កញ្ចប់ថវិកាបន្ថែមរបស់រាជរដ្ឋាភិបាលជប៉ុន សម្រាប់ឆ្នាំសារពើពន្ធ២០២០បានកំណត់ទឹកប្រាក់ប្រមាណ២២១លានដុល្លារ ទុកសម្រាប់ផ្ដល់ជូនក្រុមហ៊ុនទាំងឡាយណាដែលផ្លាស់ប្តូរផលិតកម្មរបស់ខ្លួនចេញពីប្រទេសចិន ទៅកាន់ប្រទេសតំបន់អាស៊ីអាគ្នេយ៍។ បន្ថែមពីនេះ នៅពេលដែលក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បានបើកឲ្យមានការស្នើសុំរើផលិតកម្មពីប្រទេសចិននៅជុំទី២នេះ ក៏បានបន្ថែមគម្រោងដែលរួមចំណែកដល់ភាពធន់នៃខ្សែចង្វាក់ផ្គត់ផ្គង់ជប៉ុន-អាស៊ាន ទៅក្នុងបញ្ជីនៃការផ្លាស់ប្តូរដ៏ត្រឹមត្រូវ ហើយរាជរដ្ឋាភិបាលជប៉ុន ព្រមទាំងបានមើលឃើញពីការផ្លាស់ប្តូរផលិតកម្មពីប្រទេសចិន ទៅកាន់ប្រទេសផ្សេងទៀត ដូចជាឥណ្ឌា និងបង់ក្លាដេសផងដែរ។
សម្រាប់ការឧបត្ថម្ភធនពីរដ្ឋនេះ រោងចក្ររបស់ជប៉ុនដែលរើសពីប្រទេសចិន អាចនឹងទទួលបានការឧបត្ថម្ភធនលើការសិក្សាពីលទ្ធភាព និងកម្មវិធីសាកល្បង ហើយបើគិតជាចំនួនទឹកប្រាក់សរុបសម្រាប់ការឧបត្ថម្ភធនសម្រាប់ក្រុមហ៊ុននីមួយៗអាចនឹងមានដល់រាប់សិបលានដុល្លារអាមេរិក។
អត្ថបទទាក់ទង!
ការជួយឧបត្ថម្ភធនសម្រាប់រោងចក្រជប៉ុនឲ្យរើចេញពីប្រទេសចិននេះ គឺក្នុងគោលបំណងកាត់បន្ថយការពឹងផ្អែកខ្លាំងលើខ្សែចង្វាក់ផ្គត់ផ្គង់តែពីប្រទេសចិន ហើយជាការធានាឲ្យបាននូវស្ថិរភាពផលិតផលដូចជាគ្រឿងផ្គត់ផ្គង់វេជ្ជសាស្ត្រ និងគ្រឿងបង្គុំអគ្គិសនីជាដើម។
សម្រាប់ការឧបត្ថម្ភធនជុំទី១ ដែលបានប្រកាសកាលពីខែកក្កដា បានផ្ដល់ថវិកាប្រមាណជិត១០០លានដុល្លារអាមេរិក សម្រាប់ក្រុមហ៊ុនជប៉ុនចំនួន ៣០ ដែលរើផលិតកម្មពីប្រទេសចិន ទៅកាន់តំបន់អាស៊ី ដូចជា ក្រុមហ៊ុន Hoya បានផ្លាស់ប្តូរផលិតកម្មគ្រឿងបង្គុំអេឡិចត្រូនិកទៅកាន់ប្រទេសវៀតណាម និងឡាវ។ រីឯ ក្រុមហ៊ុនចំនួន៥៧ ផ្សេងទៀត ទទួលបានការគាំទ្រសម្រាប់ការផ្លាស់ប្ដូរផលិតកម្មពីប្រទេសចិន មកកាន់ប្រទេសជប៉ុនវិញ។
ឆ្លើយតបទៅនឹងការរើផលិតកម្មរបស់ក្រុមហ៊ុនបរទេសចេញពីប្រទេសចិននេះដែរ ក៏ធ្លាប់ត្រូវបានរដ្ឋាភិបាលចិនបញ្ជាក់ថា វាជាធម្មជាតិនៃការប្រែប្រួលជាធម្មតារបស់ទីផ្សារប៉ុណ្ណោះ ដោយបណ្តាវិនិយោគិនទាំងអស់ ត្រូវការផ្លាស់ប្តូរគំរូឧស្សាហកម្ម និងការប្រើប្រាស់ធនធានរបស់ពួកគេ ស្វែងរកកន្លែងដែលចំណាយធនធានតិច មានបរិយាកាសពាណិជ្ជកម្មប្រសើរជាងនេះ និងមានស្ថិរភាពនៃខ្សែចង្វាក់ផ្គត់ផ្គង់ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
