ក្រុមហ៊ុន លី ហួរ ឌីវេឡុបម៉ិន វិមានភ្នំពេញ និងធនាគារប្រ៊ីដ ចាប់ដៃគ្នាផ្ដល់ឥណទានគេហដ្ឋានដល់អតិថិជន ជាមួយលក្ខខណ្ឌល្អប្រសើរ រយៈពេលរហូត២៥ឆ្នាំ និងអត្រាការប្រាក់ចាប់ពី៨.៥%

លោក មឿង រដ្ឋា នាយកប្រតិបត្តិ ក្រុមហ៊ុន លី ហួរ ឌីវេឡុបម៉ិន វិមានភ្នំពេញ ឯ.ក​ គូសបញ្ជាក់ថា ការចុះអនុស្សរណៈយោគយល់គ្នារវាង បុរី វិមាន ភ្នំពេញ និងធនាគារប្រ៊ីដ ម.ក នាពេលនេះ ដើម្បីជាប្រយោជន៍ដល់អ្នកដែលទិញផ្ទះនៅក្នុងគម្រោងបុរីវិមានភ្នំពេញ។ លោកបន្តថា ទិដ្ឋភាពចាំបាច់បំផុតនៃកិច្ចព្រមព្រៀងនេះ គឺការចាប់ផ្តើមនៃដំណោះស្រាយហិរញ្ញប្បទានដ៏ល្អបំផុត និងជាមធ្យោបាយងាយស្រួលបំផុតសម្រាប់អតិថិជនក្នុងការទទួលបានផ្ទះក្នុងក្តីស្រមៃរបស់ពួកគេ ក្នុងអត្រាការប្រាក់ពិសេស សម្រាប់ការរស់នៅគ្រប់កម្រិត។

ជាពិសេស ដើម្បីឆ្លើយតបទៅនឹងតម្រូវការកើនឡើង របស់អតិថិជន ក្នុងការទិញគេហដ្ឋាន តាមរយៈបង់រំលស់ពីធនាគារ នាពេលបច្ចុប្បន្ននេះ។

បើតាមលោក មឿង រដ្ឋា ស្ថិតក្នុងស្ថានភាពដែលពិភពលោកជួបប្រឈមនឹងវិបត្តិនៅឡើយ សន្ទុះនៃការលក់ជាទូទៅ ហាក់មានការថមថយបន្តិចមែន ប៉ុន្តែ សម្រាប់សកម្មភាពទិញ-លក់ ផ្ទះ និងបុរី ហាក់នៅតែមានសកម្មភាពជាធម្មតា ជាពិសេសការបង់រំលស់ផ្ទះ និងបុរី តាមរយៈធនាគារ ហាក់មានការកើនឡើងគួរឲ្យកត់សម្គាល់។

ឆ្លើយតបនឹងតម្រូវនេះហើយ ទើបបុរី វិមាន ភ្នំពេញ និងធនាគារប្រ៊ីដ ម.ក សម្រេចចាប់ដៃគ្នា ដើម្បីផ្ដល់ជូនលក្ខខណ្ឌឥណទានគេហដ្ឋានដ៏ល្អប្រសើរ សម្រាប់អតិថិជន។ បើតាមលោក មឿង រដ្ឋា អតិថិជនរបស់ បុរី វិមាន ភ្នំពេញ ទាំងអស់ ដែលមានប្រាក់ត្រឹមតែ ២០% នៃតម្លៃអចលនទ្រព្យ នឹងទទួលបានប្រាក់កម្ចីទិញផ្ទះពិសេសរហូតដល់ ៨០% ជាមួយអត្រាការប្រាក់ទាប ៨.៥% ក្នុងមួយឆ្នាំ និងរយៈពេលសងត្រឡប់រហូត ២៥ឆ្នាំ។

លោក មឿង រដ្ឋា បង្ហាញគំនិតសុទិដ្ឋិនិយមថា ក្រោយការចុះកិច្ចព្រមព្រៀងនេះ មិនត្រឹមតែជួយបង្កើនទំនុកចិត្តអតិថិជនរបស់ បុរី វិមាន ភ្នំពេញ ប៉ុណ្ណោះទេ ប៉ុន្ដែក៏លើកកម្ពស់ការផ្ដល់កម្ចីរបស់ធនាគារ ប្រ៊ីដ ម.ក ផងដែរ។ បើតាមថ្នាក់ដឹកនាំជាន់ខ្ពស់ បុរី វិមាន ភ្នំពេញ ការផ្ដល់ជូនលក្ខខណ្ឌឥណទានគេហដ្ឋានដ៏ពិសេសនេះ សម្រាប់អតិថិជនទាំង ១៦គម្រោង របស់បុរី វិមាន ភ្នំពេញ។

រហូតមកដល់ពេលនេះ បុរី វិមាន ភ្នំពេញ បានសាងសង់លំនៅឋានជាច្រើនប្រភេទ រួមមាន អគារពាណិជ្ជកម្ម ផ្ទះលក់ទំនិញ វីឡាទោល និងភ្លោះ ផ្ទះភ្ជាប់ និងផ្ទះល្វែង នៅលើផ្ទៃដីសរុបប្រមាណ ២០០ហិកតា ដែលលាតសន្ធឹងលើគម្រោងចំនួន ១៦ និងទីតាំងផ្សេងៗគ្នា៕