មជ្ឈមណ្ឌលទេសចរណ៍អន្តរជាតិហុងកុងបានចាប់ផ្តើមយុទ្ធនាការមួយនេះ ដើម្បីជួយទាក់ទាញភ្ញៀវទេសចរមកពីជុំវិញពិភពលោក។ ហុងកុងបានសហការជាមួយ ក្រុមហ៊ុនអាកាសចរមួយចំនួនដូចជា ក្រុមហ៊ុន Cathay Pacific, HK Express និង Hong Kong Airlines ជាដើម ក្នុងការចែកសំបុត្រយន្តហោះទៅមកដោយឥតគិតថ្លៃចំនួន ៥០ម៉ឺនសំបុត្រ។
បន្ថែមពីលើការផ្ដល់ជូនសំបុត្រដោយឥតគិតថ្លៃ អ្នកដំណើរក៏អាចមានឱកាសឈ្នះបណ្ណបញ្ចុះតម្លៃសម្រាប់ការទទួលទានអាហារនៅតាមភោជនីយដ្ឋាននានា បណ្ណបញ្ចុះតម្លៃសម្រាប់ការទិញទំនិញ និងការចូលទស្សនានៅសារមន្ទីរផ្សេងៗក្នុងទីក្រុងហុងកុងទៀតផង។
គួរជម្រាបដែរថា បច្ចុប្បន្នទីក្រុងហុងកុងកំពុងតែបម្រាស់ខ្លួនចេញពីការធ្លាក់ចុះនូវចំនួនភ្ញៀវទេសចរដ៏ច្រើនដោយសារជំងឺរាតត្បាតកូវីដ-១៩។ ស្របពេលនេះដែរ ច្បាប់ក្នុងការចេញចូលទីក្រុងហុងកុងក៏ត្រូវបានបន្ធូរបន្ថយផងដែរ ដែលនេះរឹតតែបង្កើនក្ដីសង្ឃឹមសម្រាប់ហុងកុងក្នុងការទាក់ទាញភ្ញៀវទេសចរមកវិញ។ ពីមុនមកអ្នកដែលចង់ចូលមកក្នុងទីក្រុងហុងកុងត្រូវបានតម្រូវឱ្យស្នាក់នៅក្នុងសណ្ឋាគារដាច់ដោយឡែកសិន ជាមួយនឹងតម្រូវការឲ្យធ្វើតេស្ត PCR។
សូមរំឭកថា កាលពីឆ្នាំ២០១៩ ទីក្រុងហុងកុងទទួលបានភ្ញៀវទេសចរចំនួន៥៦លាននាក់ ដែលស្មើនឹង៧ដងនៃ ចំនួនប្រជាជនចំនួនសរុបក្នុងទីក្រុងទៅហើយ។ បើយោងតាមទិន្នន័យបណ្តោះអាសន្នរបស់រដ្ឋបាលពិសេសហុងកុង ផលិតផលក្នុងស្រុកសរុបរបស់ហុងកុងក្នុងឆ្នាំ ២០២២ បានធ្លាក់ចុះ ៣,៥% ធៀបនឹងឆ្នាំ២០២១។
សូមជម្រាបថាយុទ្ធនាការ «Hello Hong Kong» នឹងចាប់ផ្ដើមដាក់ឱ្យដំណើរការនៅក្នុងខែមិនាសម្រាប់តំបន់អាស៊ីអាគ្នេយ៍ ក្នុងខែមេសាសម្រាប់ចិនដីគោក ហើយនឹងបន្តទៅកាន់តំបន់ផ្សេងៗទៀតក្នុងរយៈពេលប៉ុន្មានខែខាងមុខនេះ។ ចំណែកនៅក្នុងខែឧសភា យុទ្ធនាការនេះនឹងចាប់អនុវត្ត ទៅកាន់ប្រទេសក្នុងតំបន់អាស៊ីខាងជើង កាណាដា និងសហរដ្ឋអាមេរិកផងដែរ៕
