ហុងកុង ប្តេជ្ញាធ្វើជាស្ពានភ្ជាប់សេដ្ឋកិច្ច និង ការវិនិយោគរវាងតំបន់អាស៊ាន និងមហាតំបន់ឆ្នេរចិន ​

នៅក្នុងកិច្ចប្រជុំកំពូលអាស៊ាន និងមហាតំបន់ឆ្នេរចិន ឆ្នាំ២០២៦ នាថ្ងៃទី៣០ ខែមិថុនា លោក ចន លី កាឈីវ (John Lee Ka-chiu) មេដឹកនាំរដ្ឋបាលហុងកុង បានប្រកាសថា ហុងកុង ប្តេជ្ញាក្លាយជាច្រកទ្វារយុទ្ធសាស្ត្រ ដើម្បីកសាងភាពជាដៃគូសេដ្ឋកិច្ចដ៏មានឥទ្ធិពល និងបំពេញបន្ថែមឱ្យគ្នាទៅវិញទៅមកជាមួយតំបន់អាស៊ាន។

ក្រុមអ្នកវិភាគបានលើកឡើងថា កិច្ចប្រជុំកំពូល ដែលប្រមូលផ្តុំដោយមន្ត្រីរដ្ឋាភិបាល និងថ្នាក់ដឹកនាំធុរកិច្ចជាន់ខ្ពស់នាពេលនេះ គឺជាផ្នែកមួយ នៃផែនការយុទ្ធសាស្ត្ររបស់ទីក្រុងប៉េកាំង ក្នុងការប្រែក្លាយកោះហុងកុង ម៉ាកាវ និងទីក្រុងធំៗចំនួន៩ផ្សេងទៀតរបស់ចិន ឱ្យក្លាយជាមហាអំណាចសេដ្ឋកិច្ចបច្ចេកវិទ្យា ដ៏រស់រវើកនៅលើឆាកអន្តរជាតិ។

លោក ចន លី បានសង្កត់ធ្ងន់ថា ក្នុងនាមជាកំពង់ផែសេរីឈានមុខគេលំដាប់ពិភពលោក ហុងកុង មានឧត្តមភាពដាច់គេក្នុងការធ្វើឱ្យលំហូរពាណិជ្ជកម្ម ការវិនិយោគ និងនវានុវត្តន៍រវាងប្លុកសេដ្ឋកិច្ចទាំងពីរ ដើរទៅមុខដោយរលូន និងបង្កើតផលប្រយោជន៍ដ៏មហាសាលរួមគ្នា។

គួររំលឹកថា អាស៊ាន គឺជាដៃគូពាណិជ្ជកម្មធំជាងគេលំដាប់ទីពីររបស់ហុងកុង ក្នុងរយៈពេល១៦ឆ្នាំចុងក្រោយនេះ។ ជាក់ស្តែងកាលពីឆ្នាំ២០២៥ ទំហំពាណិជ្ជកម្មទ្វេភាគីរវាងហុងកុង និងអាស៊ាន បានហក់ឡើងដល់ប្រមាណ ២១៤ពាន់លានដុល្លារអាម៉េរិក ពោលគឺកើនឡើងរហូតដល់២៩% ខណៈបច្ចុប្បន្ន មានក្រុមហ៊ុនមកពីបណ្តាប្រទេសអាស៊ានប្រហែល៨៣០ក្រុមហ៊ុនកំពុងបើកប្រតិបត្តិការអាជីវកម្មយ៉ាងជោគជ័យនៅលើទឹកដីកោះហុងកុង៕

ដោយៈ សរ សុជាតិ