ប្រទេសជប៉ុនក៏បានប្រកាសក្នុងការប្ដេជ្ញាចិត្តហាមឃាត់ការនាំចូលប្រេងពីប្រទេសរុស្ស៊ីផងដែរ ប៉ុន្តែទីក្រុងតូក្យូ ក៏បានបានបញ្ចាក់ច្បាស់ៗដែរថា ខ្លួននឹងនៅតែរក្សាផលប្រយោជន៍របស់ខ្លួនក្នុងគម្រោងអភិវឌ្ឍន៍ចំនួនពីរពាក់ព័ន្ធនឹងការបូមយកប្រេង និងឧស្ម័ន នៅកោះ Sakhalin ក្នុងប្រទេសរុស្ស៊ីដដែល ដើម្បីរក្សាស្ថិរភាពថាមពលក្នុងប្រទេសជប៉ុន។ នេះបើតាមការចុះផ្សាយសារព័ត៌មានជប៉ុន Nikkei។
នាយករដ្ឋមន្ត្រីជប៉ុនលោក Fumio Kishida បានប្រាប់អ្នកសារព័ត៌មាននៅថ្ងៃទី ៩ឧសភាថា លោកនឹងចាត់វិធានការ ដើម្បីបញ្ឈប់ការនាំចូលប្រេងពីរុស្ស៊ី ខណៈមានការចូលរួមដោយប្រទេសសេដ្ឋកិច្ចជឿនលឿនទាំង ៧ ឬហៅថា G7 ផងដែរ។ ក៏ប៉ុន្តែលោកមិនបានបញ្ជាក់លម្អិតពីពេលវេលាកំណត់ ឬជំហានជាក់លាក់ក្នុងការកាត់ផ្តាច់ពីរុស្ស៊ីនោះទេ។
ប៉ុន្ដែ លោក Kishida បានបញ្ចាក់ថា ប្រទេសជប៉ុននឹងរក្សាទុកផលប្រយោជន៍របស់ខ្លួននៅក្នុងគម្រោងអភិវឌ្ឍន៍បូមយកប្រេង និង ឧស្ម័នទាំង២គម្រោងនៅលើកោះ Sakhalinនៃប្រទេសរុស្ស៊ីដដែល ដ្បិតថា រាជរដ្ឋាភិបាលជប៉ុនមានចំណែកភាគហ៊ុនធំនៅក្នុងគម្រោងបូមប្រេង និងហ្គាសនៅលើកោះ Sakhalin របស់រុស្ស៊ីនេះ ។ ប្រទេសជប៉ុន រំពឹងថា នឹងបង្កើនការនាំចូលប្រេងពីប្រទេសផ្សេងៗទៀត ជំនួសឲ្យរុស្ស៊ី។
អត្ថបទគួរអាន
ប្រទេសរុស្ស៊ីមានចំណែកទីផ្សារនៃនាំចូលប្រេងឆៅសរុបរបស់ប្រទេសជប៉ុនប្រមាណតែ ៣,៦% គិតជាទឹកប្រាក់ជិត ២ ពាន់លានដុល្លារ ក្នុងឆ្នាំ ២០២១ ហើយក្នុងចំណោមប្រេងនាំចូលពីរុស្ស៊ីនោះ មានប្រមាណជាង ៤០% គឺបានមកពីគម្រោង Sakhalin1 ដោយក្រុមហ៊ុនរដ្ឋជប៉ុនមានចំណែកភាគហ៊ុន៣០%នៃគម្រោងនេះ។
សូមជម្រាបថា ការបញ្ចប់ការនាំចូលប្រេងឆៅពីរុស្ស៊ីអាចធ្វើឲ្យមានផលប៉ះពាល់ធ្ងន់ធ្ងរដល់ការផ្គត់ផ្គង់ថាមពលរបស់ជប៉ុន។ ប្រទេសជប៉ុនបាននាំចូលស្ទើរតែទាំងស្រុងនៃប្រេងឆៅ ឧស្ម័នធម្មជាតិ និងធ្យូងថ្មរបស់ខ្លួន ដែលពឹងផ្អែកលើតំបន់មជ្ឈិមបូព៌ា ជាពិសេសការនាំចូលប្រេងឆៅជាង ៩០% ក្នុងឆ្នាំ ២០២១ ដើម្បីផ្គត់ផ្គង់តម្រូវការក្នុងស្រុក៕
អត្ថបទ៖ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
