អ្នកជំនាញជឿជាក់ថា ការប្រើប្រាស់រថយន្តអគ្គិសនីនៅកម្ពុជានឹងមានការរីកចម្រើនខ្លាំង ប្រសិនបើហេដ្ឋារចនាសម្ព័ន្ធបម្រើឲ្យវិស័យនេះមានការរីកដុះដាលខ្លាំងទូទាំងប្រទេសនាពេលអនាគត។ ប៉ុន្តែអ្នកជំនាញមើលឃើញថា វាអាចនឹងជួបការលំបាកមួយចំនួននៅពេលដំណើរការដំបូង ដោយសារអ្នកប្រើប្រាស់មួយចំនួនពុំដែលស្គាល់ និងខ្វះការយល់ដឹងលើបញ្ហានេះ។
បណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា បានចាត់ទុកការរៀបចំគោលនយោបាយខាងលើនេះថា ការជាការគិតគូមួយរបស់រាជរដ្ឋាភិបាលកម្ពុជា ក៏ដូចជាភាគីពាក់ព័ន្ធក្នុងការរួមចំណែកជួយកាត់បន្ថយការចំណាយលើការប្រើប្រាស់របស់ពលរដ្ឋ និងផលប៉ះពាល់នានាមកលើបរិស្ថាន។ មួយវិញទៀត វាជាជំហានមួយរបស់កម្ពុជាក្នុងការដើរឲ្យទាន់ពិភពលោកលើវិស័យយានយន្តនេះ។ អ្នកជំនាញរូបនេះ ជឿជាក់ថា ការប្រើប្រាស់ និងលំហូរនៃការនាំចូលរថយន្តដើរដោយថាមពលអគ្គិសនីនៅកម្ពុជានឹងមានការកើនឡើងខ្លាំង ប្រសិនបើហេដ្ឋារចនាសម្ព័ន្ធដូចជាកន្លែងសាកអាគុយ ការបម្រើសេវាកម្ម និងលក់គ្រឿងបន្លាស់ជាដើមមានការរីកដុះដាលខ្លាំង។អត្ថបទគួរអាន
ជាមួយគ្នានេះ លោក ងន សាំង នាយកក្រុមហ៊ុន RMA Cambodia ដែលជាក្រុមហ៊ុនមេនាំចូលរថយន្ដ Ford មកកម្ពុជា យល់ឃើញស្រដៀងគ្នាថា ការគាំទ្ររបស់រាជរដ្ឋាភិបាលនេះ វាជាការចាប់ផ្តើមមួយ ដើម្បីអភិវឌ្ឍកម្ពុជាឲ្យស្របតាមទំនោររបស់ប្រទេសលើពិភពលោក ដែលកំពុងងាកមកប្រើប្រាស់រថយន្តអគ្គិសនី ដើម្បីកាត់បន្ថយការបញ្ចេញឧស្ម័នពុលទៅលើបរិយាកាស។ លោកងន សាំង សង្កេតឃើញថា និន្នាការប្រើប្រាស់រថយន្តអគ្គិសនីនៅលើពិភពលោក ក៏ពុំទាន់មានភាពទូលំទូលាយនោះដែរ ខណៈបច្ចុប្បន្នការនាំចូលរថយន្តអគ្គិសនីមកកម្ពុជានៅមានចំនួនតិចតួចនៅឡើយបើធៀបនឹងរថយន្តប្រើប្រាស់ប្រេងឥន្ធនៈ។ អ្នកជំនាញរូបនេះជឿជាក់ថា ការលក់ និងប្រើប្រាស់រថយន្តអគ្គិសនីនៅកម្ពុជាបច្ចុប្បន្នអាចជួបការលំបាក ដោយសារកម្ពុជាពុំមានហេដ្ឋារចនាសម្ព័ន្ធគ្រប់គ្រាន់។
នាជំនួបជាមួយមន្ត្រីទូតបរទេសនានាប្រចាំនៅកម្ពុជាកាលពីពេលថ្មីៗឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា ឯកឧត្តមកំពុងរៀបចំគោលនយោបាយ និងការគាំទ្រសម្រាប់ការប្រើប្រាស់រថយន្តដើរដោយអគ្គិសនី។ ជាមួយគ្នានេះ ក្រសួងសាធារណការ ក៏នឹងគិតគូរៀបចំឲ្យមានហេដ្ឋារចនាសម្ព័ន្ធដូចជាស្ថានីយ៍សាកអាគុយ កន្លែងផ្តល់សេវាកម្ម គ្រឿងបន្លាស់ កន្លែងបណ្តុះបណ្តាលបុគ្គិល និងកន្លែងបោះអាគុយចោលជាដើម។
ជាមួយគ្នានេះឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គិសនីកម្ពុជាបានអះអាងថា អគ្គិសនីកម្ពុជារីករាយក្នុងការសហការផ្គត់ផ្គង់អគ្គិសនី និងបណ្តាញអគ្គិសនីជាមួយគោលនយោបាយជំរុញការប្រើប្រាស់រថយន្តអគ្គិសនីជាមួយរាជរដ្ឋភិបាល។ ឯកឧត្តមបានបន្ថែមថា បច្ចុប្បន្នកម្ពុជាមានថាមពលកកើតឡើងវិញនៅក្នុងបណ្ដាញចែកចាយអគ្គិសនីកម្ពុជាចំនួន៩% និងកើនដល់១០% នាពេលខាងមុខ ដែលជាចំនួនមួយល្អ។ ខណៈការផ្គត់ផ្គង់អគ្គិសនីដើរដោយថាមពលកកើតឡើងវិញ ក្នុងកម្រិតពិភពលោកគិតជាមធ្យមមានប្រហែលពី៤% ទៅ ៥% តែប៉ុណ្ណោះ៕None
