សេដ្ឋវិទូរបស់ស្ថាប័ន Goldman Sachs លោក ចូសេប ប្រីង (Joseph Briggs) បាននិយាយថា មេរោគបំប្លែងខ្លួនថ្មី អូមីក្រុង អាចនឹងធ្វើឲ្យការបើកសេដ្ឋកិច្ចឡើងវិញមានសភាពយឺតយ៉ាវ ប៉ុន្ដែ ស្ថាប័នរិញ្ញវត្ថុនេះ មើលឃើញថា វាអាចនឹងមានការធ្លាក់ចុះតិចតួចប៉ុណ្ណោះទៅលើការសេវាចំណាយនានា។
ស្ថាប័នហិរញ្ញវត្ថុអន្តរជាតិ Goldman Sachs បានមើលឃើញថា កំណើនផលិតផលក្នុងស្រុកសរុបរបស់សហរដ្ឋអាមេរិក នៅឆ្នាំ២០២២ អាចនឹងមានក្នុងអត្រា ៣,៨%ប៉ុណ្ណោះ ធ្លាក់ចុះពី ៤,៧% ដែលធ្លាប់បានព្យាករពីមុន។
សេដ្ឋវិទូបានលើកឡើងថា ខណៈដែលនៅមានភាពមិនច្បាស់លាស់ច្រើន ដូច្នេះហើយ ស្ថាប័ន Goldman Sachs បានព្យាករសេដ្ឋកិច្ចអាមេរិកនៅក្នុងកម្រិតធ្លាក់ចុះជាមធ្យមតែប៉ុណ្ណោះ នៅគ្រាដែលមេរោគរាតត្បាតមានការកើនឡើងលឿន ហើយភាពស៊ាំក្នុងសហគមន៍បានចុះខ្សោយក្នុងកម្រិតទាប។
បញ្ហាកង្វះខាតកម្លាំងការងារនៅអាមេរិក អាចនឹងបន្ដមានយូរទៀត ប្រសិនបើពលរដ្ឋអាមេរិកមិនអាចត្រឡប់មកធ្វើការបានងាយស្រួលដូចមុន ព្រោះតែមេរោគបំប្លែងថ្មី កំពុងដាក់សម្ពាធកាន់តែខ្លាំង។
អត្ថបទគួរអាន
ស្ថាប័ន Goldman Sachs បានចង្អុលបង្ហាញថា មេរោគបំប្លែងថ្មី អាចនឹងធ្វើឲ្យប៉ះពាល់ធ្ងន់ធ្ងរដល់ខ្សែចង្វាក់ផ្គត់ផ្គង់ ដោយសារតែប្រទេសជាច្រើននឹងដាក់វិធានការរឹតត្បិតតឹងរឹង ប៉ុន្ដែ ការបង្កើនការចាក់វ៉ាក់សាំងនៅក្នុងចំណោមប្រទេសជាដៃគូពាណិជ្ជកម្មបរទេសរបស់អាមេរិក ក៏អាចនឹងជួយទប់ទល់នឹងការរំខានធ្ងន់ធ្ងរនៃខ្សែចង្វាក់ផ្គត់ផ្គង់ផងដែរ។
សូមបញ្ជាក់ថា ការព្យាកររបស់ស្ថាប័ន Goldman sachs គឺធ្វើឡើយបន្ទាប់ពី ថ្នាក់ដឹកនាំរបស់អង្គការមូលនិធិរូបិយវត្ថុអន្តរជាតិ ថ្មីៗនេះ ក៏បានបង្ហើបឲ្យដឹងដែរថា ស្ថាប័នរបស់ខ្លួន នឹងអាចប៉ាន់ប្រមាណកំណើនសេដ្ឋកិច្ចពិភពលោកទាបជាងមុនផងដែរ ដោយសារតែផលប៉ះពាល់ដែលបង្កឡើងដោយ ដោយសារកូវីដ១៩បំប្លែងថ្មី អូមីក្រុង។
None
