ថ្លែងនៅក្នុងសន្និសីទសារព័ត៌មាននាព្រឹកថ្ងៃទី ០៧ ខែមេសានេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ប្រជាកសិករឲ្យមានការពង្រីកការដាំដុះបន្លែបង្ការ និងចិញ្ចឹមសត្វ ដើម្បីផ្គត់ផ្គង់ទីផ្សារ ស្របពេលដែលបច្ចុប្បន្ននេះ ការនាំចូលផលិតផលទាំងនេះ ពីប្រទេសជិតខាងត្រូវបានបិទ ដូច្នេះវាឱកាសសម្រាប់កសិករក្នុងស្រុក។
សម្តេច ហ៊ុន សែន មានប្រសាសន៍ថា «អំពាវនាវឲ្យប្រជាជនជំរុញការដាំដុះបន្លែបង្ការផ្គត់ផ្គង់ទីផ្សារក្នុងកាលៈទេសៈដ៏លំបាកនេះ ហើយពេលហ្នឹង គឺវាត្រូវប៉ាន់ ព្រោះអាមកពីខាងក្រៅវាអត់ចូលបាន! អញ្ចឹងប្រជាពលរដ្ឋដាំឱកាសនេះ គឺល្អ! ឥឡូវវាជិតដល់ដំណាក់កាលដែលត្រូវដាំហើយបន្លែបង្ការ ចឹងបន្លែបង្ការ ការចិញ្ចឹមសត្វ ពងមាន់ ពងទា ផ្គត់ផ្គង់ទីផ្សារក្នុងស្រុក។ ត្រីផ្គត់ផ្គង់ទីផ្សារក្នុងស្រុក ទាំងត្រីងៀន ត្រីឆ្អើរ ប្រហុកផ្អក! លេងឲ្យវាដល់កម្រិត»។
អត្ថបទទាក់ទង!
សម្តេច បានគូសបញ្ជាក់ទៀតថា នៅក្នុងកាលៈទេសៈនេះ អាចនឹងមានវិស័យមួយចំនួនរងផលប៉ះពាល់ ដូចជាវិស័យទេសចរណ៍ និងឧស្សាហកម្មជាដើម ប៉ុន្ដែ ពេលវេលានេះ វាគឺជាកាលានុវត្តភាពសម្រាប់វិស័យកសិកម្មកម្ពុជា ដែលកន្លងមកធ្លាប់តែមានកំណើនយឺត នឹងស្ទុះងើបឡើងវិញ។ សម្តេចបន្តថា នៅពេលខាងមុខនេះ គេនឹងបានមើលឃើញថា វិស័យកសិកម្មអាចនឹងហក់កើនឡើងខ្លាំង ស្របពេលដែលវិស័យផ្សេងទៀតដែលធ្លាប់តែកើនឡើងនោះ នឹងត្រូវធ្លាក់ចុះ។
នាយករដ្ឋមន្ត្រីកម្ពុជាមានប្រសាសន៍ថា «ប៉ះពាល់ទៅលើវិស័យទេសចរណ៍ ប៉ះពាល់ទៅលើវិស័យឧស្សាហកម្មកាត់ដេរ ប៉ុន្ដែមិនប៉ះពាល់វិស័យកសិកម្មទេ! ផ្ទុយទៅវិញ កាលានុវត្តភាពមានសម្រាប់វិស័យកសិកម្ម ដែលតម្រូវឲ្យប្រជាជនយើង ធ្វើការដាំដុះនូវមុខទំនិញដែលចាំបាច់ផ្គត់ផ្គង់ក្នុងទីផ្សារក្នុងស្រុក។»។
សម្ដេច បន្ថែមថា «កន្លងទៅកំណើនក្នុងវិស័យឧស្សាហកម្ម វិស័យសេវាកើនខ្ពស់ វិស័យកសិកម្មកើនទាប។ នៅពេលខាងមុខនេះ កំណើនក្នុងវិស័យឧស្សហកម្ម និងសេវាធ្លាក់ចុះ កំណើនក្នុងវិស័យកសិកម្មនឹងហក់ឡើងតែម្ដង។ នេះជាឱកាសដែលយើងអាចមើលឃើញតាំងពីឥឡូវ។»
សូមបញ្ជាក់ថា បើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា បើទោះបីជាកម្ពុជាកំពុងត្រូវជួបប្រឈមនឹងបញ្ហារីករាលដាលនៃបញ្ហា Covid-19 យ៉ាងក្ដី ប៉ុន្ដែ បើមើលទៅលើការនាំចេញផលិតផលកសិកម្មរបស់កម្ពុជាទាំងផ្លូវការ និងក្រៅផ្លូវការ នៅក្នុងរយៈពេល ៣ខែ ដំបូង នៅឆ្នាំ២០២០នេះ សម្រេចបាន ៣លានតោន។ ក្នុងនោះ ការនាំចេញផ្លូវការសរុបមានជាង ១,៦ លានតោន ខណៈដែលការនាំចេញក្រៅផ្លូវការមានប្រមាណ១,៣ លានតោន។
បើតាមសម្តេចហ៊ុន សែន ថ្មីៗនេះ រាជរដ្ឋាភិបាលក៏បានប្រកាសបញ្ជាមិនឲ្យនាំចេញ ត្រី ស្រូវ និងអង្ករស ផងដែរ ខណៈដែលអង្ករក្រអូបនៅតែបន្ដនាំចេញបាន។ វិធានការទាំងនេះ គឺក្នុងគោលដៅធានាសន្ដិសុខស្បៀងអាហារ អំឡុងពេលមានវិបត្តិ Covid-19 កំពុងកើតមាន៕
None
