ក្រុមអាជីវកម្មលោកខាងលិចយ៉ាងហោចណាស់ ១ពាន់ក្រុមហ៊ុន បានសន្យាថានឹងចាកចេញ ឬកាត់បន្ថយប្រតិបត្តិការរបស់ពួកគេនៅក្នុងប្រទេសរុស្ស៊ី បន្ទាប់ពីទីក្រុងម៉ូស្គូបានលុកលុយចូលឈ្លានពានទីក្រុងកៀវ។ នេះបើយោងតាមក្រុមអ្នកស្រាវជ្រាវលោកខាងលិច។
ក្រោយទិន្នន័យ និងការវិនិច្ឆ័យមកដល់បច្ចុប្បន្ន ក្រុមហ៊ុនដែលភាគច្រើនជារបស់លោកខាងលិចនោះ មានជាអាទិ៍ចាប់ពីស្ថាប័នធនាគារ និងក្រុមហ៊ុនផលិតស្រាបៀរ រហូតដល់ក្រុមហ៊ុនផលិត និងអ្នកលក់រាយ ភោជនីយដ្ឋានធំៗ ក្រុមហ៊ុនដឹកជញ្ជូន និងក្រុមហ៊ុនសំខាន់ៗផ្សេងទៀត។
បើទោះវិបត្តិហិរញ្ញវត្ថុ បានធ្វើឲ្យសេដ្ឋកិច្ចរុស្ស៊ីដាំក្បាលចុះក៏ពិតមែន តែវាមិនសូវមានផលប៉ះពាល់ខ្លាំងទេ សម្រាប់ក្រុមហ៊ុនបរទេសទាំងនោះ ដោយសារតែការរួមចំណែកតិចតួចនៅក្នុងសេដ្ឋកិច្ចរុស្សី។ មែនទែនទៅ មានក្រុមហ៊ុនមិនដល់ ៥០ ក្រុមហ៊ុនទេ ដែលខាតបង់ហិរញ្ញវត្ថុរបស់ខ្លួនសរុបប្រហែល៦០ ពាន់លានដុល្លារនេះ។
អត្ថបទគួរអាន
ក្រុមហ៊ុនមានការខាតបង់តិចតិច ក៏ដោយសារតែ ក្រុមហ៊ុនអន្តរជាតិធំៗទាំងនោះ មិនសូវមានទំនាក់ទំនងច្រើននៅក្នុងសេដ្ឋកិច្ចរុស្ស៊ីនោះទេ។
ជាក់ស្តែង ក្រុមហ៊ុន McDonald's បាននិយាយថា អាជីវកម្មរបស់ខ្លួននៅក្នុងប្រទេសរុស្ស៊ី និងអ៊ុយក្រែនមានមិនដល់ ៣% ផង នៃប្រាក់ចំណូលប្រតិបត្តិការរបស់ខ្លួនកាលពីឆ្នាំមុន។
ក្រុមហ៊ុនភោជនីយដ្ឋាន McDonald's រំពឹងថា ការលក់ភោជនីយដ្ឋានរបស់ខ្លួនទាំងអស់នៅក្នុងប្រទេសរុស្ស៊ី ទៅឲ្យក្រុមហ៊ុនក្នុងស្រុកនឹងទទួលបានប្រាក់ចន្លោះពី ១ពាន់២រយលានដុល្លារទៅ ១ពាន់៤រយលានដុល្លារ។
គួររំលឹកត្រួសៗថា ក្រុមហ៊ុនធំៗរបស់លោកខាងលិច ដែលចាកចេញពីទីផ្សាររុស្សីនោះមាន ក្រុមហ៊ុនប្រេងអន្តរជាតិអ៊ិចសុន (Exxon Mobil) ក្រុមហ៊ុនយន្តហោះដឹកអ្នកដំណើរ (AerCap) ក្រុមហ៊ុនប្រេង និងឧស្ម័នរបស់អង់គ្លេសប៊ីភី (BP PLC) ក្រុមហ៊ុនថាមពល និងប្រេងរបស់បារាំងតូតាល អេនើជី (TotalEnergies SE) ធនាគារវិនិយោគអាមេរិក (New York Mellon) ក្រុមហ៊ុនថ្នាំជក់អង់គ្លេសអាមេរិក (British American Tobacco PLC) ក្រុមហ៊ុនឧស្សាហកម្មអាមេរិច (The manufacturer ITT Inc) និង ក្រុនហ៊ុនសេវាដឹកជញ្ជូនចល័តរបស់អាមេរិក (Uber Technologies Inc)ជាដើម៕
អត្ថបទ៖ ហ៊ុន គន្ធថៃ
None
