ថ្លែងនៅក្នុងសន្និសីទសារព័ត៌មាននៅវិមានសន្ដិភាព កាលពីព្រឹកថ្ងៃទី០៧ មេសានេះ សម្តេច ហ៊ុន សែន បានគូសបញ្ជាក់ថា កម្មករកម្មការិនី នឹងទទួលបានប្រាក់ឧបត្ថម្ភប្រចាំខែអំឡុងពេលរោងចក្រព្យួការងារ ចំនួនទឹកប្រាក់ ៧០ ដុល្លារអាមេរិក ដោយក្នុងនោះ រដ្ឋនឹងចេញ៤០ដុល្លារ ខណៈដែលថៅកែរោងចក្រ នឹងចេញ៣០ដុល្លារ។
សម្តេច ហ៊ុន សែន បានបញ្ជាំក់យ៉ាងដូច្នេះ «ពេលមុន ថាអ្នកអាចទទួលបាននូវការឧបត្ថម្ភរយៈពេល ៦ខែ តម្រូវឲ្យហ្វឹកហាត់៤ខែ និងត្រៀម២ខែទៀត ប៉ុន្ដែ ឥឡូវអត់ហ្វឹកហាត់បានទេ ដោយសារតែយើងបានបិទអស់ហើយ នូវកន្លែងបណ្ដុះបណ្ដាលវិជ្ជាជីវៈផ្សេងៗ។ ប៉ុន្ដែ កម្មករនៅតែទទួលបាន ៧០ដុល្លារដែរ។ ពីរដ្ឋ ៤០ដុល្លារ និងពីរោងចក្រ ៣០ដុល្លារ! បាន ៧០ដុល្លារ។»
សម្តេច ហ៊ុន បញ្ជាក់ថា ថវិកាដែលនឹងផ្ដល់ជូនកម្មករនេះ គឺជាជំនួយសង្គម នៅក្នុងរយៈពេលដែលមានការព្យួរការងារ។
អត្ថបទទាក់ទង!
ការប្រកាសរបស់នាយករដ្ឋមន្ត្រីនេះ គឺក្រោយពេលដែល ខាងសមាគមរោងចក្រកាត់ដេរកម្ពុជា បានអះអាងថា រោងចក្រដែលបានផ្អាកដំណើរការផលិត មិនអាចមានលទ្ធភាពបង់ប្រាក់ខែ ៤០នៃប្រាក់ខែគោល ជូនកម្មករកម្មការិនី ដូចការណែនាំកាលពីមុនបានទេ ដោយសារតែក្រុមហ៊ុនអ្នកបញ្ជាទិញមិនព្រមទូទាត់ប្រាក់តាមកិច្ចសន្យា និងបាន ថែមទាំងបានលុបចោលការកម្ម៉ង់ទិញសម្រាប់រយៈពេល ២ទៅ៣ ខែខាងមុខទៀតផងដែរ។
តាមអ្វីដែលជាវិធានការកាលពីមុនរបស់រាជរដ្ឋាភិបាលកម្ពុជា គឺកម្មករនយោជិតនឹងទទួលបាន ប្រាក់ខែ ៦០% នៃប្រាក់ខែគោល ១៩០ ដុល្លារ ស្មើនឹងប្រមាណ១១៤ ដុល្លារអាមេរិក ក្នុងមួយខែ ដោយក្នុងនោះ រដ្ឋនឹងចេញ ២០% ខណៈដែលថៅកែរោងចក្រចេញ ៤០% ដោយមានភ្ជាប់ជាមួយលក្ខខណ្ឌតម្រូវឲ្យមកទទួលរៀនវគ្គបណ្ដុះបណ្ដាលខ្លី។ ប៉ុន្ដែ ក្រោយមក ខាងរោងចក្រប្រកាសថា មិនមានលទ្ធភាពបង់ ៤០% ទើបនៅថ្ងៃទី ០៧ មេសានេះ សម្តេច ហ៊ុន សែនបានប្រកាសពី វិធានការណ៍ថ្មី ដោយកម្មករនឹងទទួលបានប្រាក់ឧបត្ថម្ភចំនួន ៧០ដុល្លារ ក្នុងនោះរដ្ឋចេញ ៤០ និង ថៅកែចេញ ៣០ដុល្លារ។
បើតាមសម្តេចហ៊ុន សែន គិតមកទល់ពេលនេះ មានរោងចក្រជាង ១០០ រោងចក្រហើយ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា បានបញ្ជាក់ថា សមាគមគាំទ្រ និងថ្លែងអំណរគុណចំពោះប្រមុខរាជរដ្ឋាភិបាលកម្ពុជា ដែលបានដាក់ចេញនូវវិធានការថ្មីៗនេះ។
លោក មានប្រសាសន៍យ៉ាងដូច្នេះ «នេះគឺជាអ្វីដែលយើងបានស្នើសុំ ហើយយើងសូមថ្លែងអំណរគុណដល់រាជរដ្ឋាភិបាល ជាពិសេសសម្តេចតេជោ ចំពោះការសម្រេចនេះ ដែលឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលចំពោះទាំងបងប្អូនកម្មករនិយោជិត និងអ្នកវិនិយោគទូទៅ ក្នុងគ្រាមានវិបត្តិនេះ»។
នៅពេលដែលត្រូវបានសួរថា តើកម្មករនិយោជិតរោងចក្រដែលព្យួការងារ នឹងទទួលបានប្រាក់ឧបត្ថម្ភនេះ នៅពេលណានោះ? លោកកាំង ម៉ូនីកាបញ្ជាក់ថា ខាងសមាគមនឹងមានសេចក្តីណែនាំលម្អិតបន្ថែមទៀតលើយន្តការសម្រាប់អនុវត្ត។
យ៉ាងណាក៏ដោយ អគ្គលេខាធិការរងសមាគរោងចក្រកាត់ដេរកម្ពុជារូបនេះ បានគូសបញ្ជាក់ច្បាស់ថា យន្តការគាំទ្រនេះ គឺសម្រាប់តែចំពោះរោងចក្រណាដែលនឹងត្រូវព្យួរការងារផលិតកម្មជាបណ្តោះអាសន្នតែប៉ុណ្ណោះ។ ចំពោះរោងចក្រដែលមានការបញ្ជាទិញត្រូវផលិតដូចធម្មតា គឺត្រូវធ្វើការជាធម្មតា ហើយរោងចក្របើកប្រាក់ឈ្នួលជូនកម្មករនិយោជិតពេញជាធម្មតា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
