បើតាមការអះអាងពីអ្នកគ្រប់គ្រងជាន់ខ្ពស់ក្រុមហ៊ុន AmruRice បានឲ្យដឹងថា ប្រព័ន្ធបច្ចេកវិទ្យាកសិកម្មលក្ខណៈប្រមូលផ្ដុំ BlocRice គឺជាគម្រោងថ្មីមិនធ្លាប់មានក្នុងវិស័យកសិកម្មកម្ពុជា ហើយក៏នឹងផ្ដល់អត្ថប្រយោជន៍ជាច្រើនផងដែរ។
លោក កាន់ គន្ធី នាយករងក្រុមហ៊ុននាំចេញអង្ករ AmruRice បានឲ្យដឹងថា គម្រោង BlocRice នេះ គឺវាស្រដៀងនឹងប្រព័ន្ធ BlockChain ដែលពិភពលោកកំពុងនិយមប្រើប្រាស់យ៉ាងដូច្នោះដែរ ដោយវានឹងប្រើប្រាស់ជាលក្ខណៈបច្ចេកវិទ្យាប្រមូលផ្ដុំព័ត៌មាន និងដំណើរការនានាក្នុងការផលិតនិងនាំចេញអង្ករ ដោយវាមានភាពងាយស្រួល សុវត្ថិភាព និងផ្ដល់ព័ត៌មានបានគ្រប់ជ្រុងជ្រោយ ពិសេសគឺផ្ដល់នូវទំនុកចិត្តខ្ពស់ដល់អ្នកទិញអង្ករពីកម្ពុជាយកទៅទទួលទាន។
បើតាមនាយករងក្រុមហ៊ុន AmruRice រូបនេះ ប្រព័ន្ធបច្ចេកវិទ្យាកសិកម្មលក្ខណៈប្រមូលផ្ដុំសម្រាប់វិស័យស្រូវអង្ករ BlocRice នេះ គឺផ្ដល់នូវអត្ថប្រយោជន៍ ៤យ៉ាង៖
តើអ្នកបានអានអត្ថបទនេះ ឬនៅ?
ទី១ គឺភាពអាចតាមដានដឹងបាន អំពីព័ត៌មាននានាតាំងពីសង្វាក់ដំបូងនៃផលិតកម្មស្រូវអង្កររហូតដល់ការនាំចេញលក់នៅលើទីផ្សារ ដោយក្នុងនោះ កសិករនិងអ្នកបញ្ជាទិញអាចតាមដានបានដឹងជាមួយប្រព័ន្ធបច្ចេកវិទ្យាស្កែន QR Code ដែលក្រុមហ៊ុនបានរៀបចំឡើង។
ទី២ គឺអាចអភិវឌ្ឍគុណភាពស្រូវអង្ករ ព្រោះខាងក្រុមហ៊ុន AmruRice បានធ្វើកិច្ចសន្យាកសិកម្ម (Contract Farming) ជាមួយកសិករ រួមជាមួយនឹងការបញ្ចូលបច្ចេកវិទ្យាក្នុងការធ្វើកសិកម្មតាមបែបទំនើប និងមានការទទួលខុសត្រូវជាងមុន។
ទី៣ គឺការដឹងពីពេលវេលាជាក់លាក់ ក្នុងការដាំដុះស្រូវ រហូតដល់ការនាំចេញ ទម្រាំដល់ទីផ្សារលក់ឲ្យអតិថិជនយកអង្ករទៅបរិភោគ ប្រកបដោយតម្លាភាព។
ទី៤ គឺកាត់បន្ថយការប្រើប្រាស់ក្រដាសប្រាក់ដើម្បីទិញលក់ស្រូវអង្ករ ដោយកសិករនឹងមានគណនីធនាគារផ្ទាល់ខ្លួន ហើយពេលក្រុមហ៊ុនបញ្ជាទិញ នឹងធ្វើប្រតិបត្តិការផ្ទេរប្រាក់តាមប្រព័ន្ធបច្ចេកវិទ្យាតែម្ដង។ ដូច្នេះ វាមានសុវត្ថិភាពជាងមុនសម្រាប់អ្នកទិញនិងកសិករផងដែរ។
តើអ្នកបានអានអត្ថបទនេះឬនៅ?
លោក កាន់ គន្ធី បន្ថែមថា គម្រោងប្រព័ន្ធបច្ចេកវិទ្យាលក្ខណៈប្រមូលផ្ដុំសម្រាប់វិស័យស្រូវអង្ករ BlocRice នៅជំហានដំបូងនេះ បានធ្វើការសាកល្បងជាមួយនឹងកសិករជាង ៥០សមាជិក នៅខេត្តព្រះវិហារ ដែលមានផ្ទៃដីដាំដុះស្រូវ ៥០ហិកតា ដោយមានការសហការពីអង្គការ Oxfam ជាមួយនឹងការចំណាយដើមទុនអស់ជាង ៥ម៉ឺនដុល្លារ។
បើតាមការបញ្ជាក់ពីនាយករងក្រុមហ៊ុន ArmuRice ដដែលនេះ បានឲ្យដឹងទៀតថា ការប្រើប្រាស់ប្រព័ន្ធបច្ចេកវិទ្យា BlocChain សម្រាប់វិស័យកសិកម្មគឺមានប្រទេសជាច្រើនបានធ្វើជោគជ័យរួចហើយ តួយ៉ាង នៅប្រទេសវៀតណាម គឺបានប្រើប្រាស់វាសម្រាប់ការនាំចេញត្រីទៅក្រៅប្រទេស ប៉ុន្ដែ វាគឺជាគម្រោងមួយថ្មីសម្រាប់វិស័យកសិកម្មនៅកម្ពុជា។
យ៉ាងណាក៏ដោយ លោក កាន់ គន្ធី បានគូសបញ្ជាក់ថា ប្រព័ន្ធបច្ចេកវិទ្យាកសិកម្មនេះ គឺជារឿងមួយដែលមិនអាចជៀសរួចឡើយទៅថ្ងៃអនាគត ប្រសិនបើចង់ធ្វើកសិកម្មក្នុងទីផ្សារដែលកំពុងមានការប្រកួតប្រជែងខ្លាំង។
បើតាមគោលដៅរបស់ក្រុមហ៊ុន AmruRice ប្រព័ន្ធបច្ចេកវិទ្យាកសិកម្មលក្ខណៈប្រមូលផ្ដុំសម្រាប់វិស័យស្រូវអង្ករ ហៅថា BlocRice នេះ នឹងអាចពង្រីកប្រតិបត្តិការដល់ ៥ពាន់កសិករ នៅ៣ឆ្នាំខាងមុខ ដោយសារតែក្រុមហ៊ុននេះ មើលឃើថា វាមានសក្ដានុពលសម្រាប់វិស័យស្រូវអង្ករ ក៏ដូចជាផ្ដល់នូវតម្លៃបន្ថែមខ្ពស់ផងដែរ។ មិនតែប៉ុណ្ណោះ ក្រុមហ៊ុន AmruRice ក៏នឹងឈានទៅពង្រីកប្រព័ន្ធបច្ចេកវិទ្យាកសិកម្មប្រមូលផ្ដុំនេះ ជាមួយនឹងប្រភេទកសិកផលផ្សេងទៀតរបស់កម្ពុជាផងដែរ ដូចជា ពោត និងដំឡូងមី ជាដើម៕
None
