លោក បេនណិត នឹងដកខ្លួនចេញពីតំណែងនាយករដ្ឋមន្ត្រី ជាមួយនឹងការជំនួសដោយរដ្ឋមន្ត្រីការបរទេសលោក យ៉ៃ ឡាភីត (Yair Lapid) ជាដៃគូរបស់លោកក្នុងសម្ព័ន្ធភាពនៃក្រុមប្រឆាំង ដែលបានបញ្ចប់អំណាចរបស់អតីតនាយករដ្ឋមន្ត្រីលោក បេនចាមីន នេតាន់យ៉ាហ៊ូ កាលពីឆ្នាំមុន ក្រោយពេលលោក នេតាន់យ៉ាហ៊ូ កាន់អំណាចអស់រយៈពេល ១២ ឆ្នាំ។
លោក ឡាភីត ជាអតីតអ្នកសារព័ត៌មានដែលដឹកនាំគណបក្សធំជាងគេនៅក្នុងក្រុមសម្ព័ន្ធនោះនឹងធ្វើជានាយករដ្ឋមន្ត្រីបណ្តោះអាសន្នរហូតដល់មានការបោះឆ្នោតថ្មី ហើយលោក បេនណិតបាននិយាយតាមទូរទស្សន៍ជាមួយលោក ឡាភីត ថា ពួកគាត់កំពុងឈរនៅចំពោះមុខពលរដ្ឋអ៊ីស្រាអែល នៅពេលវេលាមួយដែលមិនងាយស្រួលនោះទេ ប៉ុន្តែដោយស្វែងយល់ពីស្ថានភាពនេះ គឺពួកគេបានធ្វើការសម្រេចចិត្តត្រឹមត្រូវសម្រាប់អ៊ីស្រាអែល។
ការបោះឆ្នោតរំលាយសភាអ៊ីស្រាអែលគ្រោងនឹងធ្វើនៅសប្ដាហ៍ក្រោយនេះ ក្រោមការដឹកនាំរបស់លោក ឡាភីត នឹងឈរឈ្មោះជាបេក្ខភាពនាយករដ្ឋមន្ត្រីជំនួសលោកបេនណិត។ នេះបើតាមការឱ្យដឹងរបស់មន្ត្រីនាំពាក្យរបស់លោក បេនណិត។
ការប្រកាសពីការបោះឆ្នោតរំលាយសភានេះ បានកើតឡើងនៅប៉ុន្មានសប្តាហ៍មុនពេលដំណើរទស្សនកិច្ចតាមការគ្រោងទុករបស់ប្រធានាធិបតីអាមេរិកលោក Joe Biden ទៅប្រទេសអ៊ីស្រាអែល ដែលអ៊ីស្រាអែលនេះ គឺបាននិងកំពុងពឹងផ្អែកលើអាមេរិកយ៉ាងខ្លាំង ដើម្បីជួយបង្កើនទំនាក់ទំនងសន្តិសុខក្នុងតំបន់ ទប់ទល់នឹងសត្រូវដ៏យូរឆ្នាំរបស់ខ្លួន គឺប្រទេសអ៊ីរ៉ង់។
អត្ថបទគួរអាន
ការរំលាយសភានេះបានកើតឡើងក្រោយពីសម្ព័ន្ធភាពមាន ៨ គណបក្សរួមទាំងគណបក្សស្ដាំនិយម សេរីនិយម និងអារ៉ាប់និយមនោះ មានការខ្វែងគំនិតគ្នាកាន់តែខ្លាំងឡើងៗលើសំណួរជាច្រើន រាប់ចាប់ពីបញ្ហាសាសនារហូតដល់បញ្ហារដ្ឋប៉ាឡេស្ទីន ដែលបានធ្វើឱ្យសមាជិកមួយចំនួនតូចបានសម្រេចចិត្តដើរចេញពីសម្ព័ន្ធភាព ដែលកំពុងកាន់អំណាចនៅអ៊ីស្រាអែល។
រដ្ឋមន្ត្រីក្រសួងការពារជាតិអ៊ីស្រាអែលលោក បេននី ហ្កាន (Benny Gantz) ប្រធានគណបក្សកណ្តាលនិយមមួយនៅក្នុងក្រុមចម្រុះនេះ បាននិយាយថា លោកគិតថា រដ្ឋាភិបាលបានធ្វើកិច្ចការបានយ៉ាងល្អកាលពីឆ្នាំមុន ហើយវាជារឿងដ៏អាម៉ាស់បំផុតមួយដែលប្រទេសនេះបានធ្លាក់ចូលទៅក្នុងការបោះឆ្នោតជាថ្មីបែបនេះ ប៉ុន្តែពួកគេនឹងបន្តការងាររបស់ខ្លួនក្នុងនាមជារដ្ឋាភិបាលបណ្ដោះអាសន្នឱ្យបានច្រើនតាមតែអាចធ្វើទៅបាន។
ពាក់ព័ន្ធនឹងកាលបរិច្ឆេទសម្រាប់ការបោះឆ្នោតសភាជាថ្មីនេះ គឺមិនទាន់ប្រកាសនៅឡើយទេប៉ុន្តែប្រព័ន្ធផ្សព្វផ្សាយអ៊ីស្រាអែលបានរាយការណ៍ថាវាទំនងជានឹងធ្វើនៅក្នុងខែតុលាឆ្នាំនេះ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
