ជុំវិញនឹងបញ្ហានេះ ឯកឧត្តម វេង សាខុនរដ្ឋមន្ត្រីក្រសួងកសិកម្មបានបញ្ជាក់ប្រាប់ខេមបូណូមីសថា បន្ទាប់ពីមានកិច្ចប្រជុំរវាងក្រសួង-ស្ថាប័នពាក់ព័ន្ធនាពេលថ្មីនេះ ក្រសួងកសិកម្មសម្រេចកាត់បន្ថយការនាំចូលជ្រូករស់មកនៅតិចតួចបំផុត ពោលគឺត្រឹម ៧០០ ទៅ៨០០ក្បាលប៉ុណ្ណោះក្នុងមួយថ្ងៃ ដើម្បីបំពេញទីផ្សារជ្រូកក្នុងស្រុក។
បន្ទាប់ពីមានការស្នើសុំពីបណ្ដាក្រុមអ្នកចិញ្ចឹមជ្រូកនៅកម្ពុជា កន្លងមកមានកិច្ចពិភាក្សាមួយរវាងក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម រួមជាមួយក្រុម អ្នកចិញ្ចឹមសត្វកម្ពុជា ដើម្បីរកដំណោះស្រាយលើបញ្ហានេះ។ ប៉ុន្ដែ ជុំវិញបញ្ហានេះ លោក ស្រ៊ុន ពៅ ប្រធានសមាគមចិញ្ចឹមសត្វ កម្ពុជា បានអះអាងថា ក្រសួងនៅតែអនុញ្ញាតឱ្យមានការនាំចូលជ្រូកដដែល មិនមានការបិទនាំចូលទាំងស្រុងនោះទេ ប៉ុន្ដែការនាំចូលគឺមានចំនួនតិចតួចជាងមុន។
យ៉ាងណាក៏ដោយ ប្រធានសមាគមចិញ្ចឹមសត្វ កម្ពុជារូបនេះ នៅតែប្រកាន់ជំហររបស់ខ្លួន ក្នុងការស្នើដល់រដ្ឋាភិបាល ឱ្យបិទការនាំចូលជ្រូករស់ ព្រោះលោកយល់ថា ការបន្តឱ្យនាំចូលជ្រូករស់ពីខាងក្រៅ បានប៉ះពាល់យ៉ាងខ្លាំង ដល់ក្រុមអ្នកចិញ្ចឹមជ្រូកក្នុងស្រុក ពិសេសការនាំចូលជ្រូកខុសច្បាប់តែម្ដង។
បើតាមឯកឧត្តម វេង សាខុន រដ្ឋមន្ត្រីក្រសួងកសិកម្ម បានប្រាប់សារព័ត៌មាន ខេមបូណូមីស ថា ក្រសួងនឹងព្យាយាមកាត់បន្ថយការនាំចូលជ្រូករស់ជាបន្តបន្ទាប់ រហូតឈានដល់ការបញ្ឈប់ការនាំចូលជ្រូករស់ទាំងស្រុងនៅពេលខាងមុខ។ ឯកឧត្តមរដ្ឋមន្ត្រីក្រសួងកសិកម្ម បានបញ្ជាក់ថា ពេលនេះក្រសួងសម្រេចឱ្យនាំចូលជ្រូករស់ត្រឹម ៧០០ក្បាល ទៅ៨០០ក្បាល ប៉ុណ្ណោះ ក្នុងមួយថ្ងៃ ហើយទៅថ្ងៃអនាគតនឹងអាចឈានដល់ការបញ្ឈប់ទាំងស្រុង។
អត្ថបទទាក់ទង
តាមពិតទៅកន្លងមករដ្ឋាភិបាល ពិសេសក្រសួងកសិកម្ម បានធ្វើកិច្ចការច្រើនមកហើយ ពាក់ព័ន្ធនឹងការរឹតបន្តឹងច្បាប់ និងទប់ស្កាត់នៃការនាំចូលជ្រូករស់ពីខាងក្រៅ។ បើតាមការបញ្ជាក់របស់ឯកឧត្តម វេង សាខុន កាលពីពាក់កណ្ដាលឆ្នាំ២០១៩ កម្ពុជា បានអនុញ្ញាតឱ្យនាំចូលជ្រូករស់ប្រមាណ ៧០០០ក្បាល ទៅ៨០០០ក្បាល ឯណោះ ក្នុងមួយថ្ងៃ។
ឆ្លើយតបនូវការលើកឡើងរបស់ក្រសួងកសិកម្មខាងលើ ត្រូវបាន ឧកញ៉ាបណ្ឌិត ម៉ុង ឬទ្ធី សាទរ និងបង្ហាញការគាំទ្រយ៉ាងខ្លាំង ចំពោះវិធានការ និងដំណោះស្រាយជូនអ្នកចិញ្ចឹមជ្រូកក្នុងស្រុកនាពេលនេះ។ ជាអ្នកមានបទពិសោធន៍ច្រើនឆ្នាំ ក្នុងវិស័យកសិកម្ម និងជាអ្នកចិញ្ចឹមជ្រូកដ៏ធំជាងគេមួយនៅកម្ពុជាផងនោះ លោកឧកញ៉ា ម៉ុង ឬទ្ធី យល់ថា ការអនុញ្ញាតឱ្យមានការនាំចូលជ្រូករស់ ក្នុងបរិមាណ ៧០០ក្បាល ទៅ ៨០០ក្បាល ជាការប្រសើរសម្រាប់ទីផ្សារជ្រូកក្នុងស្រុក។ ប៉ុន្ដែអ្នកជំនួញកសិកម្មល្បីល្បាញជើងចាស់រូបនេះ នៅតែគាំទ្រឱ្យរដ្ឋាភិបាលបញ្ឈប់ការនាំចូលជ្រូករស់ទាំងស្រុង ដោយហេតុផល កម្ពុជាមានលទ្ធភាពគ្រប់គ្រាន់ ក្នុងការផ្គត់ផ្គង់ទីផ្សារក្នុងស្រុកដោយខ្លួនឯង។
យោងតាមតួលេខដែលបង្ហាញ ដោយសមាគមចិញ្ចឹមសត្វកម្ពុជា កន្លងមក លើទីផ្សារក្នុងស្រុក បច្ចុប្បន្ន ជាមធ្យម កម្ពុជា មានតម្រូវការជ្រូករស់ប្រមាណ ៨០០០ក្បាល ក្នុងមួយថ្ងៃ ខណៈកម្ពុជា មានលទ្ធភាពផ្គត់ផ្គង់ជ្រូករស់ ប្រមាណ ៧០០០ក្បាល ក្នុងមួយថ្ងៃ៕
អត្ថបទ៖ ខន ណារី
None
