ការស្ទង់មតិរបស់ក្រុមហ៊ុន PWC ដែលផ្តោតលើនាយកប្រតិបត្តិជាន់ខ្ពស់ចំនួន១៥០ នៅទូទាំងតំបន់អាស៊ី អឺរ៉ុប និងអាមេរិកខាងជើងចាប់ពីខែធ្នូ ឆ្នាំ២០២៣ ដល់ខែមករាឆ្នាំ២០២៤ បានរកឃើញថា នៅក្នុងរយៈពេល១០ឆ្នាំ ខាងមុខ ប្រទេសឥណ្ឌានឹងក្លាយជាតំណភ្ជាប់ដ៏សំខាន់បំផុតទីបីនៅក្នុងខ្សែច្រវាក់ផ្គត់ផ្គង់របស់ក្រុមហ៊ុនជាច្រើន ខណៈដែលអាស៊ាននឹងកើនឡើងមួយកម្រិតទៀតក្នុងលំដាប់ខ្សែច្រវាក់ផ្គត់ផ្គង់ គឺឡើងដល់កម្រិតលេខ៥។
ការសិក្សានេះបានបង្ហាញថា តំបន់អាស៊ីអាគ្នេយ៍ ឬអាស៊ាននឹងទទួលបានអត្ថប្រយោជន៍ច្រើនបំផុតពីការធ្វើឱ្យមានតុល្យភាពឡើងវិញក្នុងវិស័យផលិតគ្រឿងអេឡិចត្រូនិក ខណៈឥណ្ឌានឹងទទួលបានច្រើនខាងផលិតកម្មអេឡិចត្រូនិក ផ្នែកឱសថនិងឧបករណ៍វេជ្ជសាស្ត្រ។ ការសិក្សានេះបានបង្ហាញទៀតថា ការចុះខ្សោយទំនាក់ទំនងរវាងអាម៉េរិក និងចិន គឺជាកម្លាំងជំរុញមួយនៃការធ្វើឱ្យមានតុល្យភាពឡើងវិញក្នុងខ្សែច្រវាក់ផ្គត់ផ្គង់។ ទោះជាយ៉ាងណា ការស្ទង់មតិពីក្រុមមេដឹកនាំធុរកិច្ចនេះបានបង្ហាញថា ប្រទេសចិនទំនងជារក្សាតួនាទីដ៏សំខាន់នៅក្នុងខ្សែច្រវាក់ផ្គត់ផ្គង់របស់ពិភពលោកដដែល។
ខណៈដែលក្រុមហ៊ុនធំៗនៅក្នុងប្រទេសចិនកំពុងស្វែងរកកន្លែងបើកអាជីវកម្មជំនួស ទីតាំងនៅតំបន់អាស៊ានដែលមានសមាជិក១០ប្រទេស និងប្រទេសឥណ្ឌាទំនងជាមានឱកាសច្រើន ដើម្បីចាប់យកឱកាសមួយនេះ។ អាស៊ីខាងត្បូង និងអាស៊ានគឺជាប្រទេសមានចំនួនប្រជាជនដ៏ច្រើន និងមានសេដ្ឋកិច្ចកំពុងរីកចម្រើន ដែលអាចផ្តល់ឱកាសរកប្រាក់បានច្រើនដល់ប្រទេសចម្រុះជាតិសាសន៍ដែលចូលមកក្នុងប្រទេសទាំងនោះដោយឥណ្ឌាមានប្រជាជនជាង១ពាន់៤រយលាននាក់ ខណៈដែលអាស៊ីអាគ្នេយ៍មានជាង៦៥០លាននាក់៕
អត្ថបទ៖ សុខ មង្គល
