លោក កាន់ ស៊ីណុច ប្រធានក្រុមប្រឹក្សាភិបាលសមាគមលើកកម្ពស់ម្រេចកំពត បានប្រាប់ខេមបូណូមីសថា ការនាំចេញម្រេចកំពត ដែលជាផលិតផល GI បានបង្ហាញពីទំនោរធ្លាក់ចុះគួរឱ្យកត់សម្គាល់នៅឆ្នាំនេះ។ ជាក់ស្តែងនៅក្នុងរយៈពេល១១ខែកន្លងមកនេះ ការនាំចេញម្រេចកំពតសម្រេចបានប្រមាណតែ៨០តោនប៉ុណ្ណោះ ពោលគឺធ្លាក់ចុះប្រមាណ៣៣% បើធៀបនឹងបរិមាណនាំចេញក្នុងរយៈពេលដូចគ្នាកាលពីឆ្នាំមុនដែលមានរហូតដល់១២០តោន។ ការធ្លាក់ចុះបរិមាណនាំចេញនេះ គឺដោយសារទិន្នផលម្រេចនៅឆ្នាំនេះមានការធ្លាក់ចុះ ក្រោយការបង្កបង្កើនផលរងការរំខានពីការប្រួលអាកាសធាតុ ដែលបង្កឱ្យមានភាពរាំងស្ងួតកាលពីដើមឆ្នាំ។ ទោះបីការនាំចេញ និងទិន្នផលមានការធ្លាក់ចុះក៏ពិតមែន តែតម្លៃម្រេចកំពតនៅឆ្នាំនេះហាក់នៅទ្រឹងមិនមានការប្រែប្រួលនោះទេ ពោលគឺម្រេចខ្មៅមានតម្លៃ១៥ដុល្លារ ម្រេចក្រហមតម្លៃ២៥ដុល្លារ និងម្រេចស មានតម្លៃ២៨ដុល្លារ ក្នុង១គីឡូក្រាម។
បើតាមអះអាងរបស់លោក កាន់ ស៊ីណុច នៅឆ្នាំ២០២៥ ខាងមុខ សមាជិករបស់សមាគមបានឯកភាពគ្នាដំឡើងថ្លៃម្រេចប្រភេទ GI និង GI សរីរាង្គ ចន្លោះពី២ ទៅ៣ដុល្លារ ក្នុង១គីឡូក្រាម ដើម្បីលើកទឹកចិត្តដល់កសិករ ដែលរងផលប៉ះពាល់ដោយសារការប្រែប្រួលអាកាសធាតុ ព្រោះការរាំងស្ងួតក្នុងឆ្នាំនេះ បានធ្វើឱ្យដើមម្រេចជាច្រើនងាប់ និងទទួលផលបានតិច។ គម្រោងដំឡើងថ្លៃនេះ ត្រូវបានថ្នាក់ដឹកនាំសមាគមរូបនេះគូសបញ្ជាក់ថា មានក្រុមហ៊ុនបញ្ជាទិញខ្លះបានឯកភាពរួចហើយ តែក្រុមហ៊ុនខ្លះកំពុងពិចារណា។
បច្ចុប្បន្នសមាគមម្រេចកំពតមានសមាជិកចំនួន៣៤៥គ្រួសារ និងបានដាំដុះនៅលើផ្ទៃដី២១២ហិកតា និងមានជន្លង់ម្រេចចំនួនជាង៣ម៉ឺនដើម។ ទីផ្សារសំខាន់ៗសម្រាប់ការនាំចេញម្រេចកំពតកម្ពុជា រួមមានសហភាពអឺរ៉ុប សហរដ្ឋអាម៉េរិក ជប៉ុន កូរ៉េខាងត្បូង ហុងកុង និងតៃវ៉ាន់ ជាដើម៕
អត្ថបទ៖ បូ ដូឡា
