យោងតាមរបាយការណ៍ប្រចាំខែមួយរបស់អង្គការ OPEC បានបង្ហាញថា តម្រូវការប្រេងពិភពលោក នៅក្នុងឆ្នាំ២០២៣ នឹងកើនឡើងប្រមាណ ២,២៥ លានបារែលក្នុង១ថ្ងៃ ឬប្រហែល ២,៣%។
របាយការណ៍ដដែលបន្តថា បើទោះបីជាស្ថានភាពសេដ្ឋកិច្ចសាកលនៅមានភាពមិនប្រាកដប្រជា និងហានិភ័យសេដ្ឋកិច្ចសំខាន់ៗនៅតែមានក៏ដោយ ប៉ុន្តែក៏មានកត្តាមួយចំនួនទៀតដែលអាចជួយជំរុញឱ្យសេដ្ឋកិច្ចងើបឡើងវិញផងដែរ។ ក្នុងនោះ រួមមានដូចជា ដំណោះស្រាយវិបត្តិភូមិសាស្រ្តនយោបាយនៅអឺរ៉ុបខាងកើត និងការបន្ធូរបន្ថយនៃគោលនយោបាយសូន្យកូវីដនៅប្រទេសចិន សុទ្ធសឹងជាកត្តាជំរុញសេដ្ឋកិច្ចដ៏មានសក្តានុពល ដែលធ្វើឱ្យតម្រូវការប្រេងក៏កើនឡើងទៅតាមនោះដែរ។
កត្តាជំរុញដ៏មានសក្តានុពលផ្សេងទៀត ក៏អាចមកពីការគ្រប់គ្រងដ៏ជោគជ័យរបស់ធនាគារកណ្តាលអាមេរិកលើកម្រិតអត្រាការប្រាក់គោល និងអតិផរណា ដែលតម្លៃទំនិញនឹងធ្លាក់ចុះមកវិញ។
អត្ថបទគួរអាន
យោងតាមស្ថិតិប្រចាំឆ្នាំមួយទៀតរបស់អង្គការ OPEC ក៏បានបង្ហាញដែរថា តម្រូវការប្រេងរបស់ចិន នឹងមានជាមធ្យមប្រមាណជិត ១៥លានបារ៉ែលក្នុង១ថ្ងៃ នៅឆ្នាំ២០២២ ដោយបានធ្លាក់ចុះពីឆ្នាំ២០២១ ប្រមាណ ១៨ម៉ឺនបារ៉ែលក្នុង១ថ្ងៃ។
គួររំលឹកថា កាលពីខែមីនាកន្លងទៅ ប្រេងបានកើនឡើងខ្ពស់បំផុតដល់ ១៤៧ដុល្លារក្នុង១បារ៉ែល បន្ទាប់ពីរុស្ស៊ីបានឈ្លានពានអ៊ុយក្រែន។ ប៉ុន្តែក្នុងរយៈពេលចុងក្រោយនេះ តម្លៃប្រេងបានចុះវិញ ក្នុងនោះការជួញដូរប្រេងឆៅកាលពីថ្ងៃទី១៣ ខែធ្នូ គឺមានតម្លៃប្រហែល ៨០ដុល្លារក្នុង១បារ៉ែល។ វិធានការបិទខ្ទប់ក្នុងប្រទេសចិន ក៏ជាកត្តាដ៏ធំមួយដែលនាំឱ្យមានតម្រូវការប្រេងតិច និងតម្លៃធ្លាក់ចុះផងដែរ។
ការផលិតប្រេងរបស់ OPEC បានធ្លាក់ចុះក្នុងខែវិច្ឆិកាកន្លងទៅ បន្ទាប់ពីអង្គការនេះនិងសម្ព័ន្ធមិត្ត បានសម្រេចកាត់បន្ថយការផលិតប្រេង ២លានបារ៉ែលក្នុង១ថ្ងៃ ដើម្បីជំរុញតម្លៃប្រេងឡើងវិញ៕
អត្ថបទ៖ នៅ សំភី
