ក្រសួងការបរទេសនិងសហប្រតិបត្តិការអន្តរជាតិ បាននិយាយក្នុងសេចក្តីជូនព័ត៌មាន នៅថ្ងៃទី១១ ខែមិថុនា ឆ្នាំ២០២០នេះ ថា គម្រោងនេះបានកើតឡើងបន្ទាប់ពីការសន្ទនាតាមទូរស័ព្ទជាមួយនាយករដ្ឋមន្រ្តីឥណ្ឌា គឺលោក ណារិនដ្រា ម៉ូឌី អំពីការរួមគ្នាប្រយុទ្ធប្រឆាំងនឹងជំងឺកូវីដ១៩ ក៏ដូចជាទំនាក់ទំនងទ្វេភាគី និងតំបន់។
សេចក្តីជូនព័ត៌មាននោះ បាននិយាយដូច្នេះថា “យន្តហោះមួយគ្រឿងនឹងដឹកពលរដ្ឋនិងនិស្សិតកម្ពុជា ចំនួន៦០នាក់ ពីឥណ្ឌា មកកម្ពុជាវិញ នៅថ្ងៃទី១២ ខែមិថុនានេះ ហើយពលរដ្ឋឥណ្ឌា នឹងត្រលប់ទៅស្រុកវិញ តាមជើងយន្តហោះនៅព្រឹកថ្ងៃទី១១ ខែមិថុនានេះ និងមួយជើងទៀត នៅថ្ងៃទី១៩ ខែ មិថុនា ដែលមានចំនួនសរុប ២៨០នាក់។”
សេចក្តីជូនព័ត៌មាននោះ បានបន្តថា “ថ្នាក់ដឹកនាំទាំងពីរឯកភាពគ្នាថា ដំណើរទៅមុខដើម្បីស្តារស្ថានភាពសេដ្ឋកិច្ចសង្គម ក្រោយកូវីដ១៩ ទាមទារឲ្យមានកិច្ចសហប្រតិបត្តិការនិងការសម្របសម្រួលជាអន្តរជាតិកាន់តែខ្លាំងជាងមុន៕”
