លោក ទូច សំណាង នាយកគ្រប់គ្រងក្រុមហ៊ុន OCIC បានអះអាងប្រាប់ខេមបូណូមីសថា ទោះបីការឆ្លងរាតត្បាតនៃជំងឺកូវីដ-១៩ក្នុងសហគមន៍បានបង្កការរំខានមួយចំនួនដល់ដំណើរការអភិវឌ្ឍទីក្រុងរណបកោះនរា និងជ្រោយចង្វារក៏ពិតមែន ប៉ុន្ដែ ក្រុមហ៊ុននៅតែពុះពារបន្តដំណើរការសាងសង់យ៉ាងសកម្មក្នុងការអភិវឌ្ឍន៍គម្រោងទាំងពីរនេះ។
ពាក់ព័ន្ធលទ្ធផលនៃការសាងសង់លោក ទូច សំណាង បានបញ្ជាក់ថា មកទល់ពេលនេះការចាក់បំពេញដី និងការសាងសង់ហេដ្ឋារចនាសម្ព័ន្ធផ្សេងៗនៅទីក្រុងរណបកោះនរា សម្រេចបានជាង៨០%ហើយខណៈការអភិវឌ្ឍគម្រោងទីក្រុងរណបជ្រោយចង្វារវិញសម្រេចបានជាង៧០%។ ដោយឡែក ការសាង់សង់ស្ពានពីកោះពេជ្រទៅកោះនរាសម្រេចបានតែជាង ១០% ប៉ុណ្ណោះ ដោយគ្រោងបញ្ចប់នៅចុងឆ្នាំ២០២៣។
ជាមួយគ្នានេះដែរ លោក យក់ សុធីរិទ្ធ នាយកគ្រប់គ្រងនៃក្រុមហ៊ុន WorldBridge Homes បានអះអាងថា វិបត្តិកូវីដ-១៩ មិនបានធ្វើឲ្យប៉ះពាល់ដល់ដំណើរការសាងសង់ផ្ទះតម្លៃសមរម្យនៅទីក្រុងរណបសិរីមង្គលនោះទេ។ បច្ចុប្បន្នទាំងគម្រោងផ្ទះតម្លៃសមរម្យ និងគម្រោងទីក្រុងរណបសិរីមង្គលទាំងមូលកំពុងពន្លឿនដំណើរការសាងសង់យ៉ាងសស្រាក់សស្រាំ ទោះបីមានការរំខានពីមេរោគរាតត្បាតកូវីដ-១៩ ហើយគម្រោងលំនៅដ្ឋានតម្លៃសមរម្យនៅក្នុងទីក្រុងរណបសិរីមង្គល គឺគ្រោងបញ្ចប់នៅមុនដំណាច់ឆ្នាំ២០២១ នេះ។
អត្ថបទគួរចាប់អារម្មណ៏
គម្រោងអភិវឌ្ឍលំនៅដ្ឋានតម្លៃសមរម្យ នៅក្នុងទីក្រុងរណបសិរីមង្គល របស់ក្រុមហ៊ុន WorldBridge Homes គឺជាគម្រោងអភិវឌ្ឍន៍ធំមួយ ដែលដែលគិតគូរពីសង្គម និងបរិស្ថាន។ គម្រោងដ៏ធំមួយនេះមានទីតាំងស្ថិតនៅក្នុងភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្ដាល ដែលមានចម្ងាយប្រមាណ ៧គីឡូម៉ែតពីង្វង់មូលក្រុងតាខ្មៅ។
សូមបញ្ជាក់ថា មកទល់ពេលនេះ នៅរាជធានីភ្នំពេញមានគម្រោងទីក្រុងរណបធំៗលេចធ្លោជាងគេចំនួន៧ រួមមាន ទីក្រុងរណបកោះពេជ្រ, ទីក្រុងរណបហ្គ្រេនភ្នំពេញ, ទីក្រុងរណបកាំកូស៊ីធី, ទីក្រុងរណបអភិវឌ្ឍន៍បឹងកក់, ទីក្រុងរណបជ្រោយចង្វារ, ទីក្រុងរណបហ្គាឌិនស៊ីធី ទីក្រុងរណប អ៊ីងស៊ីធីជាដើម ដែលបានចាប់ផ្ដើមសាងសង់មកក្នុងរយៈពេលយូរឆ្នាំមកហើយ ដោយទីក្រុងរណបទាំង៧នេះ គ្រោងនឹងបញ្ចប់ការសាងសង់នៅឆ្នាំ២០៣០ខាងមុខនេះ៕
None
