ការផ្អាកការនាំចេញដូងប្រេងរបស់ឥណ្ឌូនេស៊ីនេះ គឺដើម្បីឆ្លើយតបទៅនឹងការកើនឡើងនៃតម្លៃប្រេងឆានៅក្នុងស្រុក ប៉ុន្ដែ វាបាននាំតម្លៃប្រេងឆាពិភពលោកកំពុងហក់ឡើងកាន់តែខ្ពស់ផងដែរ។
យោងតាមលិខិតរបស់អគ្គនាយកដ្ឋានចម្ការដំណាំរបស់ក្រសួងកសិកម្មឥណ្ឌូនេស៊ីចុះកាលបរិច្ឆេទនៅថ្ងៃច័ន្ទបានឱ្យដឹងថា បម្រាមនាំចេញនេះ នឹងត្រូវដាក់តែលើដូងប្រេងដែលចម្រាញ់ បន្សុទ្ធ និងបំបាត់ក្លិនរួចហើយដូចបានកំណត់ន័យថាជា "វត្ថុធាតុដើមសម្រាប់ប្រេងឆា"តែប៉ុណ្ណោះ ចំណែកប្រេងដូងឆៅ គឺមិនត្រូវបានកំណត់នៅក្នុងការហាមឃាត់នាំចេញក្នុងលិខិតនេះនោះទេ។
ដូងប្រេងគឺជាទំនិញនាំចេញច្រើនបំផុតមួយរបស់ប្រទេសឥណ្ឌូនេស៊ី ហើយតម្លៃរបស់ប្រេងដូងបានកើនឡើងចាប់តាំងពីចុងឆ្នាំមុនមកម្ល៉េះ ហើយបានបន្តកើនឡើងថែមទៀត ចំពេលមានការរំខានដល់ការផ្គត់ផ្គង់ប្រេង ដែលអាចបរិភោគបាននេះដោយសារសង្គ្រាមនៅអ៊ុយក្រែន។
ប្រេងដូងឆៅ បង្កើតគឺមានរួមចំណែកភាគច្រើននៃការនាំចេញទាក់ទងនឹងប្រេងដូងរបស់ប្រទេសឥណ្ឌូនេស៊ី ហើយបើយោងតាមស្ថិតិអាស៊ានបានបង្ហាញថា ប្រេងដូងអូឡេន (olein) មានចំនួនប្រហែល ២០% នៃការនាំចេញប្រេងដូងសរុបរបស់ឥណ្ឌូនេស៊ីនៅក្នុងឆ្នាំ២០២០។
លោកប្រធានាធិបតីឥណ្ឌូនេស៊ី Widodo បាននិយាយកាលពីសប្តាហ៍មុនថា ការហាមឃាត់លើការនាំចេញ "ប្រេងឆាក៏ដូចជាវត្ថុធាតុដើមនៃប្រេងចម្អិនអាហារនេះ" នឹងចូលជាធរមាននៅថ្ងៃព្រហស្បតិ៍សប្ដាហ៍នេះ ។
អត្ថបទគួរអាន
បន្ទាប់ពីការសម្រេចចិត្តរបស់លោក Widodo រួចហើយ សន្ទស្សន៍តម្លៃនៅលើតារាងផ្លាស់ប្តូរតម្លៃរបស់ម៉ាឡេស៊ី Bursa Malaysia បានបង្ហាញពីការឡើងថ្លៃប្រេងដូងប្រហែល ៦% កាលពីថ្ងៃចន្ទពោលគឺវាបានកើនឡើងដល់ចំណុចខ្ពស់បំផុតមិនធ្លាប់មានចាប់តាំងពីដើមខែមីនា។
លោក ប៊ីម៉ា យុទ្ធិស្ទីរ៉ា (Bhima Yudhistira) អ្នកវិភាគសេដ្ឋកិច្ចនៅមជ្ឈមណ្ឌលសិក្សាច្បាប់និងសេដ្ឋកិច្ច (Center of Economic and Law Studies) នៅទីក្រុងហ្សាកាតាប្រទេសឥណ្ឌូនេស៊ីបាននិយាយថា «គោលនយោបាយហាមឃាត់ការនាំចេញនេះគឺមិនបានត្រៀមខ្លួនច្រើននោះទេ ហើយក៏មិនមែនជាទំនាក់ទំនងល្អនោះដែរ»។
មន្ត្រីជំនាញរូបនេះបានបញ្ជាក់ថា ប្រសិនបើប្រេងដូងឆៅនឹងមិនត្រូវបានហាមឃាត់ឱ្យនាំចេញបន្ទាប់ពីការប្រកាសនេះមែននោះ អ្វីដែលកើតឡើងនៅពេលនោះគឺថាអ្នកផលិតអាចចាប់យកតម្រូវការនាំចេញយ៉ាងខ្លាំង ដោយពួកគេមិនចាំបាច់កែច្នៃវាឱ្យទៅជាប្រេងឆានោះទេ គឺនាំចេញដូងប្រេងឆៅវិញម្ដង ដូច្នេះវិធានការនេះ ទំនងជាមិនអាចដោះស្រាយបញ្ហាខ្វះខាតប្រេងឆាបាននោះទេ ជាហេតុធ្វើឱ្យតម្លៃប្រេងឆានៅតែកើនឡើងជាដដែល៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
