បើគ្មានការប្រែប្រួលទេប្រជាពលរដ្ឋរស់នៅរាជធានីភ្នំពេញនឹងទទួលបានផ្លូវរថភ្លើងក្រោមដី លើដី ឬលើអាកាសសម្រាប់ប្រើប្រាស់នាពេលខាងមុខនេះ។ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា មកទល់ពេលនេះ គម្រោងទាំងនេះ ត្រូវបានសិក្សាចប់ហើយ និងគ្រោងដាក់ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាពិនិត្យសម្រេចជ្រើសរើសយកគម្រោងណាមួយក្នុងចំណោមគម្រោងទាំង៣នៅពេលឆាប់ៗខាងមុខនេះ ខណៈបច្ចុប្បន្នក្រសួងសាធារណការ និងដឹកជញ្ជូនកំពុងឲ្យក្រុមហ៊ុនសិក្សាកែតម្រូវលើចំណុចខ្វះខាតមួយចំនួន។
ឯកឧត្តមទេសរដ្ឋមន្ត្រីបានគូសបញ្ជាក់ទៀតថា ក្រោយប្រមុខរាជរដ្ឋាភិបាលពិនិត្យជ្រើសរើសរួច កម្ពុជានឹងស្វែងរកក្រុមហ៊ុនឯកជនជាតិ និងអន្តរជាតិដើម្បីអភិវឌ្ឍគម្រោងនេះ ដ្បិតរាជរដ្ឋាភិបាលមិនចង់ចំណាយថវិកាជាតិទាំងស្រុងលើគម្រោងនេះនោះទេ ពោលគឺចង់ឲ្យមានការវិនិយោគរួមគ្នារវាងរដ្ឋ និងវិស័យឯកជន។ បើតាមការវាយតម្លៃរបស់ថ្នាក់ដឹកនាំក្រសួងសាធារណការ គម្រោងនេះអាចនឹងបើកការដ្ឋានសាងសង់នៅអាណត្តិរាជរដ្ឋាភិបាលក្រោយនេះតែម្ដង។ តែយ៉ាងណាឯកឧត្តមមិនបានបញ្ជាក់ទេថា គម្រោងនេះគ្រោងចំណាយថវិកាប៉ុន្មាននោះទេ។
អត្ថបទគួរអាន
ក្រៅពីគម្រោងផ្លូវរថភ្លើងទាំងនេះ កម្ពុជាក៏កំពុងសិក្សាផ្លូវរថភ្លើងល្បឿនលឿនចំនួនពីរខ្សែទៀតផងដែរ ដោយខ្សែទី១ចេញពីប៉ោយប៉ែតមកភ្នំពេញភ្ជាប់ទៅខេត្តព្រះសីហនុ និងខ្សែទី២ពីប៉ោយប៉ែតមកសៀមរាបភ្ជាប់ទៅកំពង់ធំ កំពង់ឆ្នាំងមករាជធានីភ្នំពេញឆ្ពោះទៅបាវិត-ម៉ុកបៃហូជីមិញ។ បន្ថែមលើនេះកម្ពុជាក៏កំពុងសិក្សាលើគម្រោងផ្លូវល្បឿនលឿនពីភ្នំពេញទៅសៀមរាប ផ្លូវភ្ជាប់ពីបាត់ដំបងទៅសៀមរាប ពីកំពង់ធំទៅកំពង់ឆ្នាំង និងគម្រោងហេដ្ឋារចនាសម្ព័ន្ធជាច្រើនទៀត។
លើសពីនេះកម្ពុជាកំពុងសហការជាមួយក្រុមហ៊ុន YCH របស់សិង្ហបុរីអភិវឌ្ឍន៍មជ្ឈមណ្ឌលភស្តុភារកម្មភ្នំពេញ និងកំពុងសហការជាមួយធនាគារពិភពលោកសិក្សាសលើគម្រោងមជ្ឈមណ្ឌលភស្តុភារកម្មក្រុងព្រះសីហនុ និងគម្រោងជីកព្រែកពង្រីកការដឹកជញ្ជូនទំនិញតាមទន្លេបាសាក់ផងដែរ។ គោលបំណងនៃការអភិវឌ្ឍន៍គម្រោងហេដ្ឋារចនាសម្ព័ន្ធទាំងនេះ គឺដើម្បីធ្វើឲ្យប្រព័ន្ធដឹកជញ្ជូននៅកម្ពុជាឲ្យកាន់តែមានភាពល្អប្រសើរទាំងពេលវេលា និងការចំណាយថវិកា សំដៅទាក់ទាញការវិនិយោគ ក៏ដូចជាប្រកួតប្រជែងជាមួយប្រទេសក្នុងតំបន់៕
