ទោះយ៉ាងណា ក្រោយការលាលែងនេះ គេមិនទាន់ដឹងថា តើអ្នកណាជាអ្នកបង្កើតរដ្ឋាភិបាលថ្មីនៅឡើយទេ ខណៈការបោះឆ្នោតក្នុងប្រទេសនេះ នៅមិនទាន់អាចរៀបចំធ្វើទៅបានឡើយ ដោយសារតែកូវីដ-១៩ រាតត្បាតខ្លាំង។
ប្រសិនបើលោកនាយករដ្ឋមន្ត្រីម៉ាឡេស៊ី ម៉ូយីឌីន ពិតជាត្រូវចុះចេញពីដំណែងពិតមែន នោះវានឹងឈានទៅបិទបញ្ចប់ភាពចម្រោះចម្រាស់ និងភាពច្របូកច្របល់ដែលកើនឡើងអស់ពេលជាង ១៧ខែមកហើយនៃការកាន់តំណែងរបស់លោក។ ប៉ុន្តែសម្រាប់ម៉ាឡេស៊ីទាំងមូល វានឹងបង្កើនភាពមិនប្រាកដប្រជាបន្ថែមទៀត ក្នុងក្បាលម៉ាស៊ីនដឹកនាំប្រទេស ខណៈពេលដែលម៉ាឡេស៊ីកំពុងជាប់ដៃប្រយុទ្ធនឹងរលកឆ្លងកូវីដ១៩ដ៏ខ្លាំងក្លា ដែលកំពុងធ្វើឲ្យសេដ្ឋកិច្ចប្រទេសនេះរង្គោះរង្គើ។
គេនៅមិនទាន់អាចសន្និដ្ឋានភ្លាមៗបានទេថា តើអ្នកណានឹងមកបង្កើតរដ្ឋាភិបាលថ្មីបាន បន្ទាប់ពីលោក ម៉ូយីឌីន ចេញពីអំណាចទៅ ដោយហេតុថា ក្នុងស្ថានភាពនៃការរាតត្បាតកូវីដ១៩ គេមិនអាចរៀបចំការបោះឆ្នោតបាននោះទេ។ យ៉ាងណាមិញ បើតាមរដ្ឋធម្មនុញ្ញរបស់ម៉ាឡេស៊ី តួនាទីនេះ នឹងត្រូវមហាក្សត្រ អាល់ស៊ុលតង់អាប់ឌុលឡា ជាអ្នកសម្រេចថា នឹងត្រូវចាត់តាំងអ្នកកាន់ដំណែងថ្មី ឬធ្វើអ្វីបន្ទាប់។
អត្ថបទទាក់ទង
បើតាមព្រភពពីខុទ្ទកាល័យនាយករដ្ឋមន្ត្រី ប្រាប់សារព័ត៌មានក្នុងស្រុកម៉ាឡេស៊ីមួយបានឲ្យដឹងថា លោក ម៉ូយីស៊ីន នឹងដាក់ពាក្យលាលែងពីតំណែងនៅថ្ងៃច័ន្ទនេះ ហើយមូលហេតុដែលលោកចុះចេញ គឺដោយសារលោកហត់នឿយ ព្រមទាំអស់លទ្ធភាពដើម្បីទ្រទ្រង់ និងដឹកនាំរដ្ឋាភិបាលតទៅទៀត។
គួរជម្រាបថា នៅមួយរយៈចុងក្រោយនេះនាយករដ្ឋមន្ត្រីម៉ាឡេស៊ី បានផ្តើមបាត់បង់ប្រជាប្រិយភាពទាំងក្នុងចំណោមមហាជន និងក្នុងជួររដ្ឋាភិបាលចម្រុះរបស់លោក។ ជាក់ស្តែងកាលពីចុងខែកក្កដា ដោយសារតែ វិបត្តិកូវីដ១៩ គួបផ្សំនឹងអស្ថិរភាព និងភាពចម្រូងចម្រាស់ក្នុងជួររដ្ឋាភិបាលម៉ាឡេស៊ី បានជំរុញឲ្យពលរដ្ឋម៉ាឡេស៊ីជាង ១ពាន់នាក់ ភាគច្រើនជាយុវជន ចេញមកតាមផ្លូវធ្វើបាតុកម្មសម្តែងការមិនពេញចិត្តចំពោះការដឹកនាំរបស់រដ្ឋាភិបាលលោកម៉ូយីឌីន ដោយពួកគេបានប្រមូលផ្តុំគ្នាលើកបដា ទាមទារឲ្យនាយករដ្ឋមន្ត្រីរូបនេះចុះចេញពីដំណែងផងដែរ។
សូមរំឭកថា លោក ម៉ូយីឌីន យ៉ាស៊ីន ឡើងកាន់តំណែង នៅខែមីនាឆ្នាំ២០២០ ដែលមិនមែនទទួលតំណែងតាមការបោះឆ្នោតត្រឹមត្រូវពីប្រជាពលរដ្ឋទេ។ លោកទទួលតំណែងពីការជ្រើសតាំងពីស្តេចស៊ុលតង់ម៉ាឡេ និងតាមការព្រមព្រៀងរបស់ពហុបក្ស ដើម្បីបង្កើតរដ្ឋាភិបាល និងក្រោយពីរដ្ឋាភិបាលចាស់របស់លោក មហាធៀរ មានរឿងអាស្រូវពុករលួយ៕
None
