ក្នុងចំណោមសាលាឯកជនល្បីៗជាច្រើនដែលមានវត្តមាននៅកម្ពុជាទាំងនោះដែរ Learning Jungle ក៏ជាសាលាអន្តរជាតិឯកជនមួយ ដែលត្រូវបានអាណាព្យាបាលទទួលស្គាល់ពីគុណភាព និងស្តង់ដា ថា មិនចាញ់សាលាឯកជនល្បីៗដទៃទៀតនៅកម្ពុជានោះទេ ព្រោះថា ស្តង់ដាកម្មវិធីសិក្សានៅសាលានេះ គឺតាមបែបប្រទេសកាណាដា។
លោក លី វីរៈ ប្រធានក្រុមប្រឹក្សាភិបាលនៃសាលា West view Cambodian International school បានឲ្យដឹងថា មុននឹងបើកសាលាថ្មីដែលមានឈ្មោះថា West view Cambodian International schoolនេះ គឹលោកមានបទពិសោធន៍ផ្នែកអប់រំពីថ្នាក់មតេយ្យរហូតដល់ថ្នាក់បឋមសិក្សា គឺសាលា Learning Jungle ។ លោកបានបន្តថា ការវិនិយោគលើវិស័យនេះ ព្រោះតែលោកចង់ផ្តល់ការអប់រំមួយប្រកបដោយគុណភាព ដែលមានបញ្ចូលកម្មវិធីសិក្សាភាសាខ្មែរផងដែរ ដើម្បីឲ្យសិស្សដែលមកសិក្សានៅទីនេះ មិនត្រឹមតែចេះប្រើប្រាស់ភាសាបរទេសបានល្អទេ ថែមទាំងចេះពីភាសាជាតិ ប្រវត្តិសាស្រ្ត និងសុជីវធម៌ផ្សេងៗ ថែមទៀតផង។
អត្ថបទទាក់ទង!
ចំពោះការបើកកម្រិតសិក្សាថ្នាក់វិទ្យាល័យបន្តទៀតវិញ លោកបានឲ្យដឹងថា ដោយសារតែ Franchise របស់ Learning Jungle មានត្រឹមតែថ្នាក់បឋមសិក្សា ខណៈដែលគោលដៅរបស់ក្រុមប្រឹក្សាភិបាលរបស់សាលា Learning Jungle ចង់ពង្រីកការអប់រំដល់ថ្នាក់វិទ្យាល័យ។ដូចនេះ ឆ្លងតាមបទពិសោធន៍ជោគជ័យលើផ្នែកអប់រំរយៈពេល៥ឆ្នាំ រួមជាមួយនឹងការសំណូមពរពីអាណាព្យាបាលសិស្សផងនោះ បានផ្តល់ជំនឿចិត្តយ៉ាងមុតមាំ ជំរុញឲ្យក្រុមប្រឹក្សារបស់សាលាអន្តរជាតិ Learning Jungle បន្តបង្កើតកម្រិតសិក្សានៅថ្នាក់វិទ្យាល័យបន្ថែមទៀត។ហើយសាលាថ្មីនេះ គ្រោងនឹងដាក់ពាក្យស្នើសុំការទទួលស្គាល់ជាអន្តរជាតិពីស្ថាប័ន WAAC ពីសហរដ្ឋអាមេរិក និងស្ថាប័ន CIS ពីអឺរ៉ុប ដោយរក្សាការសិក្សាភាសាជាតិ តាមកម្មវិធីសិក្សារបស់ក្រសួងអប់រំដូចថ្នាក់បឋមផងដែរ។
តាមទស្សនៈរបស់លោក លី វីរៈ ជុំវិញកម្រិតគុណភាពវិស័យអប់រំរបស់កម្ពុជា ប្រៀបធៀបជាមួយប្រទេសជិតខាងវិញ លោកបានទទួលស្គាល់ថា វិស័យអប់រំកម្ពុជាដើរយឺតជាងប្រទេសជិតខាងដូចជាថៃ និងវៀតណាមជាដើម ដោយសារកត្តាសង្រ្គាមក្នុងប្រវត្តិសាស្រ្ត តែយ៉ាងណាមិញក៏គ្រាន់បើជាងឡាវដែរ។
បែបនេះក្តី ក្នុងនាមជាសហគ្រិនលើវិស័យអប់រំមួយរូប លោក លី វីរៈ បានបង្ហាញ ពីទឹកចិត្តមោះមុតក្នុងការប្តេជ្ញាចិត្តជួយវិស័យអប់រំក្នុងប្រទេសឲ្យកាន់តែល្អប្រសើរថែមទៀត ដោយគោលដៅចម្បងរបស់លោក និងក្រុមប្រឹក្សាដទៃទៀត គឹមិនមែនប្រាក់ចំណេញទេ តែជាការជួយពន្លឿនដល់វិស័យអប់រំឲ្យទាន់ប្រទេសអភិវឌ្ឍន៍មួយចំនួនទៀត។
លោកបន្ដថា ថ្វីត្បិតតែខ្ញុំជាសហគ្រិនមែន តែខ្ញុំបានជ្រើសរើសយកវិស័យអប់រំ ដោយគោលដៅចម្បងរបស់ខ្ញុំមិនមែនប្រាក់ចំណេញទេ។ លោកជាអតីតនិស្សិតដែលទទួលបានអាហាររូបករណ៍ទៅសិក្សានៅក្រៅប្រទេស ដោយមានបទពិសោធន៍ផ្ទាល់ខ្លួន ពេលដែលចេញពីប្រទេសកម្ពុជាទៅឃើញវិស័យនេះ នៅមានភាពខ្វះខាត ដូចនេះលោកក៏សន្យានឹងខ្លួនឯងថា នឹងត្រលប់មកជួយប្រទេសនេះវិញ ឲ្យអ្នកជំនាន់ក្រោយ ទទួលបានអ្វីដែលប្រសើជាងនេះ។
សហគ្រិនវ័យក្មេងរូបនេះ បានបន្ថែមថា ដើម្បីប្រព័ន្ធអប់រំល្អ គឺយើងត្រូវការច្រើនណាស់ ប៉ុន្តែអ្វីដែលយើងឃើញបន្ថែមទៀតនោះគឺ កម្រិតគ្រូភាសាខ្មែរ យើងគិតថា មិនទាន់គ្រប់គ្រាន់នៅឡើយ។ យើងចង់បានគ្រូដែលមានគរុកោស្យល្អត្រឹមត្រូវ ហើយអាចប្រើប្រាស់ភាសាអង់គ្លេសបានល្អ និងត្រូវចេះប្រើកុំព្យូរទ័រថែមទៀត ទោះបីជាគាត់ជាគ្រូភាសាខ្មែរក៏ដោយ។ ហើយបច្ចុប្បន្ន គឺយើងកំពុងជួបការលំបាក ដោយសារខ្វះគ្រូផ្នែកប្រវត្តិវិទ្យាសង្គមវិទ្យា ឬភាសាខ្មែរជាដើម ដែលមានសមត្ថភាពគ្រប់គ្រាន់ក្នុងការបង្រៀន។
រយៈពេល៥ឆ្នាំ ដែលលោក លី វីរៈវិនិយោគទៅលើវិស័យអប់រំ គឹលោកបានកំណត់គោលដៅថាគឺ គ្មានសិស្សណាម្នាក់ត្រូវរត់ពីក្រោយគេនោះទេ គឺមានន័យថា មិនត្រូវឲ្យមានសិស្សណាម្នាក់រៀនខ្សោយខ្លាំង នៅក្នុងថ្នាក់ជាដាច់ខាត។ ដូចនេះលោកតែងតែបើកិច្ចប្រជុំរាល់ថ្ងៃ ដើម្បីដឹងថា ត្រូវធ្វើដូចម្តេច ក្នុងការសម្រេចឲ្យបានដល់គោលដៅនោះ។ ចំពោះយុទ្ធសាស្រ្តវិញ គឺត្រូវកសាងទំនាក់ទំនង និងស្តាប់មតិយោបល់របស់អាណាព្យាបាល។ បើតាមលោក លី វីរៈ បច្ចុប្បន្ននេះ ស្ថាប័នរដ្ឋាភិបាលមានការលើកទឹកចិត្ត ដល់ស្ថាប័នអប់រំផ្នែកឯកជនខ្លះដែរ ដោយលោកបានចូលជាសមាជិកសមាគមថ្នាក់ឧត្តមសិក្សាដោយទទួលបានការលើកលែងពន្ធមួយចំនួនផងដែរ។
អត្ថបទគួរឲ្យចាប់អារម្មណ៍!
សម្រាប់ជំនាញសិក្សាវិញ សហគ្រិនផ្នែកវិស័យអប់រំមួយ យល់ឃើញថា ប្រទេសដែលជឿនលឿន គឺវិស័យអប់រំគេខ្លាំង។ បើចង់ឲ្យវិស័យអប់រំយើងខ្លាំងដូចគេដែរ គឹត្រូវសិក្សាពីជំនាញវិទ្យាសាស្រ្ត តែជំនាញនេះ
នៅមានភាពខ្វះខាតនៅឡើយដូចជា Engeenering និងTechnology ជាដើម។ ដូចនេះ ដើម្បីតាមឲ្យទាន់នូវការវិវត្តរបស់ពិភពលោក ទាំងសាលារដ្ឋនិងសាលាឯកជនទាំងអស់ ត្រូវផ្តោតលើការសិក្សាជំនាញ STEM ដោយនៅក្នុងនោះក៏ត្រូវមានការជំរុញពីអាណាព្យាបាលផងដែរ។។
ក្នុងនាមជាសហគ្រិនក្នុងស្រុក ដែលស្រលាញ់ខាងការអប់រំ លោក លី វីរៈ ចង់ឲ្យយុវសិស្សគ្រប់ៗរូប ខំប្រឹងប្រែងក្នុងការសិក្សារៀនសូត្រឲ្យបានខ្លាំង ពង្រឹងវិន័យខ្លួនឯង ហើយក៏ត្រូវមានសីលធម៌ផងដែរ។ បន្ទាប់មកទៀត គឺធ្វើតាមក្តីសុបិនរបស់ខ្លួននៅមាគ៌ាមួយដ៏ត្រឹមត្រូវ។ គោលដៅដ៏ធំបំផុតរបស់លោកគឹ ចង់ឃើញសាលាដែលទើបបង្កើតថ្មីនៅថ្នាក់វិទ្យាល័យនេះទទួលបានជោគជ័យ ដោយលោកប្តេជ្ញានឹងបន្ត បណ្តុះបណ្តាលធនធានមនុស្សនៅកម្ពុជា ឲ្យអស់ពីសមត្ថភាព ដោយគិតពីគុណភាពជាចម្បង៕
None
