យោងតាមប្រកាសព័ត៌មានរបស់ក្រសួងរៀបចំដែនដី ការដោះស្រាយជម្លោះដីធ្លីដ៏រ៉ាំរ៉ៃនេះ បានធ្វើឡើងនៅក្នុងកិច្ចប្រជុំមួយកាលពីព្រឹកថ្ងៃទី២២ មីនា ២០១៨ នៅទីស្ដីការក្រសួងរៀបចំដែនដី ដែលដឹកនាំដោយឯកឧត្តម ទេសរដ្ឋមន្ត្រី ជា សុផារ៉ា និងមានការចូលរួមពីរដ្ឋមន្ត្រីបរិស្ថាន សាយ សំអាល់ រដ្ឋមន្ត្រីកសិកម្ម វេង សាខុន រដ្ឋមន្ត្រីពាណិជ្ជកម្ម ប៉ាន សូរស័ក្តិ អភិបាលខេត្តកោះកុង ជំទាវ មិថុនា ភូថង អ្នកឧកញ៉ា លី យ៉ុងផាត់ តំណាងក្រុមហ៊ុនវិនិយោគដំណាំអំពៅ និងប្រជាពលរដ្ឋពាក់ព័ន្ធ។
ក្នុងជំនួបនោះដែរ គេកត់សម្គាល់ឃើញមានវត្តមានចូលរួមពីសំណាក់ឯកអគ្គរដ្ឋទូតសហភាពអឺរ៉ុប ប្រចាំកម្ពុជា ឯកឧត្តម George Edgar និងតំណាងអង្គការសង្គមស៊ីវិលជាច្រើនចូលរួមផងដែរ។ វត្តមានលោកទូតសហភាពអឺរ៉ុប គឺជាសាក្សីសំខាន់ ព្រោះថា កន្លងមក ជម្លោះដីធ្លីនៅខេត្តកោះកុងនេះត្រូវបានប្រជាពលរដ្ឋប្ដឹងផ្ដល់ទៅដល់សហគមន៍អឺរ៉ុប ដូច្នេះ នៅពេលដោះស្រាយបានជោគជ័យ ក៏ត្រូវមានការដឹងឮពីតំណាងភាគីសហគមន៍អឺរ៉ុប។
ជាដំណោះស្រាយ ប្រជាពលរដ្ឋនិងក្រុមហ៊ុនព្រមព្រៀងគ្នាបញ្ចប់វិវាទនេះជាស្ថាពរ ដោយប្រជាពលរដ្ឋ ១៧៥គ្រួសារ យល់ព្រមទទួលយកដំណោះស្រាយជាដីធ្លីទំហំ ៣ហិកតា និងថវិកា ២៥០០ដុល្លារ ក្នុងមួយគ្រួសារ ប៉ុន្តែ មិនដោះស្រាយចំពោះពលរដ្ឋដែលបានដោះស្រាយរួចហើយនោះទេ រីឯប្រជាពលរដ្ឋ ២០០គ្រួសារផ្សេងទៀត យល់ព្រមទទួលយកដំណោះស្រាយជាដីទំហំ ១ហិកតាកន្លះ ក្នុងមួយគ្រួសារ។
តើអ្នកបានអានអត្ថបទនេះ ឬនៅ?
ភាគីក្រុមហ៊ុនយល់ព្រមឲ្យរដ្ឋកាត់ដីទំហំ ៨២៥ហិកតា ស្ថិតក្នុងឃុំជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ចដែលបានទទួលសិទ្ធិវិនិយោគពីរដ្ឋ ដើម្បីរដ្ឋផ្ដល់ជាកម្មសិទ្ធិទៅឲ្យប្រជាពលរដ្ឋ ហើយក្រុមហ៊ុនព្រមផ្ដល់ថវិកាតាមចំនួនខាងលើ ទៅឲ្យពលរដ្ឋក្នុងចំណោម ១៧៥គ្រួសារ តាមសំណូមពរ។
ប្រកាសព័ត៌មានពីក្រសួងរៀបចំដែនដី បានលើកឡើងថា ស្ថានទូតសហភាពអឺរ៉ុបសម្ដែងការសាទរចំពោះរដ្ឋាភិបាលកម្ពុជា ដែលបានដោះស្រាយវិវាទដីធ្លីដ៏រ៉ាំរ៉ៃមួយនេះ។
គួរកត់សម្គាល់ថា តាំងពីការចូលកាន់តំណែងជារដ្ឋមន្ត្រីរៀបចំដែនដី នគរូបនីយកម្ម និងសំណង់ របស់ឯកឧត្តម ជា សុផារ៉ា គេសង្កេតឃើញជម្លោះដីធ្លីជាច្រើនត្រូវបានរដ្ឋមន្ត្រី«មុខដែក» រូបនេះ ដោះស្រាយបានដោយជោគជ័យ។ ជារដ្ឋមន្ត្រីមុខដែក ដោយសារតែឯកឧត្តម ជា សុផារ៉ា ត្រូវគេមើលឃើញថា ហ៊ានអារកាត់សម្រេចសេចក្ដីផ្ដល់យុត្តិធម៌ដល់ប្រជាពលរដ្ឋដែលពាក់ព័ន្ធក្នុងជម្លោះដីធ្លីជាមួយឧកញ៉ាមហាសេដ្ឋីនៅស្រុកខ្មែរ។
ករណីមួយទៀត ដែលគេមើលឃើញនិងកោតសរសើរដល់រដ្ឋមន្ត្រី ជា សុផារ៉ា ផងដែរនោះ គឺអគារ ស ឬ ប៊ូឌីង ក្នុងសង្កាត់ទន្លេបាសាក់ ដែលត្រូវបានលោករដ្ឋមន្ត្រីរៀបចំដោះស្រាយឲ្យមានសំណងដល់ប្រជាជនដែលត្រូវរើចេញដើម្បីបើកផ្លូវឲ្យក្រុមហ៊ុនឯកជនអភិវឌ្ឍទីនោះ ហើយសំណងនោះទៀត បានទទួលការពេញចិត្តនិងសាទរពីប្រជាពលរដ្ឋដែលរងផលប៉ះពាល់ ហើយករណីនេះបានធ្វើទៅដោយរលូន គ្មានការតវ៉ាប្រឆាំងជំទាស់ពីប្រជាជន៕
None
