វត្តមានមេរោគបំប្លែងថ្មីនេះ បានធ្វើឲ្យអ្នកវិនិយោគនៅផ្សារភាគហ៊ុន និងតម្លៃប្រេងឆៅ មានក្ដីបារម្ភកាន់តែខ្លាំងឡើង ដោយក្នុងនោះ ពួកគេក៏បារម្ភពីការផ្គត់ផ្គង់ប្រេងអាចនឹងមានលើសតម្រូវការនៅក្នុងត្រីមាសទី១នៅឆ្នាំក្រោយនេះ។ នេះបើយោងតាមសារព័ត៌មានអន្តរជាតិធំៗជាច្រើនចុះផ្សាយ។
ការធ្លាក់ចុះនៃតម្លៃប្រេងឆៅគឺកំពុងដើរស្របទៅនឹងទីផ្សារភាគហ៊ុនសកលក៏កំពុងដាំក្បាលចុះដូចគ្នាដែរ នៅប៉ុន្មានមកថ្ងៃនេះ ដោយសារតែភ័យខ្លាចនៃមេរោគកូវីដ១៩បំប្លែងខ្លួនថ្មី ឈ្មោះថា អូមីក្រុង ដែលអាចធ្វើឲ្យបន្ទច់បង្អាក់ដល់កំណើនសេដ្ឋកិច្ច និងតម្រូវការប្រេងឥន្ធនៈ។
នៅប៉ុន្មានថ្ងៃមកនេះ គេឃើញបណ្ដាប្រទេសជាច្រើនពិសេសនៅតំបន់អឺរ៉ុប អាមេរិក រួមទាំងប្រទេសប្រទេសមួយចំនួននៅអាស៊ីរួមទាំងថៃ និងសិង្ហបុរី ក៏បានប្រកាសដាក់ការរឹតត្បិតលើការធ្វើដំណើរពីប្រទេសតំបន់អាហ្វ្រិកមួយចំនួនឡើងវិញ ដើម្បីទប់ស្កាត់ការឆ្លងមេរោគបំប្លែងថ្មីនេះ។ បើតាមអ្នកវិទ្យាសាស្ត្របានព្រមានថា មេរោគបំប្លែងថ្មី អូមីក្រុង អាចមានសមត្ថភាពឆ្លងខ្ពស់ជាងមេរោគបំប្លែងថ្មីឌែលតាទៅទៀត ហើយអង្គការសុខភាពពិភពលោកក៏បានកំណត់រួចហើយថា មេរោគបំប្លែងថ្មី អូមីក្រុង គឺជាមេរោគមួយប្រភេទ ដែលមានសមត្ថភាពចម្លងលឿនរហ័សគួរឲ្យព្រួយបារម្ភ។
អត្ថបទទាក់ទង
ទីផ្សារភាគហ៊ុន ពិសេសទីផ្សារប្រេងឆៅរង្គោះរង្គើដាំក្បាលចុះគួរឲ្យកត់សម្គាល់នៅប៉ុន្មានថ្ងៃមកនេះ ក្រោយពីមានការរកឃើញមេរោគបំប្លែងថ្មី អូមីក្រុង តួយ៉ាង តម្លៃប្រេងឆៅនៅទីផ្សារអង់គ្លេសកាលពីចុងសប្ដាហ៍មុននេះ បានធ្លាក់ចុះ ៩ដុល្លារ៥០សេន ឬស្មើនឹងអត្រាធ្លាក់ចុះ ១១,៦% ក្នុងមួយធុងបារ៉ែល នាំឲ្យតម្លៃប្រេងឆៅនៅមានត្រឹមតែ ៧២ដុល្លារ ៧២សេនប៉ុណ្ណោះក្នុងមួយធុងបារែល ខណៈដែលទីផ្សារប្រេងអង់គ្លេសនេះ ក៏ទើបតែមានការធ្លាក់ចុះប្រចាំសប្ដាហ៍ប្រមាណជាង៨%រួចហើយដែរ។
នៅទីផ្សារប្រេងឆៅអាមេរិកវិញ មានការធ្លាក់ចុះតម្លៃប្រេងអស់១០ដុល្លារ ២៤សេន ឬស្មើនឹងអត្រាធ្លាក់ចុះ ជាង១៣% ក្នុងមួយធុងបារ៉ែលដែរ ពោលគឺតម្លៃប្រេងឆៅនៅទីផ្សារមួយនេះ នៅមានត្រឹមតែ ៦៨ដុល្លារ ១៥សេនប៉ុណ្ណោះ ក្នុងមួយធុងបារ៉ែល ខណៈដែលការធ្លាក់ចុះប្រចាំសប្ដាហ៍មានដល់ជាង ១០%។
តម្លៃប្រេងឆៅពិភពលោកធ្លាក់ចុះ នេះ ក៏ធ្វើឡើងនៅក្រោយពេលដែលប្រទេសមហាអំណាចសេដ្ឋកិច្ចធំៗ បានព្រមព្រៀងគ្នាក្នុងការបញ្ចេញស្ដុកប្រេងឆៅដែលខ្លួនបម្រុងទុកទៅលើទីផ្សារផងដែរ។ ក្នុងនោះ អាមេរិកបានប្រកាសនឹងបញ្ចេញស្ដុកប្រេងបម្រុងដល់ទៅ ៥០លានបារែលឯណោះ ដើម្បីធ្វើយ៉ាងណាឲ្យតម្លៃប្រេងនៅលើទីផ្សារមានការធ្លាក់ចុះទាបមកវិញ៕
