បារាំង ​អះអាងថា អឺរ៉ុប​នឹងអាច​កាត់​បន្ថយ​ការ​ពឹងផ្អែក​លើរ៉ែកម្រ​ចិន​​ នៅ៣ទៅ៥ឆ្នាំខាងមុខ

សារព័ត៌មាន The Straits Times បានរាយការណ៍នៅថ្ងៃទី២៨ ខែតុលា ថា ប្រទេសចិន មានចំណែកគ្របដណ្ដប់រហូតដល់ទៅ៩០% នៃការផលិតរ៉ែកម្រនៅទូទាំងពិភពលោក។ កាលពីឆ្នាំ២០២៥ ការរឹតបន្តឹងការនាំចេញមេដែករបស់ចិន បានបង្កការរំខានដល់ឧស្សាហកម្មជាច្រើន រួមទាំងការផលិតរថយន្ត និងបង្ហាញពីការពឹងផ្អែកខ្លាំងលើការផ្គត់ផ្គង់ពីប្រទេសតែមួយ។

លោក បេនចាមីន ហ្គាលេក្សូត (Benjamin Gallezot) បេសកជនទទួលបន្ទុកការផ្គត់ផ្គង់រ៉ែ និងលោហៈយុទ្ធសាស្ត្ររបស់បារាំង បានលើកឡើងថា ទីផ្សាររ៉ែកម្រមានទំហំកំណត់ ដូច​នេះ​មិនចាំបាច់បង្កើតអណ្តូងរ៉ែរាប់រយកន្លែង ដើម្បីធ្វើពិពិធកម្មការផ្គត់ផ្គង់នោះទេ។

គម្រោងរបស់ក្រុមហ៊ុន Solvay របស់បែលហ្ស៊ិក និង Carester របស់បារាំង រួមជាមួយគម្រោងនៅអូស្ត្រាលី សហរដ្ឋអាម៉េរិក ជប៉ុន ប្រេស៊ីល និងឥណ្ឌា កំពុងជួយពង្រីកសមត្ថភាពផលិត និងកែច្នៃរ៉ែទាំងនេះ។ ទោះជាយ៉ាងណា ការបង្កើនសមត្ថភាពផលិតមេដែកនៅតែជាបញ្ហាប្រឈម។

គួររំឭក​ថា កាលពីខែមិថុនា មេដឹកនាំក្រុមប្រទេស G7 បានព្រមព្រៀងពង្រឹងកិច្ចសហប្រតិបត្តិការដើម្បីកាត់បន្ថយការពឹងផ្អែកលើចិន។ ពួកគេមានគោលដៅធានាឱ្យបានថា នៅត្រឹមឆ្នាំ២០៣០ គ្មានប្រទេសផ្គត់ផ្គង់ណាមួយនៅខាងក្រៅក្រុមប្រទេស G7 និងប្រទេសដៃគូរបស់ខ្លួន ផ្គត់ផ្គង់លោហៈកម្រ និងមេដែកលើសពី៦០% នោះឡើយ។ គោលដៅរយៈពេលវែងរបស់ពួកគេ គឺកាត់បន្ថយចំណែកនោះឱ្យមកត្រឹម៥០%៕