កំពង់ផែពហុបំណងនេះ មិនត្រឹមតែជាកន្លែងលើកដាក់ និងដោះដូរទំនិញនោះទេ តែវានឹងក្លាយជាមជ្ឈមណ្ឌលផ្ទុកប្រេងឥន្ធនៈ និងឧស្ម័នដ៏ធំមួយរបស់កម្ពុជា។ លើសពីនេះ វានឹងដើរតួនាទីបំពេញឲ្យគ្នាទៅវិញទៅមកជាមួយកំពុងផែស្វយ័តក្រុងព្រះសីហនុ និងគម្រោងដឹកជញ្ជូនតាមផ្លូវពីទន្លេបាសាក់មកកាន់ខេត្តកែប។ ក្រោយបញ្ចប់ការសាងសង់ដំណាក់កាលទី១ កំពង់ផែនេះ អាចលើកដាក់ទំនិញបាន៣០ម៉ឺន TEU និងអាចឲ្យកប៉ាល់ផ្ទុកទំនិញប្រមាណ១០ម៉ឺនតោនចូលចតបាន។ នេះបើតាមការអះអាងរបស់ថ្នាក់ដឹកនាំក្រសួងសាធារណការ និងដឹកជញ្ជូន។
នាពិធីបើកការដ្ឋានសាងសង់មជ្ឈមណ្ឌភស្តុភារកម្ម និងកំពង់ផែពហុបំណងនៅខេត្តកំពតនាព្រឹកថ្ងៃទី៥ ឧសភា ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានចាត់ទុកគម្រោងនេះ ជាសមិទ្ធផលប្រវត្តិសាស្ត្រថ្មីមួយទៀតរបស់កម្ពុជា ដែលនឹងរួមចំណែកជួយអភិវឌ្ឍន៍សេដ្ឋកិច្ចកម្ពុជា។ មជ្ឈមណ្ឌលភស្តុភារកម្ម និងកំពង់ផែពហុបំណងនេះ នឹងដើរតួនាទីយ៉ាងសំខាន់ក្នុងការជួយសម្រួលដល់ការដឹកជញ្ជូន លើកដាក់ និងដោះដូរទំនិញទាំងក្របខណ្ឌជាតិ និងអន្តរជាតិ។
ក្រៅតែពីដើតួនាទីសំខាន់សម្រាប់ការដឹកជញ្ជូន និងដោះដូរទំនិញនោះទេ កំពុងផែនេះ ក៏នឹងក្លាយជាមជ្ឈមណ្ឌលផ្ទុកប្រេងឥន្ធនៈ និងឧស្ម័នដ៏ធំរបស់កម្ពុជាផងដែរ បន្ថែមលើកន្លែងផ្ទុកប្រេងនៅកំពង់ផែស្វយ័តក្រុងព្រះសីហនុ និងស្ទឹងហាវនៅខេត្តព្រះសីហនុ។ បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល ការសាងសង់រោងចក្រចម្រាញ់ប្រេងកាត ក៏ស្ថិតក្នុងផែនការអភិវឌ្ឍន៍គម្រោងមជ្ឈមណ្ឌលភស្តុភារកម្ម និងកំពង់ផែពហុបំណងនេះដែរ។
អត្ថបទគួរអាន
ឯកឧត្តមទេសរដ្ឋមន្ត្រីបានគូសបញ្ជាក់ទៀតថា គម្រោងមជ្ឈមណ្ឌលភស្តុភារកម្ម និកំពង់ផែពហុបំណង ដែលជាការវិនិយោគរបស់ក្រុមហ៊ុនក្នុងស្រុក ក្រោមជំនួយសិក្សាបច្ចេកទេសរបស់ក្រុមហ៊ុនចិននេះ នឹងបំពេញឲ្យគ្នាទៅវិញទៅមកជាមួយកំពង់ផែស្វយ័តក្រុងព្រះសីហនុ និងគម្រោងអភិវឌ្ឍន៍ការដឹកជញ្ជូនតាមផ្លូវទឹកពីទន្លេបាសាក់នៅរាជធានីភ្នំពេញឆ្ពោះមកកំពង់ផែនៅខេត្តកែប។ តាមរយៈគម្រោងទាំងនេះ វានឹងជួយធ្វើឲ្យតម្លៃដឹកជញ្ជូនក្នុងស្រុកកាន់តែល្អប្រសើរ ដែលវានឹងក្លាយជាផែ្នកមួយក្នុងការជួយទាក់ទាញវិនិយោគិនបរទេសឲ្យមកបោះទុនរកស៊ីនៅកម្ពុជាឲ្យកាន់តែច្រើន។
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល គម្រោងមជ្ឈមណ្ឌលភស្តុភារកម្ម និងកំពង់ផែពហុបំណងនេះអភិវឌ្ឍន៍ជាបីដំណាក់កាល ដោយដំណាក់កាលទី១មានទុនវិនិយោគប្រមាណ២០០លានដុល្លារ ដែលចំណាយពេលពីរឆ្នាំលើសាងសង់។ ក្រោយបញ្ចប់ការសាងសង់ដំណាក់កាលទី១នៅឆ្នាំ២០២៥ កំពង់ផែនេះអាចផ្ទុកទំនិញបានប្រមាណ៣០ម៉ឺន TEU ហើយបញ្ចប់ការសាងសង់ដំណាក់កាលទី២នៅឆ្នាំ២០៣០ វានឹងអាចផ្ទុកទំនិញបានដល់ទៅ ៦០ម៉ឺនTEU ។ គម្រោងនេះអភិវឌ្ឍន៍លើផ្ទៃដីជាង៦០០ហិកតា ដែលមានទុនវិនិយោគសរុបប្រមាណ១ពាន់៥រយលានដុល្លារ ក្រោមការវិនិយោគរបស់ក្រុមហ៊ុន ហ៊ុន Kampot Logistics and Port Company Limited។ កំពង់ផែពហុបំណង ដែលស្ថិតនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពតនេះមានជម្រៅចន្លោះពី១៥ទៅ១៦ម៉ែត្រ ដែលអាចឲ្យកប៉ាល់ផ្ទុកទំនិញប្រមាណ១០ម៉ឺនតោនអាចចូលចតបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
