ភោជនីយដ្ឋាន និងអ្នកលក់រាយតូចៗរាប់រយបានព្រមានថា អាជីវកម្មរបស់ពួកគេត្រូវបិទជាច្រើនខែ ហើយផ្សារទំនើបនានាត្រូវបានផ្អាកដំណើរការ ខណៈពេលដែលទីក្រុងបានស៊ូជម្នះនឹងការផ្ទុះឡើងនៃជំងឺកូវីដ១៩ដ៏អាក្រក់បំផុតរហូតមកទល់ពេលនេះ។
នៅក្នុងសំណើកញ្ចប់ថវិកាឆ្នាំ២០២២-២០២៣ របស់រដ្ឋបាលហុងកុងដែលទើបប្រកាសឡើងនេះ ការចំណាយសរុបមានបានគេប៉ាន់ប្រមាណថាមានចំនួនជាង ១០០ពាន់លានដុល្លារអាមេរិក ហើយប្រាក់ចំណូលត្រូវបានប៉ាន់ប្រមាណថានឹងមានប្រមាណ ៩២ពាន់លានដុល្លារអាមេរិកប៉ុណ្ណោះ។លេខាធិការហិរញ្ញវត្ថុទីក្រុងហុងកុង លោក Paul Chan បានគូសបញ្ជាក់ថា វិធានការ ដើម្បីគាំទ្រសេដ្ឋកិច្ចរបស់ហុងកុងនឹងមានសរុបដល់ជិត២២ពាន់លានដុល្លារ ជាមួយនឹងការចំណាយប្រយុទ្ធឆាំងកូវីដ១៩ នឹងមានប្រមាណ៧ពាន់លានដុល្លារអាមេរិក។
អត្ថបទគួរអាន
តើអ្វីខ្លះជាវិធានការក្នុងការជួយសម្រួលបន្ទុកពន្ធរបស់ហុងកុងសម្រាប់ពលរដ្ឋ?
នៅក្នុងវិធានការកញ្ចប់ថវិការបស់ហុងកុង គឺរួមមានការកាត់បន្ថយពន្ធដល់ ១០០% នៃពន្ធលើប្រាក់ខែដែលកំណត់ផ្ដល់ជូនសម្រាប់តែអ្នកមានប្រាក់ខែត្រឹមប្រមាណ១.៣០០ដុល្លារអាមេរិកចុះក្រោមតែប៉ុណ្ណោះ។ បន្ថែមពីនេះ អាជ្ញាធរនឹងមានការផ្ដល់ជូនប័ណ្ណកូប៉ុងតម្លៃ ប្រមាណ ១.៣០០ដុល្លារ ព្រមទាំង ផ្ដល់ជំនួយហិរញ្ញវត្ថុសម្រាប់អ្នកអត់ការងារធ្វើ និងការឧបត្ថម្ភធនសម្រាប់អាជីវកម្មដែលរងផលប៉ះពាល់ដោយផ្ទាល់ដោយសារកូវីដ១៩ផងដែរ។ ទន្ទឹមនេះ ក៏មានការកាត់បន្ថយពន្ធលើប្រាក់ចំណេញ ១០០% សម្រាប់អាជីវកម្មខ្នាតតូច ប្រមាណ ជាង១៥ម៉ឺនអាជីវកម្ម និងមានអនុគ្រោះលើផ្នែកហិរញ្ញវត្ថុផ្សេងៗទៀតផងដែរ។
ហុងកុង ត្រូវបានគេស្គាល់ថាជាមជ្ឈមណ្ឌលហិរញ្ញវត្ថុរបស់ពិភពលោក ហើយទីក្រុងនេះ បានប្ដេជ្ញាចិត្តយ៉ាងមុតមាំក្នុងអនុវត្តលើយុទ្ធសាស្ត្រ គ្មានកូវីដ តាមលំនាំរដ្ឋាភិបាលក្រុងប៉េកាំង បើទោះបីជាប្រទេសដទៃទៀតនៃពិភពលោកសម្របខ្លួនទៅរកការរស់នៅជាមួយមេរោគក៏ដោយ។ សូមជម្រាបថា វិធានការរឹតបន្តឹងរបស់ហុងកុងនឹងបន្ដរហូតដល់យ៉ាងហោចណាស់ថ្ងៃទី ២០ ខែមេសា។
យ៉ាងណាក៏ដោយចុះ សេដ្ឋកិច្ចរបស់ហុងកុងត្រូវបានគេរំពឹងថានឹងកើនឡើងពី ២% ទៅ ៣,៥% នៅឆ្នាំនេះ បន្ទាប់ពីបានកើនដល់ ៦,៤% កាលពីឆ្នាំ ២០២១។ ការព្យាករនេះ ក្រោយពីមើលឃើញពីការស្ទុះងើបឡើងវិញនៅឆមាសទី២នៃឆ្នាំនេះ ដែលគេរំពឹងថា ជាពេលដែលហុងកុងអាចគ្រប់គ្រងការរាតត្បាតកូវីដ១៩បាន៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
