១តម្លឹងប៉ុណ្ណោះ។
អត្ថបទគួរអាន
តម្លៃមាសកើនឡើងយ៉ាងគំហុកនេះ ត្រូវបានម្ចាស់ហាងមាសរូបនេះវាយតម្លៃថា គឺបណ្តាលមកពីឥទ្ធិពលនៃការធ្លាក់ចុះរបស់តម្លៃប្រាក់ដុល្លារអាម៉េរិក និងគួបផ្សំឥទ្ធិពលនៃវិបត្តិសកល និងបញ្ហាសង្រ្គាមផងដែរ។ យ៉ាងណាមិញ ក្រោយទីផ្សារមាសឡើងថ្លៃ នៅ២សប្តាហ៍មកនេះ ម្ចាស់ហាងមាសពេជ្ររូបនេះ កត់សម្គាល់ឃើញថា ចរន្តទិញលក់មាសនៅហាងរបស់លោក ក៏មានភាពមមាញឹកផងដែរ ពិសេសអតិថិជនដែលយកមាសមកលក់តែម្តង។
ពាក់ព័ន្ធតម្លៃមាសកើនឡើងនេះដែរ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី បានគូសបញ្ជាក់ថា តម្លៃមាសនៅកម្ពុជា និងពិភពលោកពិតជាបានហក់ឡើងថ្លៃខ្ពស់ខ្លាំងពិតមែននៅរយៈពេលពីរសប្តាហ៍មកនេះ ហើយលោកជឿជាក់ថា តម្លៃមាសនឹងមានទំនោរឡើងខ្ពស់បន្ថែមទៀត ពោលគឺបច្ចុប្បន្នមាសនៅទីផ្សារកម្ពុជា មានតម្លៃប្រមាណជាង២៦០០ដុល្លារក្នុង១តម្លឹង ហើយនឹងអាចកើនដល់ជាង២៧០០ដុល្លារ ក្នុង១តម្លឹងនៅពេលខាងមុខនេះ។ បើតាមអ្នកជំនាញរូបនេះ កត្តាដែលធ្វើឱ្យតម្លៃមាសនៅកម្ពុជា និងពិភពលោកមានការកើនឡើងនេះ ក៏ដោយសារតម្រូវការបញ្ជាទិញមាសនៅលើពិភពលោកមានការកើនឡើង ពិសេសដោយសារធនាគារកណ្តាលអាម៉េរិក គ្រោងប្រកាសពីការកាត់បន្ថយអត្រាការប្រាក់របស់ខ្លួន។
សូមជម្រាបថា តម្លៃហាងឆេងមាសនៅលើទីផ្សារពិភពលោកបច្ចុប្បន្ន មានតម្លៃប្រមាណជាង២,១៧០ដុល្លារក្នុង១អោន ដោយមួយអោនស្មើនឹងជិត៨ជីមាស ដែលបានកើនឡើងពីតម្លៃជាង១,៩០០ ដុល្លារក្នុង១អោន កាលពីពីរសប្តាហ៍មុន៕
None
