សង្រ្គាមនៅអ៊ុយក្រែន កំពុងឈានចូលដំណាក់កាលថ្មីមួយ ដោយដែនកំណត់ នៃការវាយប្រហារ មិនមែនបង្ហូរឈាមតែនៅសមរភូមិទៀតនោះទេ ដោយកងទ័ពអ៊ុយក្រែន បានប្រើហ្វូងដ្រូន ឬយន្តហោះគ្មានមនុស្សបើកវាយប្រហារចូលជ្រៅក្នុងទឹកដីរុស្ស៊ី។ អ៊ុយក្រែន បានអភិវឌ្ឍកម្មវិធីបច្ចេកវិទ្យា និងសមត្ថភាពវាយប្រហារកាន់តែមានប្រសិទ្ធភាពទៅលើហេដ្ឋារចនាសម្ព័ន្ធ រោងចក្រចម្រាញ់ប្រេង និងបណ្តាញភស្តុភារកម្មយោធារបស់រុស្ស៊ី។ បញ្ហានេះ បានបង្ខំឱ្យប្រធានាធិបតីរុស្ស៊ីលោក វ៉្លាឌីមៀ ពូទីន ចេញមុខទទួលស្គាល់ថា រុស្ស៊ី កំពុងប្រឈមមុខនឹងកង្វះខាតប្រេងឥន្ធនៈ ខណៈដ្រូនរយៈចម្ងាយឆ្ងាយរបស់អ៊ុយក្រែន នៅតែបន្តបុកកម្ទេច និងដុតបំផ្លាញរោងចក្រចម្រាញ់ប្រេងជាបន្តបន្ទាប់ ដែលបង្ខំឱ្យតំបន់ជាច្រើនរបស់រុស្ស៊ី ចាប់ផ្តើមដាក់កំហិតលើការប្រើប្រាស់ប្រេងឥន្ធនៈ។
ក្រុមអ្នកវិភាគបានលើកឡើងថា នៅក្នុងឆ្នាំទី៥ នៃសង្រ្គាមដ៏រ៉ាំរ៉ៃនេះ លោកប្រធានាធិបតី វូឡូឌីមៀ ហ្សាឡេនស្គី បានបង្កើនសមត្ថភាពវាយលុកគួរឱ្យកត់សម្គាល់ ដោយដ្រូនអ៊ុយក្រែន អាចហោះទៅទម្លាក់គ្រាប់បែកលើរោងចក្រចម្រាញ់ប្រេងធំៗនៅក្នុងតំបន់ក្រាស្នូដា (Krasnodar) និងយ៉ារ៉ូស្លាវ (Yaroslavl) ដែលស្ថិតនៅជ្រៅក្នុងទឹកដីរុស្ស៊ី។ កត្តានេះបានធ្វើឱ្យរុស្ស៊ី ដែលជាប្រទេសផលិតថាមពលដ៏ធំមួយលើលោក បែរជាត្រូវគិតគូរបង្កើនការនាំចូលប្រេងពីខាងក្រៅ ដើម្បីមកបំពេញតម្រូវការក្នុងស្រុក។
ទោះជាយ៉ាងណាលោក ពូទីន បានអះអាងថា ការវាយលុករបស់កងទ័ពរុស្ស៊ី នឹងនៅតែបន្តទៅមុខដោយគ្មានការរារាំងឡើយ ដោយលោកសង្កត់ធ្ងន់ថា សមត្ថភាពវាយប្រហាររបស់ទីក្រុងមូស្គូ គឺនៅតែមានអានុភាពខ្លាំងក្លា និងបំផ្លិចបំផ្លាញខ្ពស់។ មេដឹកនាំរូបនេះបានអះអាងថា កងកម្លាំងរបស់លោកកំពុងគ្រប់គ្រងភាគច្រើន នៃតំបន់យុទ្ធសាស្ត្រសំខាន់ៗក្នុងប្រទេសអ៊ុយក្រែនដូចជាទីក្រុងលីមែន និងទីក្រុងកូស្ទីយ៉ានទីនីវការ ក្នុងតំបន់ដូណេត ព្រមទាំងកំពុងពង្រីក និងពង្រឹងឧត្តមភាពយោធារបស់ខ្លួនបន្ថែមទៀត នៅក្នុងតំបន់ដុនបាសទាំងមូលផងដែរ៕
ដោយៈ សរ សុជាតិ
