ក្រុមហ៊ុនមូលបត្រ MB ដែលមានមូលដ្ឋាននៅទីក្រុងហូជីមិញបានឲ្យដឹងថា ការចេញមូលបត្របំណុលធនាគារនៅវៀតណាម នៅឆ្នាំ២០២៤នេះ រំពឹងថា នឹងមានការកើនឡើងប្រមាណជា១៤០%។ មូលបត្របំណុលដែលចេញដោយធនាគារនានា មានអត្រាការប្រាក់ជាមធ្យមប្រមាណជា៥,៤% និងមានកាលកំណត់រយៈពេល៤ឆ្នាំ។
ស្ថាប័នធនាគារដែលឈានមុខគេក្នុងការបញ្ចេញកញ្ចប់មូលបត្របំណុលនៅវៀតណាម គឺមានធនាគារ Techcom bank ដោយបានចេញមូលបត្របំណុលមានតម្លៃដល់ទៅប្រមាណ៦៧៧លានដុល្លារ, បន្ទាប់មកគឺមានធនាគារ ACB ដែលបានបញ្ចេញមានតម្លៃជាង៤៧៨លានដុល្លារ ហើយក្រុមហ៊ុនមូលបត្រ MB បានបញ្ចេញរហូតដល់៣៥៤លានដុល្លារ។
ការកើនឡើងនៃការចេញមូលបត្របំណុលនេះ ត្រូវបានគេរំពឹងថា នឹងជួយលើកកម្ពស់សមត្ថភាពរបស់ធនាគារសម្រាប់ធានាមូលធន និងលំហូរសាច់ប្រាក់របស់ធនាគាររយៈពេលមធ្យម និងរយៈពេលវែង ដែលគាំទ្រដល់ឥណទាននៅក្នុងឆមាសទីពីរនៃឆ្នាំ២០២៤នេះ។
ក្រៅពីធនាគារ វិស័យអចលនវត្ថុ ក៏ជាអ្នកបញ្ចេញមូលបត្រដ៏ធំមួយផងដែរ ដែលមានតម្លៃសរុបប្រមាណ១ពាន់៣រយលានដុល្លារក្នុងអត្រាការប្រាក់ជាមធ្យម១២ភាគរយ ដែលមានការកើនឡើងទ្វេដងនៃអត្រាសន្សំបច្ចុប្បន្ន។
ដោយឡែកទិន្នន័យពីសមាគមទីផ្សារមូលបត្រវៀតណាម (VBMA) បានបង្ហាញថា ការចេញមូលបត្របំណុលសាជីវកម្មសរុបនៅក្នុងប្រទេសវៀតណាម បានកើនឡើងប្រមាណជាង៦ពាន់៣រយលានដុល្លារនៅឆ្នាំនេះ ក្នុងនោះជិត៦ពាន់លានដុល្លារ គឺបានចេញដោយឯកជន ខណៈដែលសាធារណៈគឺមានត្រឹមតែ ជាង៤៧០លានដុល្លារប៉ុណ្ណោះ។
នៅក្នុងស្ថានភាពបែបនេះអ្នកវិភាគ បានព្រមានថា ទីផ្សារមូលបត្របំណុលសាជីវកម្មកំពុងប្រឈមមុខនឹងបញ្ហាដែលមិនធ្លាប់មានពីមុនមក ដោយសារការត្រួតពិនិត្យមិនគ្រប់គ្រាន់ពីភ្នាក់ងាររដ្ឋ ស្របពេលដែល តម្លៃសរុបនៃមូលបត្របំណុលដែលមិនមានសុពលភាព គឺមានប្រហែលជាង៨ពាន់៣រយលានដុល្លារនៅក្នុងនោះ វិស័យអចលនទ្រព្យមានទំហំរហូតដល់ជិត៧០%៕
ដោយៈ សរ សុជាតិ
