«ម៉ោង៨ និង៣០នាទីថ្ងៃទី១០កុម្ភៈ ២០២១ ដំណើរការចាក់វ៉ាក់សាំងនឹងចាប់ផ្តើមជាផ្លូវការនៅមន្ទីរពេទ្យកាល់ម៉ែត្រ ដែលខ្លួនខ្ញុំ នឹងទទួលមុនគេជាមួយមន្ត្រីជាន់ខ្ពស់ផ្សេងទៀត លើកលែងតែសម្តេចពិជ័យសេនា ទៀ បាញ់ ដែលគាត់បានចាក់វ៉ាក់សាំងនេះរួចហើយ»។ សម្តេចនាយករដ្ឋមន្ត្រី ហ៊ុន សែន បញ្ជាក់បែបនេះលើទំព័រហ្វេសប៊ុកផ្លូវការ នៅថ្ងៃទី៥ ខែកុម្ភៈ ឆ្នាំ២០២១។
សម្តេចអះអាងថា ក្នុងអំឡុងពេល សម្តេច ចាក់វ៉ាក់សាំងកូវីដ-១៩ នឹងមានការផ្សាយផ្ទាល់ ហើយក្រោយចាក់រួច សម្តេច នឹងធ្វើសន្និសីទសារព័ត៌មានជាមួយប្រព័ន្ធផ្សព្វផ្សាយ នៅមន្ទីរពេទ្យកាល់ម៉ែតតែម្តង។
អត្ថបទទាក់ទង!
ការប្រកាសរបស់ប្រមុខរាជរដ្ឋាភិបាលកម្ពុជានៅថ្ងៃនេះ គឺចំថ្ងៃខួប១ឆ្នាំនៃដំណើរទស្សនកិច្ចរបស់សម្តេច ទៅកាន់ប្រទេសចិន ដែលកំពុងផ្ទុះឡើងនៃជំងឺកូវីដ-១៩។ សម្តេច ចាត់ទុកដំណើរទស្សនកិច្ច នៅថ្ងៃទី៥ កុម្ភៈ ឆ្នាំ២០២០ ជាដំណើរទស្សនកិច្ចដ៏មានអត្ថន័យ នៃចំណងមិត្តភាពកម្ពុជា-ចិន។
ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលនៅថ្ងៃទី៤ ខែកុម្ភៈ បានចេញសេចក្តីប្រកាសព័ត៌មានមួយ ដោយអនុញ្ញាតឲ្យប្រើប្រាស់វ៉ាក់សាំង Sinopharm ដែលនឹងមកកម្ពុជានៅថ្ងៃទី៧ កុម្ភៈ ឆ្នាំ២០២១។
សេចក្តីប្រកាសព័ត៌មានខាងលើបានបញ្ជាក់ថា៖«ក្រសួងសុខាភិបាល អនុញ្ញាតឲ្យប្រើប្រាស់វ៉ាក់សាំង Sinopharm Covid-19 ដែលផលិតដោយវិទ្យាស្ថាន Beijing Institube of Biological Products Co.Ltd នៃសធារណប្រជាមានិតចិន ក្នុងលក្ខខណ្ឌនៃការប្រើប្រាស់ជាបន្ទាន់ ដោយអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ-១៩ របស់រដ្ឋាភិបាល»។
បើតាមសម្តេច ហ៊ុន សែន ចិនផ្តល់ជំនួយវ៉ាក់សាំងកូវីដ-១៩ ដល់កម្ពុជាចំនួន១លានដូស ហើយសម្រាប់ដំណាក់កាលទី១ ចិន ផ្តល់ឲ្យកម្ពុជាចំនួន៦០ម៉ឺនដូស ដែលនឹងមកដល់កម្ពុជានៅថ្ងៃទី៧ កុម្ភៈ៕None
