វិស័យសណ្ឋាគារថៃកំពុងជួបព្យុះសេដ្ឋកិច្ច ខណៈអាជីវកម្មបិទទ្វារកើនឡើង៤២%នៅ៩ខែឆ្នាំនេះ

មជ្ឈមណ្ឌលស្រាវជ្រាវ K-Research បានឱ្យដឹងថា អាជីវកម្មសណ្ឋាគារ និងកន្លែងស្នាក់នៅចំនួន១៤៨កន្លែងនៅប្រទេសថៃត្រូវបានបិទអាជីវកម្មក្នុងរយៈពេលចន្លោះពីខែមករា ដល់ខែកញ្ញា ឆ្នាំ២០២៦ កើនឡើង៤២% បើធៀបនឹងរយៈពេលដូចគ្នាកាលពីឆ្នាំមុន។ អាជីវកម្មខ្នាតតូចកំពុងរងសម្ពាធខ្លាំងជាងគេ ដោយប្រមាណ៥៤% បានខាតបង់ក្នុងឆ្នាំ២០២៥ ខណៈ៤២% បានខាតបង់ជាប់ៗគ្នារយៈពេល៣ឆ្នាំចាប់ពីឆ្នាំ២០២៣ ដល់ឆ្នាំ២០២៥។
ទោះជាយ៉ាងណា ទីផ្សារសណ្ឋាគារថៃ ត្រូវបានព្យាករថា នឹងសម្រេចបានកំណើន២,៦%នៅឆ្នាំ២០២៦ ដោយមានទំហំប្រមាណ១,១ទ្រីលានបាត ឬជិត៣៣ពាន់លានដុល្លារអាម៉េរិក។ ប៉ុន្តែការងើបឡើងវិញនៅតែមិនស្មើគ្នា ដោយអត្រាស្នាក់នៅតាមសណ្ឋាគារកើនឡើងតិចតួចប៉ុណ្ណោះ ខណៈចំនួនភ្ញៀវទេសចរបរទេសទៅលេងប្រទេសថៃ ត្រូវបានរំពឹងថា នឹងធ្លាក់ចុះ៤%មកនៅត្រឹមជាង៣១លាននាក់ ដែលនៅទាបជាងកម្រិតមុនផ្ទុះវិបត្តិកូវីដ-១៩។
ទន្ទឹមនេះចំនួនបន្ទប់ស្នាក់នៅដែលបន្តកើនឡើងកំពុងធ្វើឱ្យការប្រកួតប្រជែងកាន់តែតឹងតែង និងដាក់សម្ពាធលើតម្លៃបន្ទប់។ សម្រាប់ឆ្នាំ២០២៧ មជ្ឈមណ្ឌលស្រាវជ្រាវ K-Research បានព្យាករថា ថៃអាចនឹងទទួលបានភ្ញៀវទេសចរបរទេសចន្លោះពី៣១លានទៅ៣៣លាននាក់។ ទោះយ៉ាងណា ការកើនឡើងថ្លៃថាមពល អាហារ និងការដឹកជញ្ជូនអាចបន្តប៉ះពាល់ដល់ប្រាក់ចំណេញ ជាពិសេសសណ្ឋាគារដែលមានសាច់ប្រាក់បម្រុងតិចតួច។
ដើម្បីទប់ទល់នឹងបញ្ហានេះ មជ្ឈមណ្ឌលស្រាវជ្រាវ K-Research ណែនាំឱ្យប្រតិបត្តិករសណ្ឋាគារពង្រីកទីផ្សារអតិថិជន និងប្រភពចំណូល ប្រើប្រាស់បច្ចេកវិទ្យា និងគ្រប់គ្រងថ្លៃដើមឱ្យមានប្រសិទ្ធភាព
ជាជាងពឹងផ្អែកតែលើការបញ្ចុះតម្លៃដើម្បីទាក់ទាញភ្ញៀវ៕

ដោយ: តែម សុខុម