ទីភ្នាក់ងារប្រយុទ្ធប្រឆាំងនឹងឧក្រិដ្ឋកម្មហិរញ្ញវត្ថុរបស់ប្រទេសឥណ្ឌា រួមជាមួយនាយកដ្ឋានអនុវត្តច្បាប់ បាននិងកំពុងស៊ើបអង្កេតការអនុវត្តអាជីវកម្មរបស់ក្រុមហ៊ុនចិន Xiaomi ជុំវិញការសង្ស័យថាមានការរំលោភបំពានច្បាប់ ទាក់ទងនឹងការផ្ញើរប្រាក់ចេញពីទេសឥណ្ឌាទៅកាន់បរទេស។
ទីភ្នាក់ងារនេះបានបញ្ជាក់ទៀតថា ខ្លួនបានរឹបអូសទ្រព្យសម្បត្តិដែលមាននៅក្នុងគណនីធនាគារពីក្រុមហ៊ុន Xiaomi Technology India Private Limited បន្ទាប់ពីបានរកឃើញថា ក្រុមហ៊ុនចិនមួយនេះ បានផ្ញើរូបិយបណ្ណបរទេសដែលមានតម្លៃសរុបប្រមាណជាង ៧២៥ លានដុល្លារ ទៅអង្គភាពដែលមានមូលដ្ឋាននៅបរទេសចំនួន៣ រួមទាំងក្រុមហ៊ុនមេ Xiaomi ក្នុងប្រទេសចិនផងដៃរ ដោយបន្លំធ្វើជាការបង់ថ្លៃសួយសារអាករ (Royalty Fee)។
អតីតប្រធានក្រុមហ៊ុន Xiaomi India លោក Manu Jain ត្រូវបានកោះហៅដោយក្រុមប្រឹក្សាភិបាលនៅដើមឆ្នាំនេះសម្រាប់ការសាកសួរជុំវិញការអនុលោមតាមច្បាប់ទាក់ទងនឹងពន្ធ និងរចនាសម្ព័ន្ធក្រុមហ៊ុន។
យ៉ាងណាមិញ ក្រុមហ៊ុន Xiaomi បាននិយាយនៅក្នុងសេចក្តីថ្លែងការណ៍មួយកាលពីចុងសប្តាហ៍នេះថា ខ្លួនជឿថា ការទូទាត់ថ្លៃសួយសារអាកររបស់ខ្លួនគឺស្របច្បាប់ ស្របតាម អាជ្ញាប័ណ្ណបច្ចេកវិទ្យាដែលមាន និងលេខសម្គាល់ IPs ដែលប្រើនៅក្នុងផលិតផលនៅប្រទេសឥណ្ឌា ។
អត្ថបទគួរអាន
គួរកត់សម្គាល់ថា ក្រុមហ៊ុន Xiaomi បានកែលម្អសេរីស្មាតហ្វូន ទូរទស្សន៍ឆ្លាតវៃ និងថេប្លេតរបស់ខ្លួនជាមួយនឹងម៉ូដែលថ្មីនៅក្នុងប្រទេសឥណ្ឌាយ៉ាងឆាប់រហ័ស ដែលបានគ្រប់គ្រង ២៣% នៃចំណែកទីផ្សារស្មាតហ្វូនក្នុងស្រុក បើគិតនៅក្នុងត្រីមាសទី១នៅឆ្នាំនេះ នេះបើយោងតាមក្រុមហ៊ុនស្រាវជ្រាវទីផ្សារ Counterpoint ។
គួរជម្រាបថា ក្រុមហ៊ុន Xiaomi បានទទួលរងផលប៉ះពាល់ប្រជាប្រិយភាពរបស់ខ្លួនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីប្រទេសឥណ្ឌាបានហាមប្រាមកម្មវិធីរបស់ចិន ក្រោមហេតុផលការពារមិនឲ្យមានការបែកធ្លាយទិន្នន័យដែលប៉ះពាល់ដល់សន្តិសុខជាតិឥណ្ឌា។ រដ្ឋាភិបាលទីក្រុងញ៉ូដេលី ក៏បានចេញវិធានការឲ្យ ក្រុមហ៊ុនXiaomi ប្តូរឈ្មោះហាងរបស់ខ្លួនជាច្រើននៅក្នុងប្រទេសឥណ្ឌាកាលពី ២ ឆ្នាំមុន ជាមួយនឹងការបិទបដាបញ្ជាក់ថា ផលិតផលផលផលិតនៅឥណ្ឌា (Made in India) ដែលវាជាចលនាមួយនេះ ដែលត្រូវបានអ្នកវិភាគបានលើកឡើងថា គឺជាការប៉ុនប៉ងរបស់ប្រទេសឥណ្ឌាក្នុងការកាត់បន្ថយឥទ្ធិពលក្រុមហ៊ុនមេពីប្រទេសចិន៕
អត្ថបទ៖ វ៉ាន់ ស្រីរ័ត្ន
None
