លោកបណ្ឌិត គី សេរីវឌ្ឍ អ្នកវិភាគសេដ្ឋកិច្ច និងជាប្រធានមជ្ឈមណ្ឌលសិក្សាចិននៃរាជបណ្ឌិតសភាកម្ពុជា ជំរុញឲ្យម្ចាស់សហគ្រាសធុនតូច និងមធ្យមងាកមកពង្រឹងផលិតកម្មកែច្នៃ និងផលិតផលិតផលឡើងវិញ ដើម្បីចាប់យកទីផ្សារប្រើប្រាស់ក្នុងស្រុក។ អ្នកជំនាញសេដ្ឋកិច្ចរូបនេះ មើលឃើញថា កូវីដ-១៩ ជាវិបត្តិក៏ពិតមែន តែវាជាឱកាសសម្រាប់អ្នករកស៊ីក្នុងវិស័យ SMEs ដើម្បីប្រជែងដណ្តើមទីផ្សារក្នុងស្រុកជាមួយផលិតផលនាំចូលពីក្រៅប្រទេស ដែលកំពុងប្រឈមនឹងបញ្ហាដឹកជញ្ជូន ពាក់ព័ន្ធតម្លៃដឹកជញ្ជូនឡើងថ្លៃ កង្វះទូកុងតឺន័រ និងវិធានការទប់ស្កាត់ការឆ្លងរាលដាលនៃជំងឺកូវីដ-១៩ ជាដើម។
ការជំរុញបែបនេះ ធ្វើឡើងក្រោយអ្នកវិភាគសេដ្ឋកិច្ចរូបនេះ សង្កេតឃើញថា កន្លងមកមុនវិបត្តិកូវីដ-១៩ កើតមានឡើងម្ចាស់សហគ្រាសធុនតូច និងមធ្យមមួយចំនួនបានកាត់បន្ថយផលិតកម្ម ដើម្បីទុកដើមទុនទៅវិនិយោគលើវិស័យអចលនទ្រព្យ ដែលរំពឹងថា នឹងផ្តល់ប្រាក់ចំណេញខ្ពស់ដល់ពួកគេក្នុងរយៈពេលដ៏ខ្លី។ ប៉ុន្តែ ក្រោយពិភពលោក ក៏ដូចជាកម្ពុជាទទួលរងនូវការឆ្លងនៃជំងឺកូវីដ-១៩ វិស័យអចលនទ្រព្យហាក់នៅទ្រឹង ដូច្នេះ ពេលវេលានេះជាឱកាសសម្រាប់ពួកគេក្នុងការងាកមកពង្រឹងផលិតកម្មឡើងវិញ ដើម្បីចាប់យកទីផ្សារក្នុងស្រុក។
ទន្ទឹមនឹងនេះ លោកបណ្ឌិត គី សេរីវឌ្ឍ ក៏បានលើកឡើងពីបញ្ហាប្រឈម និងចំណុចខ្វះខាតមួយចំនួន ដែលវិស័យ SMEs បានជួបប្រទះកន្លងមកផងដែរ។ បញ្ហាទាំងនោះរួមម្ចាស់សហគ្រាសធុនតូចនិងមធ្យមមួយចំនួនខ្វះការយល់ដឹងលើការរៀបចំ និងគ្រប់គ្រងហិរញ្ញវត្ថុ, ខ្វះការយល់ដឹងលើវិស័យដឹកជញ្ជូន និងខ្វះការសហការគ្នាដោយប្រកួតប្រជែងតែគ្នាឯង តែមិនប្រកួតប្រជែងជាមួយផលិតនាំចូល។ កង្វះបច្ចេកទេសក្នុងការផលិត និងការគាំទ្រពីប្រជាពលរដ្ឋខ្លួនឯង ក៏ជាបញ្ហាប្រឈមមួយផងដែរ។
អត្ថបទគួរអាន
ស្រដៀងគ្នាទៅនឹងការលើកឡើងរបស់អ្នកវិភាគសេដ្ឋកិច្ចដែរ លោក ស៊ឹម ចាន់គិរីរ័ត្ន ប្រធានក្រុមប្រឹក្សាភិបាលនៃសមាគមសហគ្រិនវ័យក្មេងកម្ពុជាបានមើលឃើញថា បញ្ហាប្រឈមធំបំផុតដែលវិស័យ SMEs កំពុងជួបប្រទះ គឺកង្វះដើមទុនសម្រាប់ពង្រីកនិងទ្រទ្រង់ដំណើរការអាជីវកម្ម។ សហគ្រិនរូបនេះ សង្កេតឃើញថា សហគ្រាសធុនតូច និងមធ្យមមួយចំនួនពិបាកក្នុងការទទួលបានកម្ចីពីស្ថាប័នហិរញ្ញវត្ថុ បន្ទាប់ពីអាជីវកម្មរបស់ពួកគេប្រឈមនឹងការខាតបង់។ បើប្រធានក្រុមប្រឹក្សារូបនេះ មានសហគ្រាសធុនតូច និងមធ្យមប្រមាណជាង២០% ប៉ុណ្ណោះដែលទទួលបានកម្ចីពីស្ថាប័នហិរញ្ញវត្ថ សម្រាប់ពង្រីកអាជីវកម្ម និងបន្តប្រតិបត្តិការរបស់ខ្លួន ពិសេសនៅអំឡុងពេលកូវីដ-១៩នេះ។
អ្នកជំនាញ លើកទឹកចិត្តឲ្យអ្នករកស៊ីក្នុងវិស័យ SMEs ចងជាសហគមន៍ ឬចូលរួមជាមួយសមាគមផ្សេងៗ ដើម្បីទទួលបានការប្រឹក្សាយោបល់ និងគំនិតសំខាន់ៗក្នុងការបន្តប្រតិបត្តិការរបស់ខ្លួនក្នុងអំឡុងនៃវិបត្តកូវីដ-១៩ ពិសេសជាងនេះ ក្នុងកាលៈទេសៈបច្ចុប្បន្ន អ្នករកស៊ីក្នុងស្រុក គួរតែក្ដាប់ឱកាសចាប់ដៃ សហការគ្នា ដើម្បីប្រកួតប្រជែងជាមួយផលិតនាំចូលពីក្រៅប្រទេស៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
