តើទីផ្សាររថយន្ដនៅកម្ពុជា រអិលធ្លាក់ចុះយ៉ាងណាខ្លះ នៅអំឡុងពេលកូវីដ-១៩រាតត្បាតខ្លាំងនេះ?

អ្នកជំនួញក្នុងឧស្សាហកម្មរថយន្ត​បានគូសបញ្ជាក់ថា នៅអំឡុងពេលកូវីដ-១៩នេះ ទាំងតម្រូវការរថយន្ដសម្រាប់អាជីវកម្ម និង ប្រើប្រាស់ផ្ទាល់ខ្លួន គឺសុទ្ធតែមានការថយចុះ ហើយការថយចុះនេះ ដោយសារតែ ប្រាក់ចំណូលរបស់អាជីវកម្ម និង ប្រាក់ចំនូលបុគ្គលមានការថយចុះ ដែលធ្វើឲ្យការចំណាយមានការរឹតត្បិតជាងមុន។ មួយវិញទៀត ការផ្ដល់កម្ចីពីសំណាក់ធនាគារមកលើវិស័យឧស្សាហកម្មយាន្តយន្តនេះ ក៏មានការប្រុងប្រយ័ត្នជាងមុនដែរ។

លោក ងន សាំង អគ្គនាយកក្រុមហ៊ុន RMA បានប្រាប់ខេមបូណូមីសថា ទីផ្សារថយន្ដនៅពាក់កណ្ដាលឆ្នាំ២០២១នេះ មានការថយចុះប្រហែល៣០% ទាំងការលក់រថយន្ដថ្មី និងជជុស។ ទោះយ៉ាងណា លោក ងួន សាំង អះអាងថា ទីផ្សាររថយន្តថ្មីបានធ្លាក់ចុះតិចជាង រថយន្ត ជជុះ ដោយសារអ្នកប្រើប្រាស់មានការយល់ដឹងពីអត្ថប្រយោជន៍ចំពោះការប្រើរថយន្តថ្មី។ អគ្គនាយកក្រុមហ៊ុនដែលមាននាំចូលរថយន្ដជាច្រើនម៉ាកមកកម្ពុជារូបនេះ បានពន្យល់ថា  បញ្ហាដែលធ្វើឲ្យទីផ្សារលក់រថយន្ដជួបការធ្លាក់ចុះ គឺដោយសារតែ វិបត្តិ Covid 19 បានជះឥទ្ធិលច្រើនដល់គម្រោងអាជីវកម្មធំជាច្រើន ត្រូវពន្យារពេល ចំណែកឯអាជីវកម្មខ្នាតតូចកំពុងជួបបញ្ហាហិរញ្ញវត្ថុ។ ចំណែកឯ ពលរដ្ឋក៏មានការធ្លាក់ចុះប្រាក់ចំណូលផងដែរនៅអំឡុងពេលកូវីដ-១៩នេះ។ ទាំងអស់នេះហើយ សុទ្ធសឹងជាបញ្ហាដែលធ្វើឲ្យការលក់រថយន្ដថយចុះ នៅពាក់កណ្ដាលឆ្នាំនេះ។

គេសង្កេតឃើញថា នៅប៉ុន្មានឆ្នាំចុងក្រោយនេះ តម្រូវការរថយន្ដអគ្គិសនីនៅប្រទេសជាច្រើន ពិសេសប្រទេសជឿនលឿនហាក់មានការពេញនិយមច្រើនជាងមុន។ ទាក់ទិននឹងទីផ្សាររថយន្ដអគ្គិសនីនេះដែរត្រូវបាន លោក ងន សាំង អគ្គនាយកក្រុមហ៊ុន RMA បានប្រាប់ខេមបូណូមីសថា វាជារបត់ថ្មីសម្រាប់ទីផ្សាររថយន្តសកល។ ប៉ុន្ដែ ទីផ្សាររថយន្ដអគ្គិសនី គឺមានត្រឹមតែ ២ ភាគរយ ទៅ ៣ ភាគរយប៉ុណ្ណោះ នៃទីផ្សារថយន្ដពិភពលោក។ ចំណែកទីផ្សារកម្ពុជា ទីផ្សារថយន្ដអគ្គិសនី ហាក់នៅថ្មីនៅឡើយ ដែលទាមទារការរៀបចំហេដ្ឋាសម្ព័ន្ធ និងការលើកទឹកចិត្តច្រើនទៀតពីសំណាក់រដ្ឋាភិបាល។

បើយោងតាមរបាយការណ៍ក្រសួងពាណិជ្ជកម្ម បានឲ្យដឹងថា កាលពីឆ្នាំ២០២០ កម្ពុជាបាននាំចូលរថយន្ដក្នុងទំហំទឹប្រាក់ជាង ១ ពាន់លានដុល្លារ ធ្លាក់ចុះជាង៣៦% ធៀបនឹងឆ្នាំ ២០១៩៕

អត្ថបទ៖ សុខសិទ្ធិការ្យ